- Элни кючю – эмеген.
- Алтыннга тот къонмаз.
- Татлы тилде – сёз ариу, чемер къолда – иш ариу.
- Къартны бурнун сюрт да, оноугъа тут.
- Адамны аманы адамны бети бла ойнар.
- Ата Джуртун танымагъан, атасын да танымаз.
- Байлыкъ тауусулур, билим тауусулмаз.
- Керти сёзге тёре джокъ.
- Кёзюнде тереги болгъан, чёбю болгъаннга кюле эди.
- Босагъагъа джууукъ орун болса, ашыгъыб тёрге озма.
- Эки элинги тыйсанг, джети элде махталырса.
- Айранын берсенг, челегин да къызгъанма.
- Аманнга игилик этсенг, юйюнге сау бармазса.
- Ауузу аманнга «иги», деме.
- Махтаннган къыз, тойда джукълар.
- Атлыны ашхысы, ат тизгининден билинир
- Ана къолу ачытмаз.
- Сабийни джумушха джибер да, ызындан бар.
- Кесине гебен этелмеген, биреуге черен эте эди.
- Эл ауузу – элия.
- Ёзденликни джайгъан – джокълукъ.
- Къолунгдан къуймакъ ашатсанг да, атаны борчундан къутулмазса.
- Ёлген эшек бёрюден къоркъмайды.
- Къалгъан ишге къар джауар.
- Ышармагъан – кюлмез, кюлмеген – къууанчны билмез.
- Чыбыкълыкъда бюгюлмеген, къазыкълыкъда бюгюлмей эди.
- Чакъырылмагъан къонакъ – орунсуз.
- Таукел къуру къалмаз.
- Къан бла кирген, джан бла чыгъар.
- Элге къуллукъ этмеген, элге ие болмаз.
- Дуния малгъа сатылма, кесингден телиге къатылма.
- Кёб джат да, бек чаб.
- Чабакъ башындан чирийди.
- Этни да ашады, бетни да ашады.
- Ариу сёз джыланны орнундан чыгъарыр.
- Суу кетер, таш къалыр.
- Аджаллыгъа окъсуз шкок атылыр.
- Келгинчи, къонакъ уялыр, келгенден сора, къонакъбай уялыр.
- Къонакъ болсанг, ийнакъ бол.
- Билим насыб берир, билим джолну керир.
- Ач – эснер, ат – кишнер.
- Ауругъаннга – кийик саулукъ, джетген къызгъа – чилле джаулукъ.
- Къонакъ хазыр болгъанлыкъгъа, къонакъбай хазыр тюлдю.
- Сууда джау джокъ, кёб сёзде магъана джокъ.
- Аман къатын сабий табса, бий болур…
- Зарда марда джокъ.
- Ачыу алгъа келсе, акъыл артха къалады.
- Ачлыкъ отха секиртир.
- Уруну арты – къуру.
- Рысхы – насыбха къор.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72