Abdullah
04.12.2010 13:57:52
Ахлулагъа осият
Багъалы ахлуларым, барды сизге айтырым:
Хакъды мени къайтырым, джер тюбюнде джатарым.
Бу дунияда къалмазым, аджалым созулмазы.
Рысхысындан алмазым, болджалым сорулмазы.
Манга кёзюу джетгинчи, аджал мени элтгинчи,
Сизни къоюб кетгинчи, бушуууму этгинчи,
Ахыр тылпыу чыкъгъынчы, Азраил джан алгъынчы,
Узунума джатхынчы, сал агъачха салгъынчы,
Боюнлагъа алгъынчы, имбашлары талгъынчы,
Къабырлада джатхынчы, юсюмю да джабхынчы.
Мен киргинчи чунгургъа, халкъ кириучю уругъа,
Джер къарында турургъа, джангы мекям къурургъа,
Мёлек кириб къабырда манга соруу бергинчи,
?Аллахынг, файгъамбарынг кимди сени?? - дегинчи,
Заманны бош джоймайым, болджал эте турмайым,
Кечикдириб къоймайым, муратымы оймайым.
Ол да ёлюб къалмасын, ахлулагъа джарасын,
Мени была бармасын, хайырланныкъгъа къалсын,
?Дуния малгъа алдатыб, джашаугъа мыллык атыб,
Рысхыгъа бетни сатыб, джюреклеригиз къатыб,
Ёлюр кюнню унутуб, къуру дунияны тутуб,
Артмакъланы къурутуб, ёлмегиз къуру туруб.
Хакъ ючюн кюрешигиз, нафсы бла эришигиз,
Ариу болсун ишигиз, терсеймесин кишигиз.
Тюз джолдан сиз таймагъыз, Аллах джолун оймагъыз,
Нафсыгъа тынгламагъыз, динни бетин джоймагъыз.
Субайлыкъгъа кетмегиз, сыйсызлыкъгъа джетмегиз,
Гюнах ишле этмегиз, харамны джюрютмегиз.
Экибетли болмагъыз, сёзюгюзню оймагъыз,
Адамлыкъны джоймагъыз, сансыз этиб къоймагъыз.
Адеблиле болугъуз, сыйлы болур джолугъуз,
Чомарт болсун къолугъуз, Аллах была солугъуз!
Ёбкелеучю болмагъыз, заманны бош джоймагъыз,
Артыкъ ашаб тоймагъыз, зыраф этиб къоймагъыз.
Артда динни кюсерсиз, Бир Аллахдан тилерсиз,
Табалмазсыз, излерсиз, акъылсыз эдик дерсиз.
Сакъ болуб аманатха, дин буюргъан хар затха,
Созмагъыз аны артха, къалмагъыз аман атха.
Ётюрюкню айтмагъыз, хакъ сёзден сиз къайтмагъыз,
Тюзню терсге сатмагъыз, тауба этмей джатмагъыз.
Онгсузлагъа къарагъыз, мыдахлагъа джарагъыз,
Джарлыланы англагъыз, игиликле джорагъыз.
Таяныгъыз Аллахха, хазыр болуб палахха,
Келир сизни сынаргъа, къуралмагъыз джыларгъа,
Бир кемчилик келсе да, Бериучю аз берсе да,
Адамыгъыз ёлсе да, сизни сынаб кёрсе да,
Аллахсыз джукъ келмейди, Ол джукъну бош иймейди.
Башха биреу бермейди, тёзмегенни сюймейди.
Уллукёллю болмагъыз, тюзелсе джашауугъуз,
Сиз алданыб къалмагъыз, кёб болса ашауугъуз!
Ашхылыкъгъа, аманнга, къуралыгъыз заманнга,
Табсызына, табына ? бойсунуб хар затына.
Джарлы этиб къарайды, бай этиб да марайды,
Джашау деген алайды, Иебиз бизни сынайды.
Андан айыб алмазча, атлагъыз сиз уялмазча,
Сиз хакъны англамазча джукъламагъыз уянмазча.
Табсыз этиб ийсегиз, сиз гюнахха кирсегиз,
Кечиучю бард билсегиз, къайтыб тауба этсегиз.
Сиз тилегиз ашыгъыб, турмай заман ашырыб,
Къутулмазсыз джашырыб, бармагъыз сиз ышырыб!
Таубачыны сюеди, аны ариу кёреди,
Терсликлерин кечеди, джаннетине иеди.
Акъылгъа таянмагъыз, джахилге алданмагъыз,
Байлагъа сукъланмагъыз, тюзлюкге джукъламагъыз!
Апендиге сормагъыз, ол билед деб турмагъыз.
Даулашыучу болмагъыз, хакъны кери урмагъыз!
Алимледен соругъуз, тюзню-хакъны къоругъуз,
Таза ийман солугъуз, бишген мюрзеу оругъуз!
Джарым молла терсейтир, ол аджашдырыб элтир,
Сылхыр этиб эсиртир, артда хакъны кюсетир.
Оюмлу сёлешигиз, затны тюз юлешигиз,
Хакъ ючюн кюрешигиз, тюзлюкге илешигиз!
Джаннет джолуду тюзлюк, анга керек тёзюмлюк,
Джашау тюлдю ёмюрлюк ? ол бир кюн бир юзюллюк.
Тюзлюк чыгъад Къурандан, джокъду бир башха андан.
Джюрюгюз сиз хар заман, ол китабны ызындан.
Алгъа аны салыгъыз, аны ызындан барыгъыз,
Эсге иги алыгъыз, ол джолда сиз арыгъыз!
Ол Аллахны сёзюдю, Аны рахмат кёзюдю,
Джол джарытхан нюрюдю, эшитмеген ? ёлюдю.
Къыйынды сёзню тутхан, кёбле аны унутхан,
Джашау алдаб къурутхан, терслик кёблени джутхан.
Тюзню сюйген азчыкъды, терсни сюйген кёб чыкъды,
Дуния юсю балчыкъды, кёбню тайдырыб джыкъды.
Дин ючюн къыйналыгъыз, сууаблыкъла алыгъыз,
Къууанч была къалыгъыз, ахлуларым барыгъыз!
Эбзелени Абу Юсуф.
*ахлула - дин къарнашларым, эгечлерим деген магъанадады..