Ана тилде джазылгъан назумла...

Не эсе да мен сени
Аямайма, джан.
Джюрютесе сен мени,
Игиге алджан.

Узалыргъа сюеди
Сеннге хар джетген.
Зарлыкъ кючлеб, кюеди
Сен эркелетген.

Сени мараб джюрюйдю
Ёмюрю ёлюм.
Сенден онглу джукъ тюлдю
Кёклюдю кёлюм.

Сени тарт-соз этерге
Барды болгъан ёч.
Джол чыкъса уа кетерге,
Сен ашхыгъа кёч.
Сени сатыб алыргъа
Джетмез бар хыйсаб.
Сеннге къайгъы салыргъа
Бек сюед азаб.

Магъанангы билмейин
Джашагъанем мен.
Къалай этгин сюймейин
Талай тюлсе сен.

(Батчаланы Башир)

***
Иги айтхандан тынчды аман айтхан,
тиширыугъа кёп аман сёз айтылды,
аны азатлыгъы кёп тюшдю отха,
жюреги да балчыкъгъа кёп атылды.

Аны жюрегин балчыкъдан поэтле
чыгъарып, жулдузлагъа жетдирдиле,
«Къоркъма, ариу, юре турсунла итле!» -
деп, тиширыугъа кёп махтау бердиле.

Ала аны айгъа, жулдузгъа, кюннге
тенг этип, айтдыла алтын сёзлерин,
ушатдыла жазгъа, къууанчха, гюлге,
ушатдыла жулдузлагъа кёзлерин.

Ала тюз этдиле, тиширыу, сени
бар сыйлы затлагъа тенг этгенлерин,
сабанчыны, сюрюучюню, Гётени
жарыкъ этгенсе жашагъан кюнлерин.

Тиширыу, ким душман болса да санга,
поэтле шуёх болгъанлай къалдыла,
санга алтын сыбызгъыларын согъа,
сени ёкюлюнг, жырчынг да болдула.

Ала санга къаллай жырла этдиле!
Жулдузладан эсе жарыкъ - ол жырла.
Ол жырла бар кёпюрледен ётдюле,
сыртладан аугъан кибик азат журла.


Къули Къайсын
1975

*****

Мени онгсуз кюнлеримде
Чакъырылмагъанлай джетген,
Мен ётерик кёчюулеге
Кёкюрегин кёпюр этген.
Ёз кёзлери бла Малкъарны
Манга джандетча кёргюзген,
Ёз джюреги бла да Аны,
Кеси сюйгенча сюйдюртген,
Башы акъылдан толгъан,
Иннети таза болгъан,
Тутушууда уста эрге,
Керти фахмулу поэтге
Додуланы Аскерге атайма.

Джюрегинде пелиуанлыкъ джашагъан,
Ариулугъу сюймекликге ушагъан,
Тау намысы ушаб тауда акъ къаргъа...
Джаным къурман болсун Джуртум Малкъаргъа!

Ойрасы:
Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Зар кёз тие кёк суууна, ташына,
Ариулугъу душман бола башына,
Таш башында амал табхан джашаргъа,
Джаным къурман болсун таджал Малкъаргъа!

Ойрасы.

Тешдиртмеген тинин зорлукъ садакъгъа,
Сюргюнде да тилемеген садакъа,
Дерт тутмагъан Аллах берген къадаргъа,
Джаным къурман болсун шыйых Малкъаргъа!

Ойрасы.

Джаным саудан ачхан джандет эшигим,
Ёлсем, рахат джукълар топуракъ бешигим,
Ата Джуртум, Ана Сютюм, Къадарым —
Джаным къурман болсун санга, Малкъарым!

Ойрасы.

Ёзден Альберт
1995 дж.

( «Чолпан» китабындан )

КЪАРАЧАЙ

Игинге джюрекден къууана,
Булутдан чыкъгъан кюнча, джашнай,
Мен джырлайма, санга ийнана,
Тиними Меккясы — Къарачай!

Аманынг болгъанда къыйнала,
КЮЧЮКНЮ макъамын мурулдай,
Мен джашайма санга ийнана,
Насыбсыз насыбым — Къарачай!

Башха болмай, джюрек джюрюшюм
Къагъытха тюшгеннге ушагъан
Тауларым — Аллахдан юлюшюм! —
Дей, насыбды меннге джашагъан.

Тынгылайма джарыкъ мыдахлыкъ
Джырына къошулгъан Къобаннга.
Кёрюмю къырдышын сыларыкъ
Аязынг да къууанчды манга!

Болмай тот хар чалкъынг, орагъынг
Чалсынла бойсуна заманнга!
Санларым къошуллукъ топурагъынг
Алтындан багъалыды манга!

«Хасаука» бла «Умар» джырларынг,
Джазылгъанча къараб Къур’аннга,
Кёрню кёрмесин джыр бурагъынг,
Чырт бойсунмасын ол заманнга!

Джюрегинг къууанчдан джырласын,
Джылагъан да керек болгъанда,
Чайыры асламдан джыласын
Тамызыкъ чырагъынг тыбырда!

Болалсам да уста джюрютген
Илкерге учарыкъ кемени,
Хунангы тешигин бегитген
Мен бармакъ ташчыгъынгма сени!

Ёзден Альберт
1991 дж.

( «Чолпан» )

***
Сюйдюм сени насыплы этерге,
Аны кесиме къууанчха тергеп.
Мен санга не айтайым, не дейим?
Сени насыплы къалай этейим? –

Сыртладан аууп кетген жауунлай,
Кетдиле мен жаш, мен кючлю жылла!..
О, санга не айтайым, не дейим?
Сени насыплы къалай этейим?..

Къули Къайсын

Bilal LAYPAN

ТИЛЕГИМ

1
Тилейме Аллахдан:
имандан, акъдан эмда джуртдан
айырылмаз насыб бер бизге

2
Сакъла деб тилейме Аллахдан
аллай дуния малдан, кёзбаудан, зулмудан -
халкъны чыгъарлыкъ, айырлыкъ
дининден, тилинден, джуртундан.

3
Джети къат Кёкню башындан келген
хакълыгъы, акълыгъы Сёзню...
Кесинг берген диннге, тилге, джуртха,
я Аллах, тыйыншлы эт бизни.

3
Эм уллу тилегим а:
сауубуз дуниядан,
ёлгенибиз ахыратдан
къачаргъа излер къыйынлыкъдан,
Я Аллах, сен сакъла бизни.

Поэзия,
Джашайса хайырынг джугъа,
Билмей джашыртын къаба, не бугъа.
Тураса кёзлеча, кёзлеуча ачыкъ,
Къабланама сеннге джюрегим ачыб,
Джюрегими да ачыб.

Лайпанланы Билал

ТЫНГЫСЫЗЛЫКЪ

Ёлген — айып тюйюлдю, билесе,
Адамлыкъдан чыгъыуду айып.
Манга жулдузла жырын бергенсе,
Санга тынгысыз — кюнюм, айым.

Кюнюм, айым батып кетселе да,
Мени къучакъласа да къабыр,
Жууукъларым маулют этселе да,
Тынгысызлыкъ биргеме къалыр.

Мен жокъда, ингирде, эрттендеми
Санга жолугъурла адамла?
Ахшыла болушлукъ этерлеми,
Басынчакъларламы аманла?

Тынгысызлыкъны жели селеймей,
Къарангылай турлукъду кёрюм.
Зурнук — жазныча, сени сюйгенме.
Таланмасын, сынмасын кёлюнг!

Сен ышарырса, къаш да тюерсе
Къадарынг буюргъан жолунгда,
Къыйналлыкъса — таш, темир тюйюлсе.
Жибириксе къарда, жауунда.

Не медет, къар, жауун жибитсе да,
Жамычы алып, чапмазма мен.
Бек ётлюле, уллу жигитле да
Къутулалмагъандыла кёрден.

Тюнюм, тюшюм да кесингсе дейме.
Мени къучакъласа да къабыр,
Санга тынгысызлыгъым, селеймей,
Ёмюрледе биргеме къалыр.

Ёлген — айып тюйюлдю, билесе,
Сыйсыз ёлюп кетиудю айып.
Манга кырдыкла жырын бергенсе,
Санга тынгысыз — кюнюм, айым.

Мокъа Магомед
1971