Къарачайны къадау ташы. Аны юсюнден эшитмеген, билмеген къарачайлы неда малкъарлы болмаз. Кёрмегенледа бек аз болурла.
Эртделеден бери бу таш къарачай миллетни тарихинде, литературасында уллу орун алыб келгенди.
Айтылгъанга кёре, Къадау таш кёкден тюшгенди тау миллетге саугъагъа. Бизни къыйынлыкъладан сакъларыкъды -деб, бурунгула узакъ джерге тебреселе ташдан кесекчигин алыб, атланыб тургъандыла джолгъа дууа орнуна. Миллетни эсинде къалгъан хапарлагъа кёре къарачай миллетни бусагъатда джашагъан джерлерине келтирген Къарча бу ташны юсюнде олтуруб этгенди миллетге керекли баш оноуланы.
Арт джыллада ташны кёргенле бар эсегиз, билесиз аны тыш сыфаты иги болмагъанын, кимни къолу джетген эсе да аны сындырыргъа да кюрешгенди. Ол себебден, алай къалса, бир кесек замандан табмай къалыргъа да болурбуз ата-бабаларыбыздан келген ташны деб, аны тёгерегин ариу этгендиле, хар адам да сюйюб къарарча, джюреги къууанырча. Къарчагъа да эсгертме салгъандыла. Аны барында этген, миллетине джан аурутхан адам - Салпагъарланы Магомет-Аминди. Аны кючю бла, ноябрь айны 4-де Къадау ташны къатында уллу джыйылыу болду.