Аудио :: Аудио:: Семенова С

Эм ашхы къайын ана мамукъ бла башынгы тешер.
Къатын байлыкъны сюер, эр саулукъну сюер.
Ач да бол, токъ да бол – намысынга бек бол.
Билимсиз иш бармаз.
Иги джашны ышаны – аз сёлешиб, кёб тынгылар.
Татлы сёз – балдан татлы.
Уллу сёлешме да, уллу къаб.
Къолунгдан къуймакъ ашатсанг да, атаны борчундан къутулмазса.
Урунуу – насыбны анасы.
Кёб ашасанг, татыуу чыкъмаз, кёб сёлешсенг, магъанасы чыкъмаз.
Акъыллы – эл иеси, тели – эл баласы.
Къызын тута билмеген, тул этер, джашын тута билмеген, къул этер.
Мураты болгъанны джюрек тебюую башхады.
Aдам боллукъ, сыфатындан белгили.
Байма, деб да, къууанма, джарлыма, деб да, джылама.
Бёрю да ач къалмасын, эчки да ашалмасын.
Къатын къылыкъсыз, эр тынчлыкъсыз.
Намысы болмагъанны, сыйы болмаз.
Кёлю джокъну – джолу джокъ.
Эринчекге кюн узун.
Баш – акъыл ючюн, акъылман – халкъ ючюн.
Атлыны ашхысы, ат тизгининден билинир
Нёгерсизни джолу узун.
Джыйырма къойну юч джыйырма эбзе кюте эди.
Бир онгсуз адам адет чыгъарды, деб эштирик тюлсе.
Алма терегинден кери кетмез.
Адамны артындан къара сабан сюрме.
Нарт сёз къарт болмаз.
Тойгъан джерден туугъан джер игиди.
Бир абыннган – минг сюрюнюр.
Бети къызарыучу адамны, джюреги харам болмаз.
Аман киши кеси юйюнде – къонакъ.
Тенгинг джокъ эсе – изле, бар эсе – сакъла!
Джашынгы кесинг юретмесенг, джашау юретир.
Адамны бетине къарама, адетине къара.
Тёрени джагъы джокъ.
Биреу ашаб къутулур, биреу джалаб тутулур.
Айырылмаз джууугъунга, унутмаз сёзню айтма.
Билмейме деген – бир сёз
Къан бла кирген, джан бла чыгъар.
Кюн – узун, ёмюр – къысха.
Эл ауузу – элия.
Бет бетге къараса, бет да джерге къарар.
Накъырданы арты керти болур.
Адеб этмеген, адеб кёрмез.
Ишге юренсин къоллары, халкъ бла болсун джоллары.
Тау башында, тау болмаз, джангыз терек, бау болмаз.
Кимни – тили, тиши онглу, кимни – къолу, иши онглу.
Нёгер болсанг, тенг бол, тенг болмасанг, кенг бол.
Абынмазлыкъ аякъ джокъ, джангылмазлыкъ джаякъ джокъ.

Логин:	Регистрация

Пароль:	Забыли пароль?

Запомнить меня

Аудио

Семенова С

Скачать

Адрес