- Джаным-тиним – окъуу, билим.
- Эринчекни эр алмаз, эр алса да, кёл салмаз, кёл салса да, кёб бармаз!
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Адеби болмагъан къыз – тузсуз хант.
- Байлыкъ болгъан джерде, тынчлыкъ джокъду.
- Тюз сёз баргъан сууну тыяр.
- Босагъа таш юйге кирмей эди, тыбыр таш эшикге чыкъмай эди.
- Нафысынгы айтханын этме, намысынгы айтханын эт.
- Таула не мийик болсала да, аууш табылыр.
- Эл элде бирер малынг болгъандан эсе, бирер тенгинг болсун.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Рысхы – сют юсюнде кёмюк кибикди.
- Ана къолу ачытмаз.
- Тюзлюк тас болмайды.
- Къызны минг тилер, бир алыр.
- Къарыусузгъа кюлме, онгсузгъа тийме.
- Арыгъан къош чамчы болур.
- Бойнуму джети джерден кессенг да, мен ол ишни этеллик тюлме.
- Ашатыргъа иш – ашхы, ишлетирге аш – ашхы.
- Ишленмеклик адамлыкъды.
- Ханнга да келеди хариблик.
- Ишлегенден, къарагъан уста.
- Къуллукъчума, деб махтанма, къуллукъ – хаух джамчыды!
- Душманны тышы – акъ, ичи – къара.
- Рысхы – насыбха къор.
- Зарда марда джокъ.
- Аджашхан тёгерек айланыр.
- Билеги кючлю, бирни джыгъар, билими кючлю, мингни джыгъар.
- Аллахдан тилесенг, кёб тиле.
- Джауумдан сора, кюн кюйдюрюр, ётюрюкден сора, айыб кюйдюрюр.
- Эм уллу байлыкъ – джан саулукъ.
- Эллинг бла джау болсанг да, юйюнг бла джау болма.
- Аш иеси бла татлыды.
- Чомартха хар кюн да байрамды.
- Соргъан айыб тюлдю, билмеген айыбды.
- Кёбню кёрген – кёб билир.
- Тойгъан джерден туугъан джер игиди.
- Джарашыу сюйген – джалынчакъ.
- Чомарт джарлы болмаз.
- Къошда джокъгъа – юлюш джокъ.
- Тойгъан антын унутур.
- Тин – байлыгъынг, терен саулугъунг.
- Айтхан сёзюне табылгъан.
- Аман адамны тепсинге олтуртсанг, къызынгы тилер.
- Урунуу – насыбны анасы.
- Джангызны оту джарыкъ джанмаз!
- Адам къаллай бир ишленмесе, аллай бир кесин уллу кёреди.
- Аман киши кеси юйюнде – къонакъ.
- Хар ишни да аллы къыйынды.
- Ашхы адам – халкъ байлыгъы, ашхы джер – джашау байлыгъы.
Профиль
|
|
|||