- Акъыллы эркиши атын махтар, акъылсыз эркиши къатынын махтар.
- Ач, тоймам, дейди, тойгъан, ач болмам, дейди.
- Кюлме джашха – келир башха.
- Ашаса, ашамаса да, бёрюню ауузу – къан.
- Ачыу алгъа келсе, акъыл артха къалады.
- Алма терегинден кери кетмез.
- Ашарыкъда сайлагъаннга – чий гырджын.
- Борчунг бар эсе, хурджунунга ойлаб узал.
- Экеулен сёлеше тура эселе, орталарына барыб кирме.
- Этим кетсе да, сюегим къалыр.
- Айран тёгюлсе, джугъусу къалыр.
- Суу да къайтады чыкъгъан джерине.
- Шекер бла туз – бир болмаз, ушамагъан – юй болмаз.
- Билим къая тешер.
- Адамны артындан къара сабан сюрме.
- Окъумагъан сокъурду, сокъур ташха абыныр!
- Ариу сёз – къылычдан джити.
- Тай асырагъан, атха минер.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Эшекни не къадар тюйсенг да, ат болмаз.
- Иги – алгъыш этер, аман – къаргъыш этер.
- Оюмсуз атлагъан, аджалсыз ёлюр.
- Кесине оноу эте билмеген, халкъына да эте билмез.
- Къууут – джелге, берне – бошха.
- Мухар, кеси тойса да, кёзю тоймаз.
- Джарлы эскисин джамаса, къууаныр.
- Хар ишни да аллы къыйынды.
- Джигер – джаннга къыйынлыкъ.
- Ат басханны джер билед.
- Джукъу тёшек сайламайды.
- Келинни – келгинчи, бёркню кийгинчи кёр.
- Гугурук къычырмаса да, тангны атары къалмаз.
- Ач келгенни – тойдур, кеч келгенни – къондур.
- Кийимни бир кюнню аясанг, минг кюннге джарар.
- Окъуусуз билим – джокъ, билимсиз кюнюнг – джокъ.
- Къонагъынгы артмагъын алма да, алгъышын ал.
- Экеу тутушса, биреу джыгъылыр.
- Эм уллу байлыкъ – джан саулукъ.
- Сибиртки да сыйлы болду, кюрек да кюнлю болду.
- Ишлегенден, къарагъан уста.
- Тилсиз миллет джокъ болур.
- Джюрекден джюрекге джол барды.
- Аман адам этегингден тутса, кес да къач.
- Джан саулукъ бермей, сан саулукъ бермезсе.
- Тёгюлген тюгел джыйылмайды.
- Ёксюзню къалачы уллу кёрюнюр.
- Тенги кёбню джау алмаз, акъылы кёбню дау алмаз.
- Иши джокъну, сыйы джокъ.
- Огъурлуну сёзю – суу, огъурсузну сёзю – уу.
- Кёбге таш атма.
Профиль
|
|
|||