Ас салам алейкум уа-рахматуЛлахи уа баракятуху, багъалы къарындашларым, эгечлерим.
Бизни джангы къуралгъан организациябызны юсюнден айтыргъа излейме. Къарачай - Малкъар Миллетни Дуния Ассамблеясы (Всемирная Ассамблея Карачаево-Балкарского Народа - ВАКБН)
Ассамблеяны, миллетибизни джер джерледе, къыраллада джашагъан адамларыбыз къурагъандыла.
Миллетибизни тилин, маданьятын, кесилигин сакъларгъа, бирлешиб, бирге къарыу этерге деб, ол хыйсабдан къуралгъанды.
Къарачай-Малкъар миллет не заманда да кесини адамлыгъы бла белгили болгъанды.
Таматагъа намыс этген, тышырыуну намысын кётюрген, ётгюрлюк, къонакбайлыкъ, намыслылыкъ - бизни ата бабаларыбызны не заманда да халиси болгъанды.
Къарт аталарыбыз, аналарыбыз кеси къыйынлары бла джашагъандыла.
Джал барыб джалынчакъ болгъан, эринчеклик, кесин джалчыталмагъан, джашау къыйынлыкъгъа тарыгъыу, хоншу бла келишелмеген, юй тасханы джайгъан - уллу айыбха, бедишликге саналгъанды.
Къарачай-Малкъар миллетни ёзден адети, Ислам дин келгенден сора уа иманлары, миллетни джашау тутуругъу болгъанды.
Ол барысы да къаныбыз бла, ана сютюбюз бла синген затла, ТАУЛУ атны сыфаты болгъанды.
Кеб адамыбыз ачыгъанды НКВД ны къолундан, урушда, андан сора кечгюнчюлюкде кёб адамыбыз ёлгенди.(АЛЛАХ РАХМАТ ЕТСИН)
Болса да, къан бла кирген, джан бла чыгъады!!!
Бусагъатда тёлюню да барды ол къанында!!!
Джарсыугъа, кёбледе джукълагъан халда.
Ма бусагъатда ол затланы, ичибизде уятыргъа заман джетгенди!!! Кесибизни ким болгъаныбызны сезерге заман джетгенди. Соруу соругъуз кесигизге: Не ючюн, эм да къалай джашайбыз? Къачаннга дери бир бирге сансызлыкъ этерикбиз?
Ким эсе да, къайдан эсе да келиб, миллетни бирге джыярыкъды, сабийлерибизни тилибизге юйретирикди, джашау турмушубузну айнытырыкъды де ми сакълайбыз? Не да ол келиб жашларыбызны ишлергеми юйретирикди, ичги бла тютюнню сюрмегенлей???
Не да келиб, бизни къызланы адети бла кийинирге, кеслерин адепли джюрютюргеми юйретирикди???
Къачан келликди ол адам???
Джууабы шартды, - БИР ЗАМАНДА ДА УГЪАЙ!!!!
Биз кесибизни къолгъа алмасакъ, 20-30 джылдан сабийлерибиз тилни унутурукъдула, адетибизни тас этерикдиле, миллетни аты тас боллукъду.
Даш адамла юйленмей заман созуп турсала уа, 20-30 жылдан сабий ёсдюрюрге адам болмай къаллыкъды.
Ма ол затла ючюн къуралгъанды бу Ассамблея.
Тилибизни, адетибизни, миллетибизни иги шартларын джангыртыб джашнатыр ючюн. Абызыраб, къурушуб турмай, бир бирибиз бла келишалмай турмаз ючюн. Кёкден джулдуз сакълаб турмай, заманында джашланы юйлендириб, къызланы эрге берирге керекбиз. Юйде таш тюшгенлей тюшюб турмай, ишлерге- къуру кесине ишлегенден башха да миллетге джараргъа!!!
Таулу эр кишини, таулу тышырыуну бурунгу сыйын намысын къайтарыргъа керекбиз!!!
Хазыр социальный проектле бардыла. Экономика проектле да бардыла. Бусагъатда закий адамларыбыз, миллетни джашау турмушун айнытыууну юсю бла иш бардырадыла, ызыбыздан келген сабийлени келир джашауларыны сагъышын эте. Келлик телю, Къарачай - Малкъар миллетни адамы болгъанына ёхтемленир ючюн.
Биз не заманда да хазырбыз ушакъгъа. Кеси оюмун айтыргъа излеген, миллетни айнытыр амал билген, иш джумуш этерге излегеннге тынгыларгъа разыбыз.
Ол бизни къолубуздан келликди!
Аны БУСАГЪАТДА этерге керекбиз, артда къачан эсе да деб турмай. Ансада кёб джукълагъанбыз... Хар ким кесинден башласын. Эриниб турмай, туруб ишин этерге!
БИЗ ЭТМЕСЕК КИМ ЭТЕРИКДИ???!!!!
Ас-саламу алейкум, уа-рахматуЛлахи уа-баракатуху!
Аллах болушсун ишибизге!
______________________
As salam aleykum ua-rahmatuLlahi ua barakâtuhu, bagalı karındaşlarım, egeçlerim.
Bizni cangı kuralgan organizasiyabıznı üsünden aytırga izleyme. Karaçay - Malkar Milletni Duniya Assambleyası (Vsemirnaya Assambleya Karaçayevo-Balkarskogo Naroda - VAKBN)
Assambleyanı, milletibizni cer cerlede, krallada caşagan adamlarıbız kuragandıla.
Milletibizni tilin, madanâtın, kesiligin saklarga, birleşib, birge karuv eterge deb, ol hıysabdan kuralgandı.
Karaçay-Malkar millet ne zamanda da kesini adamlıgı bla belgili bolgandı.
Tamataga namıs etgen, tışırıunu namısın kötürgen, ötgürlük, konakbaylık, namıslılık - bizni ata babalarıbıznı ne zamanda da halisi bolgandı.
Kart atalarıbız, analarıbız kesi kıyınları bla caşagandıla.
Cal barıb calınçak bolgan, erinçeklik, kesin calçıtalmagan, caşau kıyınlıkga tarıgıu, honşu bla kelişelmegen, üy tashanı caygan - ullu ayıbha, bedişlikge sanalgandı.
Karaçay-Malkar milletni özden adeti, İslam din kelgenden sora ua imanları, milletni caşau tuturugu bolgandı.
Ol barısı da kanıbız bla, ana sütübüz bla singen zatla, TAULU atnı sıfatı bolgandı.
Keb adamıbız açıgandı NKVD nı kolundan, uruşda, andan sora keçgünçülükde köb adamıbız ölgendi.(ALLAH RAHMAT ETSİN)
Bolsa da, kan bla kirgen, can bla çıgadı!!!
Busagatda tölünü da bardı ol kanında!!!
Carsıuga, köblede cuklagan halda.
Ma busagatda ol zatlanı, içibizde uyatırga zaman cetgendi!!! Kesibizni kim bolganıbıznı sezerge zaman cetgendi. Soruu soruguz kesigizge: Ne üçün, em da kalay caşaybız? Kaçannga deri bir birge sansızlık eterikbiz?
Kim ese da, kaydan ese da kelib, milletni birge cıyarıkdı, sabiyleribizni tilibizge üyretirikdi, caşau turmuşubuznu aynıtırıkdı de mi saklaybız? Ne da ol kelib jaşlarıbıznı işlergemi üyretirikdi, içgi bla tütünnü sürmegenley???
Ne da kelib, bizni kızlanı adeti bla kiyinirge, keslerin adepli cürütürgemi üyretirikdi???
Kaçan kellikdi ol adam???
Cuuabı şartdı, - BİR ZAMANDA DA UGAY!!!!
Biz kesibizni kolga almasak, 20-30 cıldan sabiyleribiz tilni unuturukdula, adetibizni tas eterikdile, milletni atı tas bollukdu.
Daş adamla üylenmey zaman sozup tursala ua, 20-30 jıldan sabiy ösdürürge adam bolmay kallıkdı.
Ma ol zatla üçün kuralgandı bu Assambleya.
Tilibizni, adetibizni, milletibizni igi şartların cangırtıb caşnatır üçün. Abızırab, kuruşub turmay, bir biribiz bla kelişalmay turmaz üçün. Kökden culduz saklab turmay, zamanında caşlanı üylendirib, kızlanı erge berirge kerekbiz. Üyde taş tüşgenley tüşüb turmay, işlerge- kuru kesine işlegenden başha da milletge cararga!!!
Taulu er kişini, taulu tışırıunu burungu sıyın namısın kaytarırga kerekbiz!!!
Hazır sosialnıy proyektle bardıla. Ekonomika proyektle da bardıla. Busagatda zakiy adamlarıbız, milletni caşau turmuşun aynıtıuunu üsü bla iş bardıradıla, ızıbızdan kelgen sabiyleni kelir caşaularını sagışın ete. Kellik telü, Karaçay - Malkar milletni adamı bolganına öhtemlenir üçün.
Biz ne zamanda da hazırbız uşakga. Kesi oyumun aytırga izlegen, milletni aynıtır amal bilgen, iş cumuş eterge izlegennge tıngılarga razıbız.
Ol bizni kolubuzdan kellikdi!
Anı BUSAGATDA eterge kerekbiz, artda kaçan ese da deb turmay. Ansada köb cuklaganbız... Har kim kesinden başlasın. Erinib turmay, turub işin eterge!
BİZ ETMESEK KİM ETERİKDİ???!!!!
As-salamu aleykum, ua-rahmatuLlahi ua-barakatuhu!
Allah boluşsun işibizge!