- Башда акъыл болмаса, эки аякъгъа кюч джетер.
- Эски джаугъа ышанма.
- Бюгюн дуния кибик, тамбла ахыратды.
- Босагъа таш юйге кирмей эди, тыбыр таш эшикге чыкъмай эди.
- Тешик этген тынчды, аны джамагъан къыйынды.
- Ач уят къоймаз.
- Ариу сёз аурууунгу алыр.
- Нёгерсизни джолу узун.
- Окъумагъан сокъурду, сокъур ташха абыныр!
- Уясында не кёрсе, учханында аны этер.
- Эртде тургъан бла эртде юйленнген сокъуранмаз.
- Ауузу аманнга «иги», деме.
- Чыбыкълыкъда бюгюлмеген, къазыкълыкъда бюгюлмей эди.
- Адебсиз адам – джюгенсиз ат.
- Ёлюк кебинсиз къалмаз.
- Къар – келтирди, суу – элтди.
- Халкъгъа джарагъан, джарлы къалмаз.
- Ичимден чыкъды хата, къайры барайым сата?
- Джауумдан сора, кюн кюйдюрюр, ётюрюкден сора, айыб кюйдюрюр.
- Джумушакъ терекни къурт ашар.
- Чабакъгъа акъыл, табагъа тюшсе келеди.
- Чабар ат – джетген къыз.
- Окъугъан озар, окъумагъан тозар.
- Къыз чыгъаргъан – къызыл къымжа.
- Тамырсыз терекге таянма – джыгъылырса.
- Игилик игилик бла сингдирилиучю затды.
- Аманнга игилик этсенг, юйюнге сау бармазса.
- Тилчи тилден къаныкъмаз.
- Бек ашыкъгъан меннге джетсин, дегенди аракъы.
- Таукелге нюр джауар.
- Башы ишлегенни, ауузу да ишлер.
- Бир онгсуз адам адет чыгъарды, деб эштирик тюлсе.
- Сибиртки да сыйлы болду, кюрек да кюнлю болду.
- Башы джабылгъан челекге, кир тюшмез.
- Мухар, кеси тойса да, кёзю тоймаз.
- Эки итни арасына сюек атма, эки адамны арасында сёз чыгъарма.
- Аман эсирсе, юйюн ояр.
- Айранны сюйген, ийнек тутар.
- Келгинчи, къонакъ уялыр, келгенден сора, къонакъбай уялыр.
- Кёб ант этген, кёб ётюрюк айтыр.
- Тойгъан антын унутур.
- Нёгер болсанг, тенг бол, тенг болмасанг, кенг бол.
- Билмезни кёзю кёрмез, этмезни къулагъы эшитмез.
- Чакъырылмагъан къонакъ тёрге атламаз.
- Сакъ юйюне сау барыр.
- Телиге акъыл салгъандан эсе, ёлгеннге джан салырса.
- Эринчекни эр алмаз, эр алса да, кёл салмаз, кёл салса да, кёб бармаз!
- Ётюрюк хапар аякъ тюбю бла джюрюйдю.
- Ачлыкъ отха секиртир.
- Дуния аламаты сен эсенг да, игиме деб айтма.
[ Закрыто ] ищу работу !
Читают тему (гостей: 1)