А теперь слова колыбельных)) За-а-пе-вай!
Колыбельная №1 Зухра Кабардокова
Белляу, белляу, бала, сени бёлейим,
Балачыгъым, сенден алгъа ёлейим.
Белляу, белляу, белляу, белляу, бёлейим,
Санга игилик Аллахдан кёрейим.
Белляу, белляу, балачыкъны бёлейим,
Балачыкъны уллу болуб кёрейим.
Чаба-джорта келгин, бала, эшикден,
Сау къутулгъун, бала, сен бу бешикден.
Балачыгъым баллы хантла ашасын,
Балачыгъым ойнай-кюле джашасын.
Балачыгъым сау къутулсун бешикден,
Балачыгъым ойнаб кирсин эшикден.
Балачыкъны бешик бауу алтындан,
Балачыгъым, кетмем сени къатынгдан.
Арбазынгда алтын терек орналсын,
Баш булчугъу джулдузланы санасын.
Терегинги чапрагъындан бал тамсын,
Солугъан да акъгъан балдан джаласын.
Бешик бауунг сени алтын окъадан,
Барыб ичгин сууукъ сууну шоркъадан.
Балачыкъгъа узакъ ёмюр тилейим,
Тилегими кёзюм бла кёрейим.
Тауусулмаз малынг болсун, балачыкъ.
Сени ёлмез джанынг болсун, балачыкъ.
Къап-къарады балачыкъны кёзлери,
Джамагъатха джарар айтхан сёзлери.
Белляу, белляу балачыкъны бёлейим,
Балачыкъны уллу болуб кёрейим.
Колыбельная №2 поет Зухра Кабардокова
Белляу, белляу, белляу, белляу, бёлейим,
Балачыкъны уллу болуб кёрейим.
Белляу, белляу, белляу, белляу, бёлейим,
Насыбынгы, къууанчынгы кёрейим.
Белляу, белляу, белляу, белляу, бёлейим,
Балачыкъгъа узакъ ёмюр теджейим.
Белляу, белляу, белляу, белляу, бёлейим,
Тилегими кёзюм бла кёрейим.
Белляу, белляу, белляу, белляу, бёлейим,
Тенглеринден баш болсун, деб тилейим.
Белляу, белляу, белляу, белляу, бёлейим,
Эл сукъланыр джаш болсун, деб тилейим.
Колыбельная№3 поет Фатима Байчорова
Белляу, белляу, белляу, бёлейим,
Сени насыблы болуб а кёрейим.
Тенглеринги ичинде баш болгъун,
Анангы разы этген да джаш болгъун.
Сен харам ишге уа къошулма,
Аман этиб, адамладан уялма.
Аманлыкъдан, зордан сакъланнгын,
Сен джашауда халал къыйын ашагъын.
Белляу, белляу, белляу, бёлейим,
Балачыкъны уллу болуб кёрейим.
Белляу, белляу, белляу, бёлейим,
Насыбынгы, къууанчынгы кёрейим.
Белляу, белляу, белляу, бёлейим,
Балачыкъгъа узакъ ёмюр теджейим.
Белляу, белляу, белляу, бёлейим,
Тилегими кёзлерим бла кёрейим.
Белляу, белляу, белляу, бёлейим,
Белляу джашым, белляу джашым, бёлейим.
Колыбельная №4 поет Рузанна Чотчаева
Илляй, илляй, илляй, илляй джашыма,
Илляй, илляй, илляй, илляй, джашыма.
Мени джашым заманына сау джетсин.
Илляй, илляй, илляй, илляй, ол джетсин.
Бёлейим, сени мен бёлейим,
Бир насыблы бала болуб кёрейим.
Къаты бёленнген къолларынг ычхынсын,
Башынгдан бир иги къаргъа къычырсын.
Ойнаб келсин мени джашым эшикден,
Сау къутулсун мени джашым бешикден.
Колыбельная №5 поет Зухра Кабардокова
Бёлюляй, бёлюляй, сени бёлейим,
Сени хайырларынгы кёрюб ёлейим.
Бёлюляй, бёлюляй, белляхдан,
Уллу Аллах сакълагъа эди паллахдан.
Хата, бала, сеннге келмесин,
Этген умутуна душманынг джетмесин.
Ляу, ляу, ляу, ляу, ляйлясын,
Балачыгъым къууанч бла айлансын.
Бёлюляй, бёлюляй, сени бёлейим,
Сени къууанч толу юйде кёрейим.
Бёлюляй, бёлюляй, белляхдан,
Къыйынлыкъдан сакъласын Аллах, палахдан.
Хата, палах санга келмесин,
Этген умутуна душманынг джетмесин.
Ляу, ляу, ляу, ляу, ляйынга,
Чабыб чыгъыб айланнгынг сен джайынга.
Верные слова не изящны. Красивые слова не заслуживают доверия. Добрый не красноречив. Красноречивый не добр. Знающий не доказывает, доказывающий не знает. (с) Лао Цзы