Алайды да мен сизге Эльбаны жетинчи мартда не ишлгенини эм къайры баргъаныны хапарын толусу бла да айтып берейим...
Барыбыз да билебиз, сегизинчи март Малкъар миллетни бушуу кюнюдю, къара кюню.
Жетинчи мартда Эльбрусда Чегетде уллу жыйылыу болгъанды, кёчгюнчюлюкге аталгъан. Эльбрусоидчиле да ол жыйылыугъа кеч къалмай жетдик...
Тюзю айтсам, эрттенликде тогъузгъа деп, жыйылгъан а оннга этип ийгенек
Болсада, къазауатда маршруткагъа жыйылып, биз долгъа тебиредик.
жол узун, кюнню халы да мутхуз, биз а барабыз эм барабыз...
Кечми болуп къалырбыз дей, алай а, аз кеч да къалмай, жумуш башланыргъа жетер жерибизге жетдик...
Адам кёп, биз аннга бек къууандыкъ, жаш тёлю да, къартла да хапарны сакълап, тёзюмлю олтура эдиле.
Биринчи Азия тюзлеринде эм жолда жаназысыз басдырылгъанлагъа бизни багъалы-сыйлы Циканланы Мухадин - Хажи дуа алдырды.
Андан сора Эльбрус элни мектебини таматасы, жыйылыуну элтген тиширыу башлады хапарны башлады...
Ол кюн ары Ташлы - Таланы сабийлери, Уллу Малкъарны сабийлери да келген эдиле. Ташлы-талачыла кёчюре келген сагъатны кёргюстюп, адамланы жилятырча чекге жетдирген эдиле. Малкъарлыла уа назму окъуулары бла, ол назмуланы,сёзлени жюреклери бла ётдюре билгенлери бла сейирсиндирдиле. Эки къызчыкъ а "Турнала" деген жырны бир аламат жырлагъан эдиле. алайда мени эсиме "халкъны игиси халкъны теренинден чыгъады" деген сёз тюшген эди. Кёп болсунла нарт миллетибизни айтхылыкъ жашлары,къызлары!
Андан сора сахнагъа Малкъарны биринчи мектебини таматасы Халимат Жекрияевна чыкъды, ол хар замандача бек ариу сёлешди, саугъала да алып келген эди. Биргесине журналист Мамайланы Али да сёлешди, ол кертиси бла бусагъатда жютю соруулагъа да жетген эди. Аны айтхан сёзлерине жамауат ыразылыгъын, тюз айтханына шагъатлыгъын къарс бла билдирди.
Эльбрусда жетинчи мартда къуру Къабарты-Малкъардан къонакъла тюйюл эдиле, Тюркден келген къарындашларыбызны да кёрдюк. Чыгъып сёлешгенлеринде, таулулукъ къанларында терен орналып эм тас болмай тургъанын толу ангыладыкъ. Бирликде тирлик деген нарт сёзню магъанасын да эсибизге энтда бир къаты тюшюрдюк.
Къоншуларыбыз-къабартылыла ол кюн бизге билеклик этдиле, малкъар миллетде-таулу миллетге кёп ариу, тыйыншлы сёз айтып, бизни къууанчыбыз -аланы къууанчлары, бизни жарсыуубуз-аланы жарсыулары болгъанын чертдиле.
Эльбрус районну таматасы Малкъарланы Аслан да сёлешди.
Бу уллу жыйылыуну кесекчигин юзюп къалай къояйым деп ансы, бу энди айтырымы айтмай да къояр эди...
Алайды да, сахнагъа Рахайланы Диана да чыкъгъан эди "Жангы терекле" деген, сюргюннге жораланнган назмусу бла.
Ахырында Курданланы Узеир - таулу миллетни "миллетим" деген жашларындан бири, Эльбрус элни башчысы, сахнагъа чыгъып, Къазахстаннга, Къыргъызстаннга иерге хазырлагъан къагъытларын окъутуп, жамауатны не дегенин сорду.
Ол къагъытда къазах эм къыргъыз халкълагъа малкъар миллет ыразылыкъ бергенин айта эди.
Жыйылгъанла барысы да къолларын кётюрюп, "АШЫРЫГЪЫЗ" дедиле.
Стендле да жайылып эдиле
Аны бла жыйылыу бошалды, келген къонакъланы барын да аш тапхалагъа чакъырдыла,сыйладыла.
Биз а, баргъаныбызча, маршруткабызгъа жыйылып, ызыбызгъа жолгъа тебиредик. Жауун да жауа, биз да келе, алты болургъа Эльбагъа жыйылдыкъ.