- Тамчы таш тешер.
- Айтхан сёзюне табылгъан.
- Ашда уялгъан – мухар, ишде уялгъан – хомух.
- Ата Джуртун танымагъан, атасын да танымаз.
- Аман къатын сабий табса, бий болур…
- Алтыда кюлмеген, алтмышда кюлмез.
- Сабийни джумушха джибер да, ызындан бар.
- Къуру гыбыт бек дыгъырдар.
- Сормай – алма, чакъырылмай – барма.
- Аш хазыр болса, иш харам болур.
- Билимсиз иш бармаз.
- Ёзденликни джайгъан – джокълукъ.
- Кесинг сынамагъан затны, адамгъа буюрма.
- Уллу суу бла уллу ауруудан башынгы сакъла.
- Мадар болса, къадар болур.
- Иги болса, тамадама – махтау, аман болса, меннге – айыб.
- Джауумдан сора, кюн кюйдюрюр, ётюрюкден сора, айыб кюйдюрюр.
- Уллу атлама – абынырса, уллу къабма – къарылырса.
- Ханнга да келеди хариблик.
- Тойгъан антын унутур.
- Эр абынмай, эл танымаз.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Джылкъыдан – ат чыгъар, тукъумдан – джаш чыгъар.
- Чарсда алчыны эл кёреди.
- Экиндини кеч къылсанг, чабыб джетер ашхам.
- Билим – акъылны чырагъы.
- Эркиши – от, тиширыу – суу.
- Сёз садакъдан кючлюдю.
- Биреуню къыйынлыгъы бла кесинге джол ишлеме.
- Къууут – джелге, берне – бошха.
- Кийиминг бла танылма, адамлыкъ бла таныл.
- Сабийликде юретмесенг, уллу болса – тюзелмез.
- Бет бетге къараса, бет да джерге къарар.
- Ёлген эшек бёрюден къоркъмайды.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Джарлы джети элни сёзюн этер.
- Тёрдеги кюлсе, эшикдеги ышарыр.
- Билими азны – ауузунда кирит.
- Биреу къой излей, биреу той излей.
- Эки итни арасына сюек атма, эки адамны арасында сёз чыгъарма.
- Ач – эснер, ат – кишнер.
- Сакъалы текени да бар, мыйыгъы киштикни да бар.
- Ишни аллы бла къууанма да, арты бла къууан.
- Алтыннга тот къонмаз.
- Къыз чыгъаргъан – къызыл къымжа.
- Туз, гырджын аша, тюзлюк бла джаша.
- Тил джюрекге джол ишлейди.
- Уллу сёлешме да, уллу къаб.
- Къарнынг бла ёч алма.
- Биреуню тёрюнден, кесинги эшик артынг игиди.
Ошибка!
Для просмотра темы введите ваши логин и пароль.Пожалуйста, авторизуйтесь: