Этез улу Исмайил мени джамагъат бла танышдыргъаны
171
Сиз, таныгъыз быланы,
Мен айтайым хапарны.
Асламысы таулула,
Тамгъалары - бурунла.
Башха къауум джыйымдыкъ,
Хар экинчи бир сылыкъ.
Келе – келиб, тюзледен,
Джашайдыла бай бизден.
Ала ийе, биз – къонакъ.
Биз зыкгыл, ала омакъ.
Сол туракълай, алайда,
Сюйеледи Зубайда.
Аууз уллу, баш гитче.
Ауазы джарар итге.
Гитче башда чач къыркъма
Джетишсе да ол къыркъгъа.
Аууз ачыб, тюз, анга,
Ушайма деб, чолпаннга,
Сюйеледи Къанитат.
Эй, кючлюдю табигъат.
Иги, къара, битишге,
Къараб тургъан ол тишге.
Ол тиш тюлдю – мычхыды.
Темирни да джырлыкъды.
Баш тишлери алтынла.
Тюбдегиле багъырла.
Кёзлеринде барды окъ,
Башында уа чёб да джокъ.
Берлакъда уа аладан.
Джулдуз юзген аламдан,
Сюеледи Джансолтан.
Не айтайым мен андан.
Кеси сауду, къатын шау.
Кеси тауду, юйю - бау.
Керекмилле чырт ала,
Мыйыкълары аркъанла.
Бири - къызыл, бири - акъ.
Аралары къараракъ.
Кёкюреги къаялай.
Имбашлары джаялай.
Шо, не келсин, аладан,
Эринчекди Джансолтан.
Тютюнюнде, къалында,
Чёгюб тургъан къатында,
Ай, машалла, Мырзады,
Ай, къарагъыз, мындады.
Сакъалчыгъы текелей,
Тёпбечиги кёкенлей.
Билген заты чагъырды,
Ызы бла уа къайгъыды.
Туугъанлыкъгъа таулудан,
Юйдегиси гяурдан.
Къатыныны юч къызы,
Тосларыны джокъ ызы.
Алайда уа, ма, Зугул.
Энди тюлдю бу да къул.
Болгъунчу да бухгалтер,
Таный эди тузлу тер.
Энди аны къой да - къой,
Джюрегинде хаман той.
Хар сёз аллы - значитди,
Ахыр сюрем хватитди.
Сюйген халкъы ингилиз,
Сюйген дини ибилис.
Болур ючюн депутат,
Энди, бет да, ол джууад.
Джуугъанындан не хайыр,
Джюреги къара чайыр.
Зугулгъа сыртны буруб,
Къарынны тогъай тутуб.
Юсюнде зыкгыл габрай,
Сюйеледи Чырдыбай.
Къатыны дарий – парча,
Бу, кеси уа, бир санча.
Кетгенинде Кябагъа,
Джылдан къайтды арбазгъа.
Чалдырса да къазакъча,
Джаншай билед арабча.
Орусча да мурулдайды,
Тау тилде да мушулдайды.
Семиз къызы - гяурда,
Арыкъ къызы - таулуда.
Къалгъанлары Сибирде,
Кими шау, кими эрде.
Олбири уа - Къатынбай,
Бир ичгени алты ай.
Джетинчиде ауруйду,
Джети айны улуйду.
Ой, дагъы да, джангыдан,
Ура беред чагъырдан.
Туугъан джери Малкъарда,
Джатхан джери Басханда.
Кёнделенде - бириси,
Лашкутада - экиси.
Бу элде да, юч къатын,
Джалайдыла аягъын.
Джашагъаны тамаша,
Болгъан кибик бу паша.
Берлакъдагъы, ол тиши,
Кёрмегенди чырт киши.
Ёмюрю да, хаман къыркъ,
Ол санаудан таймай чырт.
Кёкюреги - Минги Тау,
Кёзлеринде джукъу ау.
Кесинден табан мийик.
Джюреги мыллык чирик.
Шо, несиди, игиси,
Тохтамайды чырт тили.
Кеси быхы, бурну гардош,
Бети къара, чачы бир боз.
Ала билсе къолгъа къалам,
Бермез эди, кёкге, салам.
Капек башны он сом этген,
Быллайгъады, алай деген.
Къатындагъы беш къыздан,
Бирден къалгъан алыннган.
Таб айтсам, сыфат былай.
Джокъду джаулукъ не чындай.
Бутла десенг, бирер дагъан,
Эки къолла бирер аркъан.
Эрни десенг, чайыр кёмюк.
Арт джаны уа тоблай кёбюб.
Бу джанланы, кече кёрген,
Болур, тейри, саудан ёлген.
Тургъанла уа, бирер башха.
Кендир тартхан эссиз джашла.
Кёз къабакъла буршу болуб,
Кёз гинджиге хымил къонуб.
Бирси къауум, джерге къуса,
Бирси бёлек, джерден уча.
Кёбюсюнде джыртыкъ кийим,
Джаякълада тюклю битим.
Кёрюнмейди бетин джуугъан,
Хар бири да шайтан ургъан.
Бирси - зийна, бирси - гуду.
Бири зымпыкъ, бири худжу.
Джашай эсек, энтда, былай,
Басхан къалад иймансызлай.
Сен, Аллахым, къол соз бери.
Кебге бир сал, хар бир нени.
Дженгил джет да сен таулагъа,
Оноу бир эт, шаугъа, саугъа.
Орнун табдыр, хар бир затны.
Къорат, бизден, хар азабны.
Турна Ауушю