- Байлыкъдан саулукъ ашхыды.
- Уллу атлама – абынырса, уллу къабма – къарылырса.
- Аз сёлешген, къайгъысыз турур.
- Адамгъа аман кюн соруб келмейди.
- Биреуге аманлыкъ этиб, кесинге игилик табмазса.
- Этни да ашады, бетни да ашады.
- Акъыл бла адеб эгизледиле.
- Джарашыу сюйген – джалынчакъ.
- Окъугъанны бети джарыкъ.
- Ашхы атаны – джашы ашхы, ашхы ананы – къызы ашхы.
- Ачылгъан эт джабылыр, кёрген кёз унутмаз.
- Юйюнгден чыкъдынг – кюнюнгден чыкъдынг.
- Бойнуму джети джерден кессенг да, мен ол ишни этеллик тюлме.
- Къыз чыгъаргъан – къызыл къымжа.
- Кийимни бичсенг, кенг бич, тар этген къыйын тюлдю.
- Элни кючю – эмеген.
- Гыдай эчки суугъа къараб, мюйюзле кёрмесе, джашма алкъын, дегенди.
- Байдан умут эте, джарлыдан ёгюз багъасы къорады.
- Иги бла джюрюсенг, джетерсе муратынга, аман бла джюрюсенг, къалырса уятха.
- Бир абыннган – минг сюрюнюр.
- Акъыллы эркиши атын махтар, акъылсыз эркиши къатынын махтар.
- Джаралыны джастыгъында сау ёлюр.
- Ушамагъан – джукъмаз.
- Къартны бурнун сюрт да, оноугъа тут.
- Аш иеси бла татлыды.
- Джырчы ёлсе, джыры къалыр.
- Ашлыкъ – бюртюкден, джюн – тюкден.
- Джаз бир кюнню джатсанг, къыш талай кюнню абынырса.
- Ариу сёзде ауруу джокъ.
- Ишлемеген – тишлемез.
- Джаным-тиним – окъуу, билим.
- Къазанчы аман болса, къазаны къайнамаз.
- Къонакъ болсанг, ийнакъ бол.
- Ишлегенден, къарагъан уста.
- Онгсузну – джакъла, тенгликни – сакъла.
- Эри аманны, къатыны – аман.
- Иши джокъну, сыйы джокъ.
- Бек ашыкъгъан меннге джетсин, дегенди аракъы.
- Юй ишлеген балта эшикде къалыр.
- Кёб къычыргъандан – къоркъма, тынч олтургъандан – къоркъ.
- Махтаннган къыз, тойда джукълар.
- Ариу сёз – къылычдан джити.
- Айыбны суу бла джууалмазса.
- Келинни – келгинчи, бёркню кийгинчи кёр.
- Этек чакъмакълары баш джаргъан, сёлешген сёзлери таш джаргъан.
- Ёксюзню тилеги къабыл болур.
- Орну джокъну – сыйы джокъ.
- Юреннген ауруу къалмаз.
- Кийим тукъум сордурур.
- Эр сокъур болсун, къатын тилсиз болсун.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72