Аудио :: Аудио:: Каракетов Махар

Кёб джат да, бек чаб.
Чомартха Тейри да борчлуду.
Къуллукъчума, деб махтанма, къуллукъ – хаух джамчыды!
Ашхы сёз таш тешер.
Джюрек кёзден алгъа кёрюр.
Биреуге аманлыкъны тилеме да, кесинге ашхылыкъны тиле.
Кёбню кёрген – кёб билир.
Атлыны кёрсе, джаяуну буту талыр.
Аманнга да, игиге да оноусуз къатышма.
Чабакъсыз кёлге къармакъ салгъанлыкъгъа, чабакъ тутмазса.
Ётюрюкню башын керти кесер.
Ёлген аслан – сау чычхан.
Сабийни джумушха джибер да, ызындан бар.
Ариуну – ауруу кёб.
Ёзденликни кёбю ётюрюк.
Шапа кёб болса, аш татымсыз болур.
Тойчу джашха къарама, къойчу джашха къара.
Зар адамны насыбы болмаз.
Огъурлуну сёзю – суу, огъурсузну сёзю – уу.
Джолда аягъынга сакъ бол, ушакъда тилинге сакъ бол.
Хар адамгъа кеси миннген тау кибик.
Сабийликде юретмесенг, уллу болса – тюзелмез.
Айраннга суу къош, телиге джол бош.
Кийим тукъум сордурур.
Ашхы адам – халкъ байлыгъы, ашхы джер – джашау байлыгъы.
Кеси юйюмде мен да ханма.
Тамырсыз терекге таянма – джыгъылырса.
Эрни эр этерик да, къара джер этерик да, тиширыуду.
Сакъ юйюне сау барыр.
Ёлюр джаннга, ёкюл джокъ.
Тилчи тилден къаныкъмаз.
Малны кют, джерни тюрт.
Эм уллу байлыкъ – джан саулукъ.
Биреуню эскиси биреуге джангы болмайды.
Джарлы джети элни сёзюн этер.
Артына баргъанны, къатына барма.
Эр абынмай, эл танымаз.
Кёб ант этген, кёб ётюрюк айтыр.
Ач, тоймам, дейди, тойгъан, ач болмам, дейди.
Ач къарным, тынч къулагъым.
Эки ойлашыб, бир сёлешген.
Аманны эки битли тону болур, бирин сеннге кийдирир, бирин кеси киер.
Aдам боллукъ, сыфатындан белгили.
Чомарт къонакъ юй иесин сыйлар.
Баланы адам этген анады.
Джарлы эскисин джамаса, къууаныр.
Сакъалы текени да бар, мыйыгъы киштикни да бар.
Чакъырылгъанны аты, чакъырылмагъанны багъасы болур.
Билим насыб берир, билим джолну керир.
Ана кёлю – балада, бала кёлю – талада.

Логин:	Регистрация

Пароль:	Забыли пароль?

Запомнить меня

Аудио

Каракетов Махар

Скачать

Адрес