- Терек ауса, отунчу – кёб.
- Ишленмеген джаш – джюгенсиз ат, ишленмеген къыз – тузсуз хант.
- Чомарт бергенин айтмаз.
- Ашыкъгъанны этеги бутуна чырмалыр.
- Биреуню эскиси биреуге джангы болмайды.
- Джаш къарыу бла кючлю, къарт акъыл бла кючлю.
- Къыз чыгъаргъан – къызыл къымжа.
- Ачыу алгъа келсе, акъыл артха къалады.
- Биреуге аманлыкъны тилеме да, кесинге ашхылыкъны тиле.
- Экеу тутушса, биреу джыгъылыр.
- Чабар ат – джетген къыз.
- Кийиминг бла танылма, адамлыкъ бла таныл.
- Бёрю да ач къалмасын, эчки да ашалмасын.
- Ата – билек, ана – джюрек!
- Бети къызарыучу адамны, джюреги харам болмаз.
- Аманнга алтын чыдамаз.
- Чалманны аллы къалай башланса, арты да алай барады.
- Онгсузну – джакъла, тенгликни – сакъла.
- Таугъа чыгъаллыкъ эсенг, тюзде къалма.
- Ариуну – ауруу кёб.
- Ашыкъгъан cуу, тенгизге джетмез.
- Бал чибинни ургъаны – ачы, балы – татлы.
- Этек чакъмакълары баш джаргъан, сёлешген сёзлери таш джаргъан.
- Къан бла кирген, джан бла чыгъар.
- Бир онгсуз адам адет чыгъарды, деб эштирик тюлсе.
- Ашлыкъны арба юйге келтирир, чана базаргъа элтир.
- Атадан ёксюз – бир ёксюз, анадан ёксюз – эки ёксюз.
- Биреуге аманлыкъ этиб, кесинге игилик табмазса.
- Урама да – ёледи, сатама да – келеди.
- Эл тойса, тоймагъан, эл къойса, къоймагъан.
- Ишленмеклик адамлыкъды.
- Мураты болгъанны джюрек тебюую башхады.
- Ашхылыкъ джерде джатмайды, аманлыкъ суугъа батмайды.
- Асхат ашлыкъ сата, юйдегиси ачдан къата.
- Адеб джокъда, намыс джокъ.
- Кюл тюбюндеги от кёрюнмейди.
- Билеги кючлю, бирни джыгъар, билими кючлю, мингни джыгъар.
- Ашда уялгъан – мухар, ишде уялгъан – хомух.
- Иги бла джюрюсенг, джетерсе муратынга, аман бла джюрюсенг, къалырса уятха.
- Гыдай эчки суугъа къараб, мюйюзле кёрмесе, джашма алкъын, дегенди.
- Таш ата билмеген, башына урур.
- Биреу къой излей, биреу той излей.
- Къарнынг бла ёч алма.
- Тилсиз миллет джокъ болур.
- Арба аугъандан сора, джол кёргюзтюучю кёб болур.
- Термилгенинги табмазса, кюлгенинге тюберсе.
- Баргъанынга кёре болур келгенинг.
- Телиге от эт десенг, юйюнге от салыр.
- Таукел къуру къалмаз.
- Кимни – тили, тиши онглу, кимни – къолу, иши онглу.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72