- Адеб базарда сатылмаз.
- Башсыз урчукъ тюзюне айланмаз.
- Керилген да, ургъан кибикди.
- Иги бла джюрюсенг, джетерсе муратынга, аман бла джюрюсенг, къалырса уятха.
- Алма терегинден кери кетмез.
- Сакъ юйюне сау барыр.
- Тилсиз миллет джокъ болур.
- Бастасын ашагъан, хантусун да ичер.
- Билмезни кёзю кёрмез, этмезни къулагъы эшитмез.
- Агъач халкъгъа алтынды, иссиликге салкъынды.
- Аурууну келиую тынч, кетиую – къыйын.
- Ишлерге уял да, ашаргъа табма.
- Зар адамны насыбы болмаз.
- Бир онгсуз адам адет чыгъарды, деб эштирик тюлсе.
- Байны къызы баймакъ болса да, юйде къалмаз!
- Азыкъ аз болса, эртде орун сал.
- Чакъырылгъанны аты, чакъырылмагъанны багъасы болур.
- Кесинг сынамагъан затны, адамгъа буюрма.
- Адам къыйынлыгъын кёлтюрюр, зауукълугъун кёлтюрмез.
- Танг атмайма десе да, кюн къоярыкъ тюйюлдю.
- Телини эшигин, махтау джабар.
- Уясында не кёрсе, учханында аны этер.
- Айтылгъан буйрукъ, сёгюлмез
- Айтхан – тынч, этген – къыйын.
- Ариу – кёзге, акъыл – джюрекге.
- Ашхы адам – халкъ байлыгъы, ашхы джер – джашау байлыгъы.
- Рысхы джалгъанды: келген да этер, кетген да этер.
- Билген билмегенни юретген адетди.
- Эр абынмай, эл танымаз.
- Къанны къан бла джуума, аманны аман бла къуума.
- Тойну къарнашы – харс, джырны къарнашы – эжиу.
- Уллу айтханны этмеген – уллаймаз.
- Айтылгъан сёз ызына къайтмаз.
- Аманнга алтын чыдамаз.
- Керти сёзге тёре джокъ.
- Биреуню къыйынлыгъы бла кесинге джол ишлеме.
- Итли къонакъ джарашмаз.
- Хата – гитчеден.
- Ётюрюкню башын керти кесер.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Рысхы – сют юсюнде кёмюк кибикди.
- Эр сокъур болсун, къатын тилсиз болсун.
- Ашатыргъа иш – ашхы, ишлетирге аш – ашхы.
- Эллинг бла джау болсанг да, юйюнг бла джау болма.
- Мени джылытмагъан кюн, меннге тиймесин!
- Айран ичген – къутулду, джугъусун джалагъан – тутулду.
- Джыланны къуйругъундан басарынг келсе, аны башы болгъанын унутма.
- Тёрени джагъы джокъ.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Чёбню кёлтюрсенг, тюбюнден сёз чыгъар.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72