- Ёксюзню къалачы уллу кёрюнюр.
- Къаллай салам берсенг, аллай джууаб алырса.
- Мухардан ач ычхынмаз.
- Ариу сёз аурууунгу алыр.
- Хатерли къул болур.
- Тойгъа алгъа да барма, тойда артха да къалма.
- Кёрмегеннге кебек – танг, битмегеннге сакъал – танг.
- Джашынгы кесинг юретмесенг, джашау юретир.
- Тюзлюк шохлукъну бегитир.
- Ёлген ийнек сютлю болур.
- Айтылгъан сёз ызына къайтмаз.
- Кёз – сюйген джерде, къол – ауругъан джерде.
- Эки элинги тыйсанг, джети элде махталырса.
- Бек анасы джыламаз.
- Термилгенинги табмазса, кюлгенинге тюберсе.
- Бек ашыкъгъан меннге джетсин, дегенди аракъы.
- Ашхы тенг джолгъа салыр, аман тенг джолдан тайдырыр.
- Кёл – къызбай, къол – батыр.
- Эринчекни аурууу – кёб.
- Адамны джюреги нени кёрюрге сюйсе, кёзю да аны кёрюрге ёч болады.
- Ёгюзню мюйюзлери ауурлукъ этмейдиле.
- Иги адам абынса да, джангылмаз.
- Башынга джетмегенни сорма.
- Игиге айтсанг – билир, аманнга айтсанг – кюлюр.
- Ашаса, ашамаса да, бёрюню ауузу – къан.
- Уллу къазанда бишген эт, чий къалмаз.
- «Ма», - дегенни билмесенг, «бер», - дегенни билмезсе.
- Тау башында, тау болмаз, джангыз терек, бау болмаз.
- Чакъырылгъанны аты, чакъырылмагъанны багъасы болур.
- Къыз келсе, джумуш эте келеди, къатын келсе, ушакъ эте келеди.
- Эр сокъур болсун, къатын тилсиз болсун.
- Ана – юйню кюн джарыгъы.
- Акъыллы айтыр эди, акъылсыз къоймайды.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Ач – эснер, ат – кишнер.
- Адам сёзге тынгыла, акъыл сёзню ангыла.
- Къарнынг ауруса, ауузунгу тый
- Ата Джуртча джер болмаз, туугъан элча эл болмаз.
- Башы ишлегенни, ауузу да ишлер.
- Экеу тутушса, биреу джыгъылыр.
- Кеси юйюмде мен да ханма.
- Аз айтсам, кёб ангылагъыз.
- Хар сёзню орну барды.
- Кийимни бичсенг, кенг бич, тар этген къыйын тюлдю.
- Чомарт бергенин айтмаз.
- Адеб джокъда, намыс джокъ.
- Башда акъыл болмаса, эки аякъгъа кюч джетер.
- Терслик кетер, тюзлюк джетер.
- Босагъагъа джууукъ орун болса, ашыгъыб тёрге озма.
- Иги болса, тамадама – махтау, аман болса, меннге – айыб.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72