- Билген билмегенни юретген адетди.
- Соргъан айыб тюлдю, билмеген айыбды.
- Нарт сёз къарт болмаз.
- Джюз элде джюз ёгюзюм болгъандан эсе, джюз джууугъум болсун.
- Ачыу алгъа келсе, акъыл артха къалады.
- Ариуну – ауруу кёб.
- Аман къатын алгъан, арыр, иги къатын алгъан джарыр.
- Онгсузну – джакъла, тенгликни – сакъла.
- Къаллай салам берсенг, аллай джууаб алырса.
- Эли джокъну – кёлю джокъ.
- Элни кючю – эмеген.
- Уруну арты – къуру.
- Адам къаллай бир ишленмесе, аллай бир кесин уллу кёреди.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Байдан умут эте, джарлыдан ёгюз багъасы къорады.
- Тешик этген тынчды, аны джамагъан къыйынды.
- Ётюрюкню башын керти кесер.
- Урунуу – насыбны анасы.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Аурууну келиую тынч, кетиую – къыйын.
- Джарлы джети элни сёзюн этер.
- Чомартха Тейри да борчлуду.
- Къызбайны юйюне дери сюрсенг, батыр болур.
- Ханнга да келеди хариблик.
- Бозанг болмагъан джерге, къалагъынгы сукъма.
- Эринчекни эр алмаз, эр алса да, кёл салмаз, кёл салса да, кёб бармаз!
- Билими азны – ауузунда кирит.
- Телиге от эт десенг, юйюнге от салыр.
- Къобан да къуру да къобханлай турмайды, адам да къуру да патчахлай турмайды.
- Байлыкъдан саулукъ ашхыды.
- Бал чибинни ургъаны – ачы, балы – татлы.
- Къыз келсе, джумуш эте келеди, къатын келсе, ушакъ эте келеди.
- Бермеген къол, алмайды.
- Эл ауузу – элек, анга ийнаннган – халек.
- Нафысынгы айтханын этме, намысынгы айтханын эт.
- Мадар болса, къадар болур.
- Эринчекге кюн узун.
- Ариу сёз аурууунгу алыр.
- Башланнган иш битер, къымылдагъан тиш тюшер.
- Тилчиден кери бол.
- Сакъламагъан затынга джолукъсанг, не бек къууанаса, не бек ачыйса.
- Бозаны арты дауур болур.
- Ётген ёмюр – акъгъан суу.
- Ач бёрюге мекям джокъ.
- Хаухну атма, ёнгкючню сатма.
- Тилде сюек болмаса да, сюек сындырыр.
- Кёб джашагъан – кёб билир.
- Иги бла джюрюсенг, джетерсе муратынга, аман бла джюрюсенг, къалырса уятха.
- Ушамагъан – джукъмаз.
- Олтуруб кёрюнмей эди да, ёрге туруб кёрюне эди.
Ошибка!
Для просмотра темы введите ваши логин и пароль.Пожалуйста, авторизуйтесь: