- Азыгъы аз, алгъа къабар, аты аман, алгъа чабар.
- Тойгъан антын унутур.
- Ач бёрюге мекям джокъ.
- Айранын берсенг, челегин да къызгъанма.
- Ашатыргъа иш – ашхы, ишлетирге аш – ашхы.
- Ачлыкъ отха секиртир.
- Ургъан суудан башынгы сакъла.
- Алтыда кюлмеген, алтмышда кюлмез.
- Аш иеси бла татлыды.
- Арпа, будай – ащды, алтын, кюмюш а – ташды.
- Борчунг бар эсе, хурджунунга ойлаб узал.
- Байлыкъ тауусулур, билим тауусулмаз.
- Уллу къашыкъ эрин джыртар.
- Тюкюрюк баш джармаз, налат кёз чыгъармаз!
- Атынг аманнга чыкъгъандан эсе, джанынг тамагъынгдан чыкъсын.
- Шекер бла туз – бир болмаз, ушамагъан – юй болмаз.
- Кёпюр салгъан кеси ётер, уру къазгъан кеси кетер.
- Къобан да къуру да къобханлай турмайды, адам да къуру да патчахлай турмайды.
- Тил бла келеди джыр да.
- Юй ишлеген балта эшикде къалыр.
- Итли къонакъ джарашмаз.
- Ышармагъан – кюлмез, кюлмеген – къууанчны билмез.
- Биреуге кёлтюрген таягъынг, кесинги башынга урур.
- Сёз сёзню айтдырыр.
- Тёрдеги кюлсе, эшикдеги ышарыр.
- Дуния малгъа сатылма, кесингден телиге къатылма.
- Сыфатында болмагъаны, суратында болмаз.
- Сабийни джумушха джибер да, ызындан бар.
- Аууз сакълагъан – джан сакълар.
- Бюгюн дуния кибик, тамбла ахыратды.
- Сескекли кесин билдирир.
- Кюл тюбюндеги от кёрюнмейди.
- Эл ауузу – элия.
- Керилген да, ургъан кибикди.
- Нарт сёз – тилни бети.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Сагъыш – къартлыкъгъа сюйюмчю.
- Терслик кетер, тюзлюк джетер.
- «Ёгюз, джаргъа джууукъ барма, меннге джюк боллукъса», - дегенди эшек.
- Тура эдим джата, къайдан чыкъды хата?
- Байны къызы баймакъ болса да, юйде къалмаз!
- Акъыл аздырмаз, билим тоздурмаз.
- Алтыннга тот къонмаз.
- Адамны джюреги нени кёрюрге сюйсе, кёзю да аны кёрюрге ёч болады.
- Аллахха ийнаннган кишини, Аллах онгдурур ишин.
- Акъдан къара болмаз.
- Ёксюзню тилеги къабыл болур.
- Чабакъгъа акъыл, табагъа тюшсе келеди.
- Келинин тута билмеген, къул этер, къызын тута билмеген, тул этер.
- Сёз къанатсыз учар.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72