- Ишлегенде эринме, ишде чолакъ кёрюнме.
- Тилчи бир сагъатха айлыкъ хата этер.
- Ач – эснер, ат – кишнер.
- Джаз бир кюнню джатсанг, къыш талай кюнню абынырса.
- Джан саулукъ бермей, сан саулукъ бермезсе.
- Гырджын – тепсини тамадасы.
- Элге къуллукъ этмеген, элге ие болмаз.
- Байма, деб да, къууанма, джарлыма, деб да, джылама.
- Аллахха ийнаннган кишини, Аллах онгдурур ишин.
- Чоюнну башы ачыкъ болса, итге уят керекди.
- Аманны эки битли тону болур, бирин сеннге кийдирир, бирин кеси киер.
- Чакъырылгъанны аты, чакъырылмагъанны багъасы болур.
- Джырчы ёлсе, джыры къалыр.
- Ана къойну – балагъа джандет.
- Джиби бир къат джетмей эди да, эки къат тарта эди.
- Джангыз терек къынгыр ёсер.
- Адам боллукъ, атламындан белгили болур.
- Эте билген, этген этеди, эте билмеген, юретген этеди!
- Келинин тута билмеген, къул этер, къызын тута билмеген, тул этер.
- Узун джолну барсанг, бюгюн келирсе, къысха джолну барсанг, тамбла келирсе.
- Сабийликде юретмесенг, уллу болса – тюзелмез.
- Ёзденликни джайгъан – джокълукъ.
- Эл тойса, тоймагъан, эл къойса, къоймагъан.
- Аллахдан тилесенг, кёб тиле.
- Тёгюлген тюгел джыйылмайды.
- Джашынгы кесинг юретмесенг, джашау юретир.
- Чарсда алчыны эл кёреди.
- Чомартха Тейри да борчлуду.
- Чакъырылмагъан къонакъ – орунсуз.
- Эр абынмай, эл танымаз.
- Къызны минг тилер, бир алыр.
- Сёз садакъдан кючлюдю.
- Адамны бетине къарама, адетине къара.
- Къанны къан бла джуума, аманны аман бла къуума.
- Кёлю джокъну – джолу джокъ.
- Ойнай билмеген, уруб къачар.
- Зар адамны насыбы болмаз.
- Атадан ёксюз – бир ёксюз, анадан ёксюз – эки ёксюз.
- Сагъыш – къартлыкъгъа сюйюмчю.
- Юйлю уругъа ит чабмаз.
- Джангыз торгъай джырламаз.
- Келлик заман – къартлыкъ келтирир, кетген заман – джашлыкъ ёлтюрюр.
- Кёл – къызбай, къол – батыр.
- Кёбден умут этиб, аздан къуру къалма.
- Ётген ёмюр – акъгъан суу.
- Терек ауса, отунчу – кёб.
- Ойнай-ойнай кёз чыгъар.
- Къызбайны юйюне дери сюрсенг, батыр болур.
- Джюрекге ариу – кёзге да ариу.
- Кёб къычыргъандан – къоркъма, тынч олтургъандан – къоркъ.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72