Расширенный поиск
17 Мая  2024 года
Логин: Регистрация
Пароль: Забыли пароль?
  • Эр абынмай, эл танымаз.
  • Гыдай эчки суугъа къараб, мюйюзле кёрмесе, джашма алкъын, дегенди.
  • Сескекли кесин билдирир.
  • Танг атмайма десе да, кюн къоярыкъ тюйюлдю.
  • Къонакъ кёб келюучю юйню, къазаны отдан тюшмез.
  • Джарлыны тону джаз битер.
  • Арбаз къынгырды да, ийнек сауалмайма.
  • Терслик кетер, тюзлюк джетер.
  • Билген билмегенни юретген адетди.
  • Ёзденликни джайгъан – джокълукъ.
  • Адеб джокъда, намыс джокъ.
  • Джаш къарыу бла кючлю, къарт акъыл бла кючлю.
  • Таукел тауну аудурур.
  • Бюгюн дуния кибик, тамбла ахыратды.
  • Билмегенинги, билгеннге сор.
  • Акъыллы башны – тили къысха.
  • Джарлы тюеге минсе да, ит къабар.
  • Иги бла джюрюсенг, джетерсе муратынга, аман бла джюрюсенг, къалырса уятха.
  • Алма терегинден кери кетмез.
  • Ашхы адам – халкъ байлыгъы, ашхы джер – джашау байлыгъы.
  • Къарын къуру болса, джюрек уру болур.
  • Кийимни бичсенг, кенг бич, тар этген къыйын тюлдю.
  • Аз сёлешген, къайгъысыз турур.
  • Эркишиге тары кебек танг кёрюнюр.
  • Башланнган иш битер, къымылдагъан тиш тюшер.
  • Джюрек кёзден алгъа кёрюр.
  • Кёз – сюйген джерде, къол – ауругъан джерде.
  • Мал тутхан – май джалар.
  • Насыблыны баласы кюн кюнден да баш болур, насыбсызны баласы, кюн кюнден да джаш болур.
  • Накъырданы арты керти болур.
  • Аш иеси бла татлыды.
  • Сабийни джумушха джибер да, ызындан бар.
  • Тенги кёбню джау алмаз, акъылы кёбню дау алмаз.
  • Чомартны къолу берекет.
  • Адам къаллай бир ишленмесе, аллай бир кесин уллу кёреди.
  • Джангыз терек къынгыр ёсер.
  • Атынг аманнга чыкъгъандан эсе, джанынг тамагъынгдан чыкъсын.
  • Адам бла мюлк юлешмеген эсенг, ол адамны билиб бошагъанма, деб кесинги алдама.
  • Ачлыкъда тары гырджын халыуадан татлы.
  • Тешигини къатында, чычхан да батыр болур.
  • Ачыу алгъа келсе, акъыл артха къалады.
  • Итли къонакъ джарашмаз.
  • Биреуге кёлтюрген таягъынг, кесинги башынга урур.
  • Кюлме джашха – келир башха.
  • Адеби болмагъан къыз – тузсуз хант.
  • Чабакъ башындан чирийди.
  • Чабакъсыз кёлге къармакъ салгъанлыкъгъа, чабакъ тутмазса.
  • Ашлыкъны арба юйге келтирир, чана базаргъа элтир.
  • Тик ёргени, тик энгишгеси да болады.
  • Тели турса – той бузар.

Барысыны да бир терсликлери болгъанды - миллетлери!

07.03.2024 0 1184  Тикаланы Ф.
Миллетлеге кёре политика репрессияла бардырыу совет къыралда Уллу Ата журт урушха дери башланнганды. Биринчилени санында корейлиле бла поляклыла, аланы ызындан немислиле бла финнле кёчюрюлгендиле зор бла. Сёзге, 1941-1942 жыллада битеу да бирге 1,2 миллион немесли кёчюрюлгендиле эмда Поволжьеде халкъны  автономиясы жокъ этилгенди.

Ызы бла кёчгюнчюлюкню ачылыгъын кавказ халкъла сынагъандыла. 1943 жылда къарачайлыла бла къалмукълула, 1944 жылда февральда чеченлиле бла ингушлула тас этгендиле ата журтларын. «Чечевица» операциягъа Берия Грозныйге келип, кеси башчылыкъ этгенин жазадыла тарыхчыла.

Ол кюнледе Берияны атына «Къабарты-Малкъарны таулула жашагъан районларыны болуму» справка хазыр этиледи. Анда таулуланы саныны, эллени, жерини кенглигини, малланы, бахчаланы, биченликлени, агъачланы, тауланы, башхача айтханда Малкъарны экономика эм демография болумларыны юслеринден толу шартла жазылгъандыла.

Справканы ахырында быллай сёзле бардыла: «…таулуланы КъМАССР-ден тышына кёчюрюуню юсюнден сорууну тамамларгъа керекди».

Аны окъуп, Берия 24 февральда Сталиннге миллетни аманлап телеграмма жазады. Ахырында уа чеченлиле бла ингушлула кёчюрюлгенден сора эркин болгъан аскерлени таулу халкъны Шимал Кавказдан жокъ этиуде хайырланыргъа боллугъун билдиреди. «…алай бла операцияны быйыл 15-20 мартха дери, терекледе чапыракъла ёсгюнчю бошаргъа керекди» деп жазады ол документни ахырында.

1944 жылда 26 февральда Нарком «Къабарты-Малкъар АССР-ден таулу халкъны кёчюрюуню юсюнден» буйрукъну къабыл кёреди. Алай бла таулуланы туугъан журтларындан жокъ этиу жумушлагъа 21 минг аскерчи къатышадыла. Аланы асламы къарачайлыланы, къалмукъланы, чеченлилени, ингушлуланы кёчюрюуге къатышып, къужур сынау жыйгъандыла.

Киши жерге миллет саулай ашырылгъанды: граждан урушха къатышханла, Уллу Ата журт урушда душманнга къажау сермешледе къан тёкген аскерчилени жууукълары, партия къуллукъчула, депутатла… Аланы барысыны да бир терсликлери болгъанды – миллетлери!

1944 жылны 8 мартыны эрттенлиги битеу таулу юйюрледе бирча башланнганды  эшиклени ачы къагъылып, аскерчиле: «Жыйылыгъыз!  Кёчюрюлген этесиз!», – деген къычырыкъла бла киргендиле юйлеге. Хапчукланы жыяргъа жаланда 30 минут берилгенди. Заман озгъанлай, адамланы орамгъа къыстагъандыла.

Бу заманда юйлеринде болмагъанлагъа уа бютюнда къыйын тюшгенди. Ала артда юйюрлерин жылла бла излегендиле, тапмай, кеслери  жангызлай ауушханла къаллай бир болурла…

Алай бла Орта Азиягъа бла Къазахстаннга 37,7 минг таулу кёчюрюлгенди: асламы тиширыула, сабийле, акъсакъалла. Ала барысы да 14 эшелоннга сыйыннгандыла – малла жюрютюлген, жугъу да болмагъан вагонлагъа.

1944 жылда 8 апрельде СССР-ни Баш Советини Президиумуну «Къабарты-Малкъар АССР-де жашагъан таулуланы кёчюрюуню эм Къабарты-Малкъар АССР-ни Къабарты АССР-ге алышыуну юсюнден» Указы чыкъгъанды.

Таулу халкъ кёчюрюлгени, аны къыраллыгъы сыйырылгъаны бла бирге  Элбрус эмда аны тийреси Грузиягъа берилгенди. Дагъыда башха административ тюрлениуле бардырылып, Черек эм Холам-Бызынгы районла кетерилгендиле. Бир-бир эллени атлары да тюрлендирилгенди, сёзге, Яникой  Ново-Каменка, Къашхатау – Советский, Хасания – Пригорный, Лашкута  Заречный, Былым  Угольный болгъандыла. 

Тарыхчыла жазгъанларыча, кавказлы халкъла зор бла кёчюрюлгенден сора 35 минг квадрат метр жер эркин этилгенди – ол а Швейцария тенглиди!

(Нет голосов)

  • Нравится

Комментариев нет