- Мал кёб болса, джууукъ кёб болур.
- Сакъалы текени да бар, мыйыгъы киштикни да бар.
- Эрни эр этерик да, къара джер этерик да, тиширыуду.
- Алим болгъандан эсе, адам болгъан къыйынды.
- Халкъны джырын джырласанг, халкъ санга эжиу этер.
- Ауузу аманнга «иги», деме.
- Бозаны арты дауур болур.
- Ашха уста, юйюнде болсун
- Билген билмегенни юретген адетди.
- Азыгъы аз, алгъа къабар, аты аман, алгъа чабар.
- Эртде тургъан бла эртде юйленнген сокъуранмаз.
- Келинни – келгинчи, бёркню кийгинчи кёр.
- Аманнга игилик этсенг, юйюнге сау бармазса.
- Джылыгъа джылан илешир.
- Ауузу бла къуш тута айланады.
- Акъыл аздырмаз, билим тоздурмаз.
- Къонагъынгы артмагъын алма да, алгъышын ал.
- Адамны артындан къара сабан сюрме.
- Къолунгдан къуймакъ ашатсанг да, атаны борчундан къутулмазса.
- Мал тутхан – май джалар.
- Джумушакъ терекни къурт ашар.
- Узун джолну барсанг, бюгюн келирсе, къысха джолну барсанг, тамбла келирсе.
- Иесиз малны бёрю ашар.
- Башсыз урчукъ тюзюне айланмаз.
- Кёб джат да, бек чаб.
- Эри аманны, къатыны – аман.
- Ашына кёре табагъы, балына кёре къалагъы.
- «Ма», - дегенни билмесенг, «бер», - дегенни билмезсе.
- Билгенни къолу къарны джандырыр.
- Эринчекге кюн узун.
- Уясында не кёрсе, учханында аны этер.
- Аман адам этегингден тутса, кес да къач.
- Аман адам элни бир-бирине джау этер.
- Аз сёлеш, кёб ишле.
- Къайгъыны сюйген, къайгъы табар.
- Эртде тургъан джылкъычыны эркек аты тай табар.
- Акъыл бла адеб эгизледиле.
- Иги сеники эсе да, сюйген кесимикин этеме.
- Аджалсыз ёлюм болмаз.
- Ач, тоймам, дейди, тойгъан, ач болмам, дейди.
- Алтыннга тот къонмаз.
- Минг тенг да азды, бир джау да кёбдю.
- Таукелге нюр джауар.
- Нёгер болсанг, тенг бол, тенг болмасанг, кенг бол.
- Уллу суу бла уллу ауруудан башынгы сакъла.
- Джаш къарыу бла кючлю, къарт акъыл бла кючлю.
- Ханы къызы буюгъа-буюгъа киштик болду.
- Ауурну тюбю бла, дженгилни башы бла джюрюген.
- Уллу къашыкъ эрин джыртар.
- Тюзлюк шохлукъну бегитир.
Профиль
|
|
|||