- Тешик этген тынчды, аны джамагъан къыйынды.
- Тюкюрюк баш джармаз, налат кёз чыгъармаз!
- Аманны эки битли тону болур, бирин сеннге кийдирир, бирин кеси киер.
- Джашны джигитлиги сорулур, къызны джигерлиги сорулур.
- Джарлы джети элни сёзюн этер.
- Бети бедерден, намыс сакълама.
- Халкъны юйю – туугъан джери.
- Ашхы адам – халкъ байлыгъы, ашхы джер – джашау байлыгъы.
- Тешигини къатында, чычхан да батыр болур.
- Таукел тауну аудурур.
- Таш ата билмеген, башына урур.
- Атадан ёксюз – бир ёксюз, анадан ёксюз – эки ёксюз.
- Ушамагъан – джукъмаз.
- Хар зат кесини орнуна иги.
- Кийимни бичсенг, кенг бич, тар этген къыйын тюлдю.
- Ач къарынны, токъ билмез
- Къумурсхала джыйылсала, пилни да джыгъадыла.
- Алгъанда – джууукъ, бергенде – джау.
- Чакъырылмагъан къонакъ къачан кетерин сормаз.
- Биреуге аманлыкъны тилеме да, кесинге ашхылыкъны тиле.
- Эл ауузу – элия.
- Джыйырма къойну юч джыйырма эбзе кюте эди.
- Тау башында, тау болмаз, джангыз терек, бау болмаз.
- Чакъырылмагъан джерге барма, чакъырылгъан джерден къалма.
- Ауузу бла къуш тута айланады.
- Ашха уста, юйюнде болсун
- Рысхысына кёре, джаш ёсер, къышлыгъына кёре, мал ёсер.
- Джаным-тиним – окъуу, билим.
- Оюмсуз атлагъан, аджалсыз ёлюр.
- Ханнга да келеди хариблик.
- Джашлыкъ этмеген, башлыкъ этмез.
- Къазанда болса, чолпугъа чыгъар.
- Билген билмегенни юретген адетди.
- Нафысынгы айтханын этме, намысынгы айтханын эт.
- Кюн – узун, ёмюр – къысха.
- Аман къатын алгъан, арыр, иги къатын алгъан джарыр.
- Тамчы таш тешер.
- Джиби бир къат джетмей эди да, эки къат тарта эди.
- Ёгюзню мюйюзюнден тутадыла, адамны сёзюнден тутадыла.
- Ач, тоймам, дейди, тойгъан, ач болмам, дейди.
- Тюз сёз баргъан сууну тыяр.
- Атынг аманнга чыкъгъандан эсе, джанынг тамагъынгдан чыкъсын.
- Джюз элде джюз ёгюзюм болгъандан эсе, джюз джууугъум болсун.
- Таукел адам тау тешер.
- Иги – алгъыш этер, аман – къаргъыш этер.
- Эр сокъур болсун, къатын тилсиз болсун.
- Акъыл къартда, джашда тюйюлдю – башдады.
- Тил бла келеди джыр да.
- Намыс сатылыб алынмайды.
- Азыкъ аз болса, эртде орун сал.
Профиль
|
|
|||