- Сыфатында болмагъаны, суратында болмаз.
- Келгинчи, къонакъ уялыр, келгенден сора, къонакъбай уялыр.
- Къыз тиширыу кеси юйюнде да къонакъды.
- Бети бедерден, намыс сакълама.
- Керилген да, ургъан кибикди.
- Хансыз джомакъ болмаз.
- Юй ишлеген балта эшикде къалыр.
- Намыс сатылыб алынмайды.
- Рысхы – насыбха къор.
- Къызны минг тилер, бир алыр.
- Айыбны суу бла джууалмазса.
- Илму – джашауну джолу.
- Бал ашаргъа сюе эсенг, чибин ургъаннга тёз.
- Ачылгъан эт джабылыр, кёрген кёз унутмаз.
- Тенги кёбню джау алмаз, акъылы кёбню дау алмаз.
- Кёб ант этген, кёб ётюрюк айтыр.
- Аджалсыз ёлюм болмаз.
- Кирсизни – саны таза, халалны – къаны таза.
- Нёгер болсанг, тенг бол, тенг болмасанг, кенг бол.
- Телиге акъыл салгъандан эсе, ёлгеннге джан салырса.
- Келинин тута билмеген, къул этер, къызын тута билмеген, тул этер.
- Акъыллы эркиши атын махтар, акъылсыз эркиши къатынын махтар.
- Ойнаб айтсанг да, эслеб айт.
- Джахил болса анасы, не билликди баласы?
- Ариу – кёзге, акъыл – джюрекге.
- Къайгъы тюбю – тенгиз.
- Ат басханны джер билед.
- Кёз – сюйген джерде, къол – ауругъан джерде.
- От этилмеген джерден тютюн чыкъмайды.
- Ата Джуртуму башы болмасам да, босагъасында ташы болайым.
- Ариуну – ауруу кёб.
- Джиби бир къат джетмей эди да, эки къат тарта эди.
- Ишлерге уял да, ашаргъа табма.
- Чомартны къолун джокълукъ байлар.
- Агъач – джерни чырайы, кийим – эрни чырайы.
- Чомартха Тейри да борчлуду.
- Арба аугъандан сора, джол кёргюзтюучю кёб болур.
- Къууут – джелге, берне – бошха.
- Къартны бурнун сюрт да, оноугъа тут.
- Термилгенинги табмазса, кюлгенинге тюберсе.
- Тау башында, тау болмаз, джангыз терек, бау болмаз.
- Ауузу аманнга «иги», деме.
- Башсыз урчукъ тюзюне айланмаз.
- Джылкъыдан – ат чыгъар, тукъумдан – джаш чыгъар.
- Ариу сёз – къылычдан джити.
- Ишлегенде эринме, ишде чолакъ кёрюнме.
- Билим къая тешер.
- Айран тёгюлсе, джугъусу къалыр.
- Бичгенде ашыкъма, тикгенде ашыкъ.
- Экиндини кеч къылсанг, чабыб джетер ашхам.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72