Elia
29.07.2010 16:45:46
[b:da309e9518][color=brown:da309e9518]Ах, ол мени бир сюе эди![/color:da309e9518]
[/b:da309e9518]
[b:da309e9518]
Ий, субхан Аллах, ол мени бир сюе эди! Ол меннге бир термиле эди. Былай кёзюме къараса, кёзлеринден тёгюлген нюр, "дюр" деб джаныб, шынкъартха бурулуб, мен да аны ортасына тюшюбмю къалама деб, алай болуучан эдим.
Ол кёзге кёрюннген зат болса, Минги Таудан мийик, Къара тенгизден кенг, джазгъы чууакъ кёкден терен, джер джюзюнден уллу бир зат болур эди. Аны кёз къарам, адам аякъ, адам ангы ёлчелеелмез эди.
Ах, ол бир сюе эди мени! Былай меннге къарагъанлай, сыфаты башха тюрлю бола эди. Бир тюрлю бир чырайлы, сюймекликча, чексиз ариу бола эди. Аны эси меннге кетген кёзюуде, къараб, къарамындан тоймаз эдинг, мен да, сейрсиниб, анга къараб туруучан эдим. Алтын нюр тёкген кёзле, асыл сёзлени шыбырдагъан эринле, къууанч сезим къанатлагъа ушатхан къашла кимни да ариу этмей къоярламы!
Ах, ол бир сюе биле эди мени! "Зайнеб!" деб атымы айтса, санларым къыйлыб, тобукъларым тутмаймы башладыла деб, аллай халгъа тюше эдим. "Зайнеб" десе, ауузунда тили, май болуб, эриб къалыргъамы башлады хадауусну деб, сагъайыучан эдим. Ах, "Зайнеб" деб, бош айтыбмы къоя эди! Атымы хар харифи бирер сейир магъана бере эди:
"Зауугъумса, ийнагъымса, насыбымса, эшит, бил", - дей эди атымы къайтара. Эшите эдим, алай а къулагъымдан джюрегиме тюшюре билелмей эдим. "Мукъладисча, кесинге тартаса", деучен эди. Ах, ол бир сёзле биле эди, анда бир кёзле бар эдиле!
Ах, ол эки кёзю! Ала кёзле тюл эдиле, сюймеклик ичлерине сыйынмагъан, тюбсюз кёлле эдиле. Кеси уа меннге: "Кёзлеринги теренине кёмюлюрюм келеди", - деучен эди. "Къараб тургъанлайыма, тансыгъымы алалмайма", - дей эди. Анда бир кёзле бар эдиле! Джай болуучанды аллай кёк: терен, чууакъ, къарасанг, къараб тоймагъан, узалсанг... Ах, узалыб а, къалай джетелген?!..
Ол да меннге джетелмей эди. Джюрегиме ётелмей эди.
Ах, ол мени бир сюе эди. "Сени кёзлеринг бла къарарым келеди дуниягъа" - дей эди. Сюйген джюреги сезмей эди ансы, мени кёзлерим ол сагъатда къарау сокъур эдиле. "Сени менден бир тахсанг барды" - дей эди ол меннге. "Тахсаны сезсенг, аны билиринг келеди", дей эди. Мени джюрегими бир тахсасы кёб сезим тенгизге ушата эди. Мени сабий джюрегими уа, дуниягъа кёзюн джангы ачхан кюнлюк гокка хансчыкъныча, сезимлери джарыкъ, оюмсуз, ингил эдиле. Тахсасы уа... Кеси кесин ангыламагъаны болур эди.
Ах, ол мени бир сюе эди... Къанатлы болуб учар эди, мен анга "хо" десем. Джер этегине ётер эди, "мени ары элт", десем. Сюйюмчю джулдузну келтирир эди, "аны меннге бер", десем. Чокъуракъ суу болуб тёгюлюр эди, "суусабма", десем. Эм насыблы болур эди, "сюеме, кел", десем.
Келирин ашыгъыб сакъласам да, келсе, келдинг, демей эдим, хаман да келиб турлукъду деб, акъылым алай эди...
Бир кюн а, келмеди да къалды. Экинчи, ючюнчю, тёртюнчю кюн да...келмеди. Сакъладым. Сакъладым. Сакъладым... Эки джыйырма джыл ётса да, ма бюгюн да сакълайма... Нек? Билмейме...
Ий, Аллах, сизге аны несин айтама?!
Хы. Сейирсиниб. Аны ол сюе билгенине сейирсиниб. Субхан аллах, ол мени бир сюйюу эте эди! Ма бюгюн да унуталмайма аны.[/b:da309e9518]
/Байрамукъланы Фатима/