- Бети – къучакълар, джюреги – бычакълар.
- Ата – билек, ана – джюрек!
- Халкъны юйю – туугъан джери.
- Окъдан джара эртде-кеч болса да бителир, сёз джара, ёмюрге къалыр.
- Айран тёгюлсе, джугъусу къалыр.
- Къонакъ болсанг, ийнакъ бол.
- Джогъун бар этген, барын бал этген.
- Ёгюзню мюйюзлери ауурлукъ этмейдиле.
- Мухар, кеси тойса да, кёзю тоймаз.
- Ач къалгъандан, кеч къалгъан къолай.
- Ач уят къоймаз.
- Джарлыны тону джаз битер.
- Кёб къычыргъандан – къоркъма, тынч олтургъандан – къоркъ.
- Иги бла джюрюсенг, джетерсе муратынга, аман бла джюрюсенг, къалырса уятха.
- Баш болса, бёрк табылыр.
- Агъач халкъгъа алтынды, иссиликге салкъынды.
- Адамны адамлыгъы къыйынлыкъда айгъакъланады.
- Эри аманны, къатыны – аман.
- Тилчиден кери бол.
- Шапа кёб болса, аш татымсыз болур.
- Ата джурт – алтын бешик.
- Кюлме джашха – келир башха.
- Ёксюзню тилеги къабыл болур.
- Тилчи бир сагъатха айлыкъ хата этер.
- Экеу тутушса, биреу джыгъылыр.
- Айтылгъан сёз ызына къайтмаз.
- Бозанг болмагъан джерге, къалагъынгы сукъма.
- Хар адамгъа кеси миннген тау кибик.
- Эркиши – от, тиширыу – суу.
- Минг тенг да азды, бир джау да кёбдю.
- Аш иеси бла татлыды.
- Ётюрюкден тюбю джокъ, кёлтюрюрге джиби джокъ.
- Юре билмеген ит, къонакъ келтирир.
- Эринчекни аурууу – кёб.
- Аман эсирсе, юйюн ояр.
- Атынг аманнга чыкъгъандан эсе, джанынг тамагъынгдан чыкъсын.
- Этни да ашады, бетни да ашады.
- Окъуу – билимни ачхычы, окъуу – дунияны бачхычы.
- Эки къатын алгъанны къулагъы тынгнгаймаз.
- Эл ауузу – элек, анга ийнаннган – халек.
- От кюйдюрген, сау болса да, тот кюйдюрген, сау болмаз.
- Тенгни тенглиги джашай барсанг билинир.
- Къызгъанчдан ычхыныр, мухардан ычхынмаз.
- Бёрю да ач къалмасын, эчки да ашалмасын.
- Экиндини кеч къылсанг, чабыб джетер ашхам.
- Асхат ашлыкъ сата, юйдегиси ачдан къата.
- Айныгъанлы алты кюн, тогъайгъанлы тогъуз кюн.
- Джылкъыдан – ат чыгъар, тукъумдан – джаш чыгъар.
- Ауругъанны сау билмез, ач къарынны токъ билмез.
- Къонагъынгы артмагъын алма да, алгъышын ал.
Профиль
|
|
|
|||