- Тамырсыз терекге таянма – джыгъылырса.
- Мухарны эси – ашарыкъда.
- Ана кёлю – балада, бала кёлю – талада.
- Тёгюлген тюгел джыйылмайды.
- Сескекли кесин билдирир.
- Ата Джуртун танымагъан, атасын да танымаз.
- Хазыр ашха – терен къашыкъ.
- Джаз бир кюнню джатсанг, къыш талай кюнню абынырса.
- Джюрек кёзден алгъа кёрюр.
- Джигер – джаннга къыйынлыкъ.
- Тойгъан джерге джети къайт.
- Къулакъдан эсе, кёзге ышан.
- Тойну къарнашы – харс, джырны къарнашы – эжиу.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Тенги кёбню джау алмаз, акъылы кёбню дау алмаз.
- Тёрени джагъы джокъ.
- Уллу къашыкъ эрин джыртар.
- Халкъны юйю – туугъан джери.
- Зарда марда джокъ.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Аманнга алтын чыдамаз.
- Ёксюзню тилеги къабыл болур.
- Эки элинги тыйсанг, джети элде махталырса.
- Тёзген – тёш ашар!
- Тай асырагъан, атха минер.
- Аууз сакълагъан – джан сакълар.
- Керти сёзге тёре джокъ.
- Тойгъан антын унутур.
- Билими азны – ауузунда кирит.
- Адамгъа аман кюн соруб келмейди.
- Нарт сёз къарт болмаз.
- Тилде сюек болмаса да, сюек сындырыр.
- Экеу тутушса, биреу джыгъылыр.
- Къалгъан ишге къар джауар.
- Уллу къазанда бишген эт, чий къалмаз.
- Гугук кесини атын айтыб къычыргъанча, мен, мен деб нек тураса?
- Ашхы адам – халкъ байлыгъы, ашхы джер – джашау байлыгъы.
- Джылыгъа джылан илешир.
- Келинни – келгинчи, бёркню кийгинчи кёр.
- Биреуге аманлыкъны тилеме да, кесинге ашхылыкъны тиле.
- Намысы болмагъанны, сыйы болмаз.
- Бир абыннган – минг сюрюнюр.
- Тилчи бир сагъатха айлыкъ хата этер.
- Чомартха хар кюн да байрамды.
- Сёз – кюмюш, джыр – алтын.
- Гитче джилтин уллу элни джандырыр.
- Чабакъсыз кёлге къармакъ салгъанлыкъгъа, чабакъ тутмазса.
- Адеб базарда сатылмаз.
- Келгинчи, къонакъ уялыр, келгенден сора, къонакъбай уялыр.
- Телиге от эт десенг, юйюнге от салыр.