"АКЪТАМАКЪ"

ЛИТЕРАТУРНО- ПОЭТИЧЕСКОЕ КАФЕ

(виртуальное)


" Назму деген накъырда тюлдю,
Джюрекге эшик ачады"

Джырчы Сымайыл.

Хош келигиз ,багъалы джазыучу джаш тёлю!

Форумда назму, хапар джаза билгенле, тилейбиз, былайда салыгъыз джазгъаныгъызны.

Джазыучуларыбыз, поэтлерибиз сизге болушурукъдула,окъуучула сюйюб окъурукъбуз,сизни бла ушакъ эте ,тил-тин байлыгъыбызны ёсдюрлюкбиз.

Ас-салам алейкум, Джамагъат!)
Кергелен, айтылгъан бары да тюз.. Былайда сагъышларыбызны эркин ачыкъларча мадар болгъанына- бек сау болугъуз
Амий, бек аламат макъам бла джазгъанса, МашаАллах.) Къарамай джырлай бер

Америкадан эгечибиз Къочхарланы Леман чакъырыу халда аламат макале джазгъанды, сау болсун. Тинибек кирилл харифлеге бургъанды аны, мен да, къууаныб, былайгъа да салама.

ЛЕМАН Ж. КОЧ, АБШ ( USA)
https://www.facebook.com/leman.koc.10


АНА ТИЛИБИЗГЕ САКЪ БОЛАЙЫКЪ

Тюзюн айтырыкъ болсам, адамланы кеслери тюз къарачайлы бола тургъанлай, былайда джартысы тау тилде, джартысы тюркча джазгъанларын кёрюб къыйналама. Хаман барыб, ол сёзчюклени тюзетирге излейме... Айхай, джангылычларын айтсанг - адамла онгсунмайдыла. Некди алай, билмейме. Юреннгенден уллу игилик къайда.

Биз бир-бирибизни тюзете бармасакъ, тюзлюкню къайдан табарыкъбыз? Шо, бир айтыгъыз.

Мен Элбрусоид'ге кириб, Кавказдан джазгъанланы да окъуйма. Алайда да бизнича эте турадыла. Тюз тау тилде джазгъанларын ангылайма, сёзню ортасында орусча къатышдырсала, энди не джаздыла экен деб, сагъышха кетеме.
Бизни джазгъанларыбыз да алагъа алай кёрюне болур.

Адам кеси тилинден башха, 1-2 тилге юренеди. Бусагъатда джаш тёлю(йени несил) тиллеге юренирге ёчдю. Юренедиле. Бек иги этедиле. Ол бу заманны дуниясында бек керекли ишди.
Да ол тиллеге юреннген, кесини ана тилин нек кенгнге тюртеди? Мен аны ангылаялмайма.

Мен былайда(США) адамы талай тилде сёлешген бир юйде джашайма. Баш къатда Хиндистанлы, сол джанымда хоншум Македонялыла, онг джанымдагъы - Корейлиле, туурамда - Итальялы... Былайда хар ким ингилизча сёлешгенликге, не япон японлугъундан, не испанлы испанлыгъындан ... къайдам, ол бары тюрлю-тюрлю миллетле ана тиллеринден да, тутхан динлеринден да кетиб къалмайдыла. Бир джерге келселе, бары да ёз тиллеринде сёлешедиле.
Кесини тилинде да, башха тилледе да сёлеше билген - ол адамгъа эм уллу байлыкъ тюлмюдю?

Мен тюнене Кайсын Кулиев'ни бир назмусун Тюрк тилге кёчюрдюм. ( Назмуну бек къыйын ауруб джатхан сагъатында къызына джазгъанды. Назмуну аты: ЖАННА'гъа ...) Андан тёрт тизгинни юлгюге келтиреме:

Санга насып бералмай къалгъан
эсем да, халаллыкъны бердим.
Кимди толусунлай билалгъан
насып не болгъанын ёмюрде?

Sana nasip veremedim
İse de, helallığı verdim
Kimdir ki, tümüyle çözebilen
Nasibin ne olduğunu yaşamda?

Сана насип веремедим
Исе де, хелаллыгьы вердим
Кимдир ки, тюмюйле чёзебилен
Насибин не олдугьуну яшамда?

Энди Кайсын Кулиев'ни назмусунда джазылгъан: '' Санга насып бералмай къалгъан / Эсем да, халаллыкъны бердим '' деген тизгинлени тюрк тилге кёчюргенимде, магъанасы алай чыкъмагъанын эследигизми? Мен кесим эследим...

Андагъы терен магъананы Тюркие'деги тюркле да алай теренинден ангылаб къоялмазла. Ингилизчеге кёчюрюб джазсанг, Америкалы бир адам да аны Къайсын салгъан магъанада ангыларыкъ тюлдю...Нечик десегиз, ала ючюн насыб деген башха тюрлюдю. Мени таулу халкъымы НАСЫБЫ бла аланы насыблары бир тюлдю.

Сёзню былай нек создум? Къайгым къуру ТИЛ тюлдю мени.
Ким къайсы тил бла сёлеше эсе, ол - башха миллетни къуру тилине тюл, адетине да, намысына да кёчюб башлайды. Ол алайды. Керти къайгъым олду мени.

Ол миллетча кийинирге да, ол миллетча тебсерге да, джырларгъа да, кесин алай джюрютюрге да тюзелиб башлайды. Алай бола баргъанын кеси эслерик да тюлдю. ''Хо, хо.. къалай болса да болур, къайгъырмаз, аймысына'' дегенни айтыб, не затны да кеси бетине джарашдырыб барлыкъды.
Арталасы не боллукъду? ... Къарачай деген миллет къаллыкъ тюлдю.
"Къалмасын, биз глобал тюшюнебиз'',- дегенле бар эселе, алагъа джол бошду. Барсынла къайры сюйселе да.

Мен да джаш заманларымда алай тюшюне эдим. Адам, игини да, аманны да кёре, джашай барса, артда кеси ёзюне къайтыб келеди.
Алгъасында рокк, джаз музыкагъа тынгылаучу адам, къайдан эсе да бир джерден къобуз тауушчукъ эшитгенлей, къаны башха тюрлю джюрюб тебресе, кеси-кесине сейир болады. Аны аты ''КЪАН'ды, аны аты ''ГЕН''ди, аны аты - сени ''КИМ'' болгъанынгды. Сен айлана-айлана кесинге къайтып келликсе къарнашым, эгечим. Ол алайды, джаным-кёзюм.

Джармалаб сёлешгенни къояйыкъ, тышындан адамланы кесибизге кюлдюрмейик. Тамадаларыбыз бизлеге башчы болуб, Кавказгъа барадыла, къолларына алгъыш аякъ алыб, ''хепигиз'', ''хич'' дегенча сёзле айтадыла. Айтмагъыз, марджа, ''барыгъыз'' деб айтыгъыз, ''хич" деп айтмагъыз, ''чырт'' деб айтыгъыз. Эслегиз.

Сёзюмю ахырында айтырым:
Тилибизни къалай сакълайыкъ?
Назмуланы, джомакъланы, къайдам, къарачай адабиятында не джазыла эсе - окъургъа кюрешейик. Кёзюбюз окъургъа юренсе - джазгъаныбызда да, сёлешгенибизде да джангылыч этмей тебрерикбиз.
Мени да билмеген кёб сёзюм барды. Билмегенлерими излеб-соруб юренеме. Мени тюзетген болса - бек къууаныб, анга алгъыш этеме.

Сау болсун, Уфук Таукъул, кюрешиб бир сёзлюк къурагъанды. Хар ким алсын, сабийлерине окъутсун.

Бизге, тыш къраллада джашагъан таулулагъа, ол китабланы табхан къыйынды. Аны ючюн, интернетде ''къарачай-тюрк-ингилиз сёзлюк" къураргъа кюрешеме. Келигиз, билмегенле - джангы сёзле юренигиз, билгенле - джангы сёзле къошугъуз, бизге болушугъуз.
Бир болайыкъ, АНА ТИЛГЕ САКЪ БОЛАЙЫКЪ!

Саулукъ-эсенлик джаныгъызгъа.

Салам алейкум барыгъызгъа да:)

***

Сокъургъа кезле бир бер да-
Суратлар Дунияны,
Къолсузгъа билек берсенг а-
Кючлерикди къаяны.

Аякъсыз, санын табса уа,
Оздурмаз эди джелге.
Джарлыгъа байлыкъ джауса уа-
Чачарыкъ эди элге.

Къадарда багъа кералмай,
Мал сингенча ашаугъа,
Бир кере елюм сынамай
Сый бергеек джашаугъа.

Ibn-Ahmat, алейкум салам.

Къадарда багъа кералмай, - муну ангылаялмайма, орусча да бир айт
Мал сингенча ашаугъа,

Ма бу эки тизгинни башха тюрлю этсенг, назмунгу къалгъаны бек игиди.

Sabr,
болсун, керейим..
Ол эки тизгинде адам болгъан затын кере, багъа бере билмегенин айтыргъа кюреше эдим.. Мал а, ашха мыллыгын атса, джукъну къулагъына алмай, сюеле береди да- отсюда сравнение

Жабеланы Лаура.

***
Къарангылла, кече кибик, тангларым,
Жараладан элекдиле санларым,
Къама кирмед, окъла тиймелле манга-
Термилеме, тансыкъ болуп, Журтума.

Кез аллымда турадыла тауларым,
Эшитедиле жюрегими кюулерин,
Салам сизге, насыплы ахлуларым,
Къоймагъанла эллеринде юйлерин!

Насып излеп тюшмегенме тюзлеге,
Билеме мен насып къайда болгъанын...
Журтунг кибик не керюнюр кезюнге ?
Зат да айтма, белгилиди соргъаным...

Минги-тауум, бауурумда сюркелип да
Жетерикме, Аллах айтса, Кавказгъа,
Ин ша Аллах, ерге туруп, ант этгенме,
Амал табып, киши жерде къалмазгъа.

Цитата

Жабеланы Лаура. *** Къарангылла, кече кибик, тангларым, Жараладан элекдиле санларым, Къама кирмед, окъла тиймелле манга- Термилеме, тансыкъ болуп, Журтума. Кез аллымда турадыла тауларым, Эшитедиле жюрегими кюулерин, Салам сизге, насыплы ахлуларым, Къоймагъанла эллеринде юйлерин! Насып излеп тюшмегенме тюзлеге, Билеме мен насып къайда болгъанын... Журтунг кибик не керюнюр кезюнге ? Зат да айтма, белгилиди соргъаным... Минги-тауум, бауурумда сюркелип да Жетерикме, Аллах айтса, Кавказгъа, Ин ша Аллах, ерге туруп, ант этгенме, Амал табып, киши жерде къалмазгъа.

Аламат назму. Джангыз, "бауурумда сюркелиб" демейдиле, бауурум бла сюркелиб дерге керекди.

Юлгю орнуна:

"Джюзген окъ тийсе келиб,
джерге аудурса мени -
бауурум бла сюркелиб,
къорууларма чеклени"

Джазгъы ингиригиз къууатлы болсун ,Сыйлы Аланла!



Амий,

Цитата
Амий пишет: Прочной ниточкой связала Души наши и сердца, В судьбах наших роль сыграла, Эльба с нами до конца. На какие бы скитания, Не обрек нас всех реал, В виртуальном мореплавании, Ты надежный наш причал.))))

Браво!....... Къызчык,........аламат .....сценарийле джазаллыкъса: КВН-ге , сабий байрамлагъа, къууанчлагъа...... Сора ,Шамил айтханлай,кеисини макъмы барды джазгъанынгы......ол бек аламатды. Амий, сурат сала билемисе?

Цитата
Ibn-Ahmat пишет: Кергелен, айтылгъан бары да тюз.. Былайда сагъышларыбызны эркин ачыкъларча мадар болгъанына- бек сау болугъуз

Да...не сау болу барды.....барыбызда джюреклерибизни ишлетсек.....алгъа барлыкъбыз......джюрекдеди не да, джюрекде......бир кюн сан этиб къоярыкъды,джюрек тырмашса, хар адам къарыууна кёре, мадарына кёре.....Кёзлеуледен къураладыла Къобанла.....



Sabr,

Цитата
Sabr пишет: Америкадан эгечибиз Къочхарланы Леман чакъырыу халда аламат макале джазгъанды, сау болсун. Тинибек кирилл харифлеге бургъанды аны, мен да, къууаныб, былайгъа да салама.

Барыгъызда сау болугъуз.....джангыдан эсибизге салгъаныгъызгъа АнаТилибизни учсуз-къыйрсыз сыйлылыгъын эмда кереклигин......Хар джангы тил....ол байлыкъды...алай а, Ана Тилин билмеген .....бюреуню рысхысы бла хайырланган кибикди. Кесибизни аламат,кирсиз рысхыбыз барды....аны айнытайыкъ.!

Цитата

Sabr пишет: Мен да джаш заманларымда алай тюшюне эдим. Адам, игини да, аманны да кёре, джашай барса, артда кеси ёзюне къайтыб келеди. Алгъасында рокк, жаз музыкагъа тынгылаучу адам, къайдан эсе да бир джерден къобуз тауушчукъ эшитгенлей, къаны башха тюрлю джюрюб тебресе, кеси-кесине сейир болады. Аны аты ''КЪАН'ды, аны аты ''ГЕН''ди, аны аты - сени ''КИМ'' болгъанынгды. Сен айлана-айлана кесинге къайтып келликсе къарнашым, эгечим. Ол алайды, джаным-кёзюм.

Кесим джашаумда сынагъан зат.......Къобуз таууш джылатады.....эски джырла, ийнарла ,кюуле.....сыбызгъы согъулгъан исси джыламукъла бла джууады бетими.....
Ол сезими болмагъанга , сукъланмайма......(((

Цитата
Кергелен пишет: Ана Тилин билмеген .....бюреуню рысхысы бла хайырланган кибикди. Кесибизни аламат,кирсиз рысхыбыз барды....аны айнытайыкъ

Бек ариу айтдыгъыз!

Цитата

Sabr пишет: ЦитатаАмий пишет: Кергелен ийнарланы сагъыннганында, къулагъыма бир мелодия кибик келиб, алай джаза тургъанма. Не судите строго)) Ийнанмайма. Ийнанмайма, мен сеннге ийнанмайма, Джюрегингден кельмейле сёзле. Къыйналмайма, энди мен къыйналмайма, Джыламукъ чыгъармайла кёзле. Унутмайма, эсимдед, унутмайма, Ант этгененг, узакъ атлана- " Алдамайма, мен сени алдамайма, Къайтырыкъма, сен ышан анга." Сакълаедим, таралыб сакълаедим, Къайтырынга болмай ишегим. Санаедим, кюнлени санаедим, Къабыл болмад ансы тилегим. Излемединг, билирге излемединг, Не халда джашаедим сенсиз. Тилеме энд, кечмеклик тилеме энд, Болалмазбыз бирге экибиз.Cалам. 1.Бизни тилде сёзлеге (бизни сёзледе) джумушакъ белги (ь) (салынмайды. Кельмейди - келмейди. 2.Сёзлени къысхартмай джазгъандан игиси джокъду, алай а, назмуда алай джазаргъа да болады. "Энд" дегенден эсе уа, энди деб айтхан тыйыншлыды. 3. Сакълаедим дегенча сёзлени уа - "сакълай эдим" дегенчады тюз джазылыуу. Бек иги. Макъамы барды кесини - бек иги джыр болуб джырланыргъа ушайды.

Сау болугъуз, Билал. Биргеме сезлюк джокъ эди, проверить этмей салыб къойгъан эдим. Ахыр терт тизгинни тюрлендирдим. Къалай болду эсе да.

Ийнанмайма.

Ийнанмайма, мен сеннге ийнанмайма,
Джюрегингден келмейле сёзле.
Къыйналмайма, энди мен къыйналмайма,
Джыламукъ чыгъармайла кёзле.

Унутмайма, эсимдед, унутмайма,
Ант этгененг, узакъ атлана-
" Алдамайма, мен сени алдамайма,
Къайтырыкъма, сен ышан анга."

Сакълай эдим, таралыб сакълай эдим,
Къайтырынга болмай ишегим.
Санай эдим, кюнлени санай эдим,
Къабыл болмад ансы тилегим.

Излемединг, билирге излемединг,
Не халда джашай эдим сенсиз.
Тилемечин, кечмеклик тилемечин,
Бир болмазбыз энди экибиз.

Цитата

Кергелен пишет: Джазгъы ингиригиз къууатлы болсун ,Сыйлы Аланла! Амий, ЦитатаАмий пишет: Прочной ниточкой связала Души наши и сердца, В судьбах наших роль сыграла, Эльба с нами до конца. На какие бы скитания, Не обрек нас всех реал, В виртуальном мореплавании, Ты надежный наш причал.)))) Браво!....... Къызчык,........аламат .....сценарийле джазаллыкъса: КВН-ге , сабий байрамлагъа, къууанчлагъа...... Сора ,Шамил айтханлай,кеисини макъмы барды джазгъанынгы......ол бек аламатды. Амий, сурат сала билемисе?

Ашхылыкъ керюгюз :-) сау болугъуз ариу айханыгъызгъа. Аллах разы болсун. Бу сезлени былтыр форумгъа атаб джазгъан назмучукъдан алгъанма. 8 джыл мындан алгъа бир чам тема ачыб,анда джазыуучанма о форуме и форумчанах)) Сурат сала уа билмейме ))

Цитата

Амий пишет: ИЙНАНМАЙМА. Ийнанмайма, мен сеннге ийнанмайма, Джюрегингден келмейле сёзле. Къыйналмайма, энди мен къыйналмайма, Джыламукъ чыгъармайла кёзле. Унутмайма, эсимдед, унутмайма, Ант этгененг, узакъ атлана - " Алдамайма, мен сени алдамайма, Къайтырыкъма, сен ышан анга." Сакълай эдим, таралыб сакълай эдим, Къайтырынга болмай ишегим. Санай эдим, кюнлени санай эдим, Къабыл болмад ансы тилегим. Излемединг, билирге излемединг, Не халда джашай эдим сенсиз. Тилемечин, кечмеклик тилемечин, Бир болмазбыз энди экибиз.

Бек аламат этгенсе. Джангыз, сёзню ахырында "н" хариф керек тюлдю. Джазылгъаны: тилемечи.
Боташланы Зурият джырласа бу джырны, къалтыратырыкъ эди...

Цитата
Sabr пишет: Америкадан эгечибиз Къочхарланы Леман чакъырыу халда аламат макале джазгъанды, сау болсун. Тинибек кирилл харифлеге бургъанды аны, мен да, къууаныб, былайгъа да салама. ЛЕМАН Ж. КОЧ, АБШ ( USA) https://www.facebook.com/leman.koc.10 АНА ТИЛИБИЗГЕ САКЪ БОЛАЙЫКЪ

Джазгъанын бек джаратдым! Аллах ыразы болсун!
Бир башха миллетлеге эниклеген адамла кёбден кёб болуб барадыла, кертда "глобал" деген чот... Англары джетмейди турады тил деген нят болгъанын, ол къуру "бир-бирибиз бла сёлеширча" деген зат тюйюлдю, ол Джуртунг бла сени байлагъан джыджымды, юзюлюб къалса... сабийлеринг "къачан эсе да къарачайлыла эдик деб эшитгенем" деб турлукъдула... ол "глобалны" ичинде эриб къалгъан, олмуду адамны мураты?

Цитата

Жабеланы Лаура. *** Къарангылла, кече кибик, тангларым, Жараладан элекдиле санларым, Къама кирмед, окъла тиймелле манга- Термилеме, тансыкъ болуп, Журтума. Кез аллымда турадыла тауларым, Эшитедиле жюрегими кюулерин, Салам сизге, насыплы ахлуларым, Къоймагъанла эллеринде юйлерин! Насып излеп тюшмегенме тюзлеге, Билеме мен насып къайда болгъанын... Журтунг кибик не керюнюр кезюнге ? Зат да айтма, белгилиди соргъаным... Минги-тауум, бауурумда сюркелип да Жетерикме, Аллах айтса, Кавказгъа, Ин ша Аллах, ерге туруп, ант этгенме, Амал табып, киши жерде къалмазгъа.

Диана бла джууукълукъ бар болурму деб турама))) Бирча джазалла деб айтмайма, бирча сагъыш этедиле... Амазонкаланы къанлары джюрюмей эселе тамырларында, билмейме)))

Салам, Багъалыларым !



Амий, 8 джылны.....мындан алгъа....? )) Да....андан бери иги кесек джазгъан болурса ? Бизге да кёргюз ......окъуб, къуанайыкъ.

Sabr, Зурият а, джыргъа джан салыб къояды.......теринг бла сезесе.......



Makiavelli, тоба къызларыбыз бла махтанырчады......Къарачайда мы дейсе, Малкъарда мы дейсе. Шам Къарачайны къызлары -лирикле
Шах Малкъарны къызлары -патриотла.....


Джашларыбыз- философла....

Rassel, Ол иги джаш болурмуса? Ол эсенг?.... хош кел....эм сыйлы джерге ёт ....Билял Эфендини къатында олтур.

Билял Эфенди, бир соруум барды..... КъарачайМалкъар поэзияда,адабиятда теченияла болгъанмыдыла, бармыдыла.?

Б
Кергелен, сау болугъуз! Терге етмесем да бек аламатды кафегезиде! Анамы сизнича хоншусу болса, эм насыблы болур эди!

Кергелен, ма блайда)) http://www.elbrusoid.org/m/forum/forum3/topic15765/

Цитата
Rassel пишет: Анамы сизнича хоншусу болса, эм насыблы болур эди!

Rassel, Аначыгъынг интернетге киремиди?.))) Мен бюгюн шахаргъа джумушум болуб чыкъгъан эдим....къатыма бир джаш адам олтурады планшети бла....Достоевскийни юсюнден окъуй эди, студент болур эди.....
Къарадым да, энди манга да планшет керекди.))))....юйде тилегенме: планшет алыгъыз -деб...
Сени Аначыгъынг тилеймиди аллай оюнчакъла?))) Шахарчыламысыз?




Амий, Кызчыкъ, Сен мени сейирсиндирдинг джангыдан.....назмуларын сабий хрестоматиягъа джараулу хар бири.....узаймай.....сабий цикл къура назмуларынгдан!!!!!


"АКЪТАМАКЪ"-гъа кирген бир -эки къарачай сёз джазыгъыз......биз эшитмеген..билмеген. Мен башлайма))).

Аммаджукка--?

Чёмюлтаякъ--?

Цитата
Sabr пишет: Америкадан эгечибиз Къочхарланы Леман чакъырыу халда аламат макале джазгъанды, сау болсун. Тинибек кирилл харифлеге бургъанды аны, мен да, къууаныб, былайгъа да салама.

Билал, саубол

Ортабызда Оджеан болсада джюреклерибиз, сагышларыбыз бирди. Аллах таулу халкыма онг берсин

Америкадан узак салам ...

Цитата

Makiavelli пишет: Цитата ЛЕМАН Ж. КОЧ, АБШ ( USA) https://www.facebook.com/leman.koc.10 Джазгъанын бек джаратдым! Аллах ыразы болсун! Бир башха миллетлеге эниклеген адамла кёбден кёб болуб барадыла, кертда "глобал" деген чот... Англары джетмейди турады тил деген нят болгъанын, ол къуру "бир-бирибиз бла сёлеширча" деген зат тюйюлдю, ол Джуртунг бла сени байлагъан джыджымды, юзюлюб къалса... сабийлеринг "къачан эсе да къарачайлыла эдик деб эшитгенем" деб турлукъдула... ол "глобалны" ичинде эриб къалгъан, олмуду адамны мураты?

Макиавелли,

Саубол карнашым ...Аллах барыбызданда разы болсун. Есенлик джаныга.

Цитата
Кергелен пишет: Билял Эфенди, бир соруум барды..... КъарачайМалкъар поэзияда,адабиятда теченияла болгъанмыдыла, бармыдыла.?

Оллахий, литературоведледен бу затны тинтген болгъан эсе да билмейме. Алай а, мен билиб, Орус адабиятдача, бизде аллай джюрюшле болмагъандыла.
Джангыз, совет власт келгенинде, бютеу къралдача, бизде да пролетар адабият къуралгъанды. Кърал оюлгъанлы, энди хар ким сюйгенча джазады - тыйгъыч джокъду.

АКТАМАКга бир гитдже саугачык менден

Цитата
Culduz пишет: Sabr пишет: Америкадан эгечибиз Къочхарланы Леман чакъырыу халда аламат макале джазгъанды, сау болсун. Тинибек кирилл харифлеге бургъанды аны, мен да, къууаныб, былайгъа да салама. Билал, саубол Ортабызда Оджеан болсада джюреклерибиз, сагышларыбыз бирди. Аллах таулу халкыма онг берсин Америкадан узак салам ...

Саламынг узакъ болсун, Джулдуз

1. Макаленги "Къарачай" газетге ийгенме - басмаларыкъ болурла: керекли сёзню айтханса.

2. Башында саугъа назмунгу кирилл харифлеге кёчюрюб бери бир сал, мадарынг бар эсе. Сау бол.

Саламынг узак болсун, Джулдуз
Макаленги "Карачай" газетге ийгенме - басмаларык болурла: керекли сёзню айтханса.

Хоу хапарым барды. Караджхай газетни М.Кувват манга хапарын айтты. Алада сауболсунла, сау иш етсинле. Сизледе кыйынсыз олугуз.Мени етгеним, сени таулу миллетинге сау джасхаунда етип турган джумушларындан куру бир илиндичигиди.
Колуму джетип аклымы джетген бары тил джумушну етерге сизлеге болушурга Аллах бла разыма.

Есенлик барыгызга ...

Facebookda ma bılayda ol cumuşçuklanı eterge küreşeme. Taulu karnaşlarım, egeçlerim kelsele kuanırma
https://www.facebook.com/karachay.art.culture.club?ref=hl

Makaleni orijinali alaydadı.;
https://www.facebook.com/notes/karachay-art-culture-club/tilibizge-sak-bolayik/716028431782102

Culduz,

Цитата
Culduz пишет: АКТАМАКга бир гитдже саугачык менден

Saubol Tenebek

Nazmunu Cyril bla cazama ( Sizde Latin alfabetge köçügüz, blay bek kıyındı )


------------------------------------------------------------------------------------



КЮЗГЮ

Джанкылычтан юйрендим мен назмуну
Ол таулага тюшген джарыгындан
Кызылны, джашилни, кёкню кёргюзюп алга
Бети бла бояганында, кёлюмю орнуну.

Джангурладан тюшдю ол колларыма, булутладан.
Кыш джайга айланганында, тау етекледе гоккаладан
Ёсгенлеринде кесилигинден, тюрсюндюрмейин бетлерин
Куртха, кушха, адамга бирча ышарганында...

Кюз айлада айлана еди ол. Салкын. Кёлеккеледе.
Кёрдюм...
Джылауунда еди агачны
Джерге тюшген чапрагыны артындан
Джашауну кёкюрегинде сора.
Кюн таяклача.
Узалып алдым аны, чырмадым ачы джараларыма,

Башха тилледен да джырлады бир кесек кулагыма,
Бирини да есине алмады джюрегим, ана тилден алганча.

Назму хар джерде еди.
Сенде ...
Анда ...
Мында ...
Еслемей озуп кетгенем джашауну джол кыйырларында:
Ким кетсе да менден, ол саклай еди,
Мени манга ескертип ичиме кюзгю тутханча.

Леман Ж. Коч
(Кочхарланы Леман )

Цитата
Culduz пишет: ( Sizde Latin alfabetge köçügüz, blay bek kıyındı )

Цитата
Culduz пишет: Cyril

Amerikan klavye bla cazsang alay boladı

.

Тоба не Американ клауе не Орус алфабет мени тауча джазгандан тярык тюйюлдю ... Бир кесек кыйналып джазарма, дженгил джазып коялмам амма джазарма Тенебек. Мени ериштирме