- Юйюнгден чыкъдынг – кюнюнгден чыкъдынг.
- От этилмеген джерден тютюн чыкъмайды.
- Иги – алгъыш этер, аман – къаргъыш этер.
- Джукъу тёшек сайламайды.
- Джарлыны эшигин махтагъан джабар.
- Чомарт къонакъ юй иесин сыйлар.
- Тура эдим джата, къайдан чыкъды хата?
- Хансыз джомакъ болмаз.
- Аз сёлешген, къайгъысыз турур.
- Этим кетсе да, сюегим къалыр.
- Къарнынг къанлынга кийирир.
- Тойну къарнашы – харс, джырны къарнашы – эжиу.
- Ханы къызы буюгъа-буюгъа киштик болду.
- Элни кючю – эмеген.
- Джетген къыз джерли эшекни танымаз.
- Айтылгъан сёз ызына къайтмаз.
- Къайгъыны сюйген, къайгъы табар.
- Мал ёлсе, сюек къалыр, адам ёлсе, иши къалыр.
- Термилгенинги табмазса, кюлгенинге тюберсе.
- Къолу уллу – асыу, аягъы уллу – джарсыу.
- Кирсизни – саны таза, халалны – къаны таза.
- Бети бедерден, намыс сакълама.
- Байны къызы баймакъ болса да, юйде къалмаз!
- Байлыкъдан саулукъ ашхыды.
- Айтхан сёзюне табылгъан.
- Ишин билген, аны сыйын чыгъарады.
- Юй ишлеген балта эшикде къалыр.
- Ойнай билмеген, уруб къачар.
- Тюзлюк шохлукъну бегитир.
- Адам туугъан джеринде, ит тойгъан джеринде.
- Аджашханны ызындагъы кёреди, джангылгъанны джанындагъы биледи.
- Душманны тышы – акъ, ичи – къара.
- Эр сокъур болсун, къатын тилсиз болсун.
- Телиге от эт десенг, юйюнге от салыр.
- Шапа кёб болса, аш татымсыз болур.
- Ёлмесенг да, къарт дамы болмазса?
- Кюл тюбюндеги от кёрюнмейди.
- Иги адамны бир сёзю эки болмаз.
- Мураты болгъанны джюрек тебюую башхады.
- Аууз сакълагъан – джан сакълар.
- Джашлыкъ этмеген, башлыкъ этмез.
- Къарт бла баш аша, джаш бла аякъ аша.
- Эл элде бирер малынг болгъандан эсе, бирер тенгинг болсун.
- Джылар джаш, атасыны сакъалы бла ойнар.
- Ишни аллы бла къууанма да, арты бла къууан.
- Джарлыны тону джаз битер.
- Миллетни бойну – базыкъ, аны бла кюрешген – джазыкъ.
- Кёзю сокъурдан – къоркъма, кёлю сокъурдан – къоркъ.
- Джумушакъ терекни къурт ашар.
- «Ма», - дегенни билмесенг, «бер», - дегенни билмезсе.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72