Эльбрусоид :: Эльбрусоид

Эр абынмай, эл танымаз.
Уллу къашыкъ эрин джыртар.
Джылар джаш, атасыны сакъалы бла ойнар.
Таякъ этден ётер, тил сюекден ётер.
Кюлме джашха – келир башха.
Тау башында, тау болмаз, джангыз терек, бау болмаз.
Адамны аты башхача, акъылы да башхады.
Джыгъылгъанны сырты джерден тоймаз.
Нёгер болсанг, тенг бол, тенг болмасанг, кенг бол.
Адамны бетине къарама, адетине къара.
Дуния мал дунияда къалады.
Джан саулукъ бермей, сан саулукъ бермезсе.
Биреуню тёрюнден, кесинги эшик артынг игиди.
Туз, гырджын аша, тюзлюк бла джаша.
Джолунга кёре – джюрюшюнг, джагъанга кёре – юлюшюнг.
Кёбден умут этиб, аздан къуру къалма.
Эл ауузу – элия.
Суугъа – таянма, джаугъа – ийнанма.
Къаллай салам берсенг, аллай джууаб алырса.
Агъач халкъгъа алтынды, иссиликге салкъынды.
Рысхысына кёре, джаш ёсер, къышлыгъына кёре, мал ёсер.
Адамны джюреги нени кёрюрге сюйсе, кёзю да аны кёрюрге ёч болады.
Ашына кёре табагъы, балына кёре къалагъы.
Юй ишлеген балта эшикде къалыр.
Ётюрюкчюню шагъаты – къатында.
Ашха уста, юйюнде болсун
Ачлыкъда тары гырджын халыуадан татлы.
Къуллукъчума, деб махтанма, къуллукъ – хаух джамчыды!
Аман эсирсе, юйюн ояр.
Эки къатын алгъанны къулагъы тынгнгаймаз.
Арба аугъандан сора, джол кёргюзтюучю кёб болур.
Ариу сёзде ауруу джокъ.
Сабыр джетер муратха, сабырсыз къалыр уятха.
Кёл – къызбай, къол – батыр.
Экеу тутушса, биреу джыгъылыр.
Джарлы джети элни сёзюн этер.
Баргъанынга кёре болур келгенинг.
Тил – миллетни джаны.
Ойнай-ойнай кёз чыгъар.
Гугурук къычырмаса да, тангны атары къалмаз.
Чабакъгъа акъыл, табагъа тюшсе келеди.
Ёлюк кебинсиз къалмаз.
Кесинге джетмегенни, кёб сёлешме.
Аман адамны тепсинге олтуртсанг, къызынгы тилер.
Таугъа чыгъаллыкъ эсенг, тюзде къалма.
Биреуню эскиси биреуге джангы болмайды.
Келинин тута билмеген, къул этер, къызын тута билмеген, тул этер.
Баш болса, бёрк табылыр.
Адам бла мюлк юлешмеген эсенг, ол адамны билиб бошагъанма, деб кесинги алдама.
Ата Джуртуму башы болмасам да, босагъасында ташы болайым.