- Огъурлуну сёзю – суу, огъурсузну сёзю – уу.
- Аманны къуугъан, аманлыкъ табар.
- Ата – баланы уясы.
- Кёлю джокъну – джолу джокъ.
- Бал – татлы, балдан да бала – татлы.
- Билеги кючлю, бирни джыгъар, билими кючлю, мингни джыгъар.
- Танг атмайма десе да, кюн къоярыкъ тюйюлдю.
- Къазанда болса, чолпугъа чыгъар.
- Ашлыкъны арба юйге келтирир, чана базаргъа элтир.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Керти сёзге тёре джокъ.
- Эм уллу байлыкъ – джан саулукъ.
- Мураты болгъанны джюрек тебюую башхады.
- Магъанасыз сёз – тауушсуз сыбызгъы.
- Адамны аты башхача, акъылы да башхады.
- Ашыкъгъанны этеги бутуна чырмалыр.
- Эки къатын алгъан – эки ташны ортасына башын салгъан.
- Къарт бла баш аша, джаш бла аякъ аша.
- Джюз элде джюз ёгюзюм болгъандан эсе, джюз джууугъум болсун.
- Аш кетер да бет къалыр.
- Къыз чыгъаргъан – къызыл къымжа.
- Башы ишлегенни, ауузу да ишлер.
- Чабакъгъа акъыл, табагъа тюшсе келеди.
- Дууулдаса – бал чибин, къонса – къара чибин.
- Таукел къуру къалмаз.
- Азыкълы ат арымаз, къатыны аман джарымаз.
- Керек ташны ауурлугъу джокъ.
- Джылыгъа джылан илешир.
- Ач къарным, тынч къулагъым.
- Оюмсуз атлагъан, аджалсыз ёлюр.
- Кёбден умут этиб, аздан къуру къалма.
- Къарнынг ауруса, ауузунгу тый
- Тешигини къатында, чычхан да батыр болур.
- Эки элинги тыйсанг, джети элде махталырса.
- Джерни букъусу кёкге къонмаз.
- Ышармагъан – кюлмез, кюлмеген – къууанчны билмез.
- Билими азны – ауузунда кирит.
- Ачлыкъ отха секиртир.
- Къыйынлы джети элни къайгъысын этер.
- Телиге акъыл салгъандан эсе, ёлгеннге джан салырса.
- Тойгъанлыкъ къойгъа джарашады.
- Ишни ахырын ойламай, аллын башлама.
- Ауузу бла къуш тута айланады.
- Ата – билек, ана – джюрек!
- Ишлемеген – тишлемез.
- Чомарт къолда мал къалмаз.
- Миллетни бойну – базыкъ, аны бла кюрешген – джазыкъ.
- Тил джюрекге джол ишлейди.
- Джарлы тюеге минсе да, ит къабар.
- Тамбла алтындан бюгюн багъыр ашхы.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72