- Алим болгъандан эсе, адам болгъан къыйынды.
- Къатын байлыкъны сюер, эр саулукъну сюер.
- Арпа, будай – ащды, алтын, кюмюш а – ташды.
- Келинин тута билмеген, къул этер, къызын тута билмеген, тул этер.
- Джолунга кёре – джюрюшюнг, джагъанга кёре – юлюшюнг.
- Иги – алгъыш этер, аман – къаргъыш этер.
- Къолу уллу – асыу, аягъы уллу – джарсыу.
- Уллу сёлешме да, уллу къаб.
- Ауругъанны сау билмез, ач къарынны токъ билмез.
- Джылар джаш, атасыны сакъалы бла ойнар.
- Адам къаллай бир ишленмесе, аллай бир кесин уллу кёреди.
- Уллу къазанда бишген эт, чий къалмаз.
- Ач, тоймам, дейди, тойгъан, ач болмам, дейди.
- Намысы болмагъанны, сыйы болмаз.
- Къайгъыны сюйген, къайгъы табар.
- Къарыусузгъа кюлме, онгсузгъа тийме.
- Нафысынгы айтханын этме, намысынгы айтханын эт.
- Ётюрюкню башын керти кесер.
- Келгинчи, къонакъ уялыр, келгенден сора, къонакъбай уялыр.
- «Ма», - дегенни билмесенг, «бер», - дегенни билмезсе.
- Арба аугъандан сора, джол кёргюзтюучю кёб болур.
- Джол бла сёзню къыйыры джокъ.
- Сыфатында болмагъаны, суратында болмаз.
- Сакъламагъан затынга джолукъсанг, не бек къууанаса, не бек ачыйса.
- Къарын къуру болса, джюрек уру болур.
- Ашхы адам – халкъ байлыгъы, ашхы джер – джашау байлыгъы.
- Джарлы тюеге минсе да, ит къабар.
- Чабакъсыз кёлге къармакъ салгъанлыкъгъа, чабакъ тутмазса.
- Ач къалгъандан, кеч къалгъан къолай.
- Миллетни бойну – базыкъ, аны бла кюрешген – джазыкъ.
- Сибиртки да сыйлы болду, кюрек да кюнлю болду.
- Айтылгъан сёз ызына къайтмаз.
- Къартха ушагъан джаш – акъыллы, джашха ушагъан къарт – тели.
- Аш кетер да бет къалыр.
- Эки къатын алгъан – эки ташны ортасына башын салгъан.
- Къызгъанчдан ычхыныр, мухардан ычхынмаз.
- Ёлмесенг да, къарт дамы болмазса?
- Ётюрюкден тюбю джокъ, кёлтюрюрге джиби джокъ.
- Кёз – сюйген джерде, къол – ауругъан джерде.
- Керек ташны ауурлугъу джокъ.
- Джигер – джаннга къыйынлыкъ.
- Джангыз торгъай джырламаз.
- Къарт айтханны этмеген, къартаймаз.
- Чомарт къонакъ юй иесин сыйлар.
- Байны къызы баймакъ болса да, юйде къалмаз!
- Хансыз джомакъ болмаз.
- Ашхы болсанг, атынг чыгъар, аман болсанг, джанынг чыгъар.
- Къонакъ аз олтурур, кёб сынар.
- Къобан да къуру да къобханлай турмайды, адам да къуру да патчахлай турмайды.
- Хар ишни да аллы къыйынды.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72