- Джаралыны джастыгъында сау ёлюр.
- Аллахдан тилесенг, кёб тиле.
- Нёгер болсанг, тенг бол, тенг болмасанг, кенг бол.
- Ауурну тюбю бла, дженгилни башы бла джюрюген.
- Сабий болмагъан джерде, мёлек болмаз.
- Эллинг бла джау болсанг да, юйюнг бла джау болма.
- Акъылсызны джууукъгъа алма, акъыллыны кенгнге салма.
- Сакъ юйюне сау барыр.
- Тил бла келеди джыр да.
- Ач – эснер, ат – кишнер.
- Тамчы таш тешер.
- Иги – алгъыш этер, аман – къаргъыш этер.
- Итли къонакъ джарашмаз.
- Юй ишлеген балта эшикде къалыр.
- Кимни – тили, тиши онглу, кимни – къолу, иши онглу.
- Кёб къычыргъандан – къоркъма, тынч олтургъандан – къоркъ.
- Мухар, кеси тойса да, кёзю тоймаз.
- Къатын байлыкъны сюер, эр саулукъну сюер.
- Зар адамны насыбы болмаз.
- Ана – юйню кюн джарыгъы.
- Садакъачыны джаны – къапчыгъында.
- Ашаса, ашамаса да, бёрюню ауузу – къан.
- Халкъны юйю – туугъан джери.
- Адам къыйынлыгъын кёлтюрюр, зауукълугъун кёлтюрмез.
- Гитче джилтин уллу элни джандырыр.
- Джарлы эскисин джамаса, къууаныр.
- Къыйынлы джети элни къайгъысын этер.
- Иги болса, тамадама – махтау, аман болса, меннге – айыб.
- Чакъырылгъанны аты, чакъырылмагъанны багъасы болур.
- Джюрекден джюрекге джол барды.
- Джыгъылгъанны сырты джерден тоймаз.
- Ойнай билмеген, оюн бузар.
- Джылар джаш, атасыны сакъалы бла ойнар.
- Ата – билек, ана – джюрек!
- Чалманны аллы къалай башланса, арты да алай барады.
- Адамны сабийин сюйген джюреги, бычакъча, джитиди.
- Тёгюлген тюгел джыйылмайды.
- Киштикге къанат битсе, чыпчыкъ къалмаз эди.
- Къарыусузгъа кюлме, онгсузгъа тийме.
- Накъырданы арты керти болур.
- Бек анасы джыламаз.
- Чёбню кёлтюрсенг, тюбюнден сёз чыгъар.
- Ишленмеген джаш – джюгенсиз ат, ишленмеген къыз – тузсуз хант.
- Сабийни джумушха джибер да, ызындан бар.
- Татлы сёз – балдан татлы.
- Хазыр ашха – терен къашыкъ.
- Билим къая тешер.
- Аджаллыгъа окъсуз шкок атылыр.
- Ариу сёз – джаннга азыкъ, аман сёз – башха къазыкъ.
- Иги адамны бир сёзю эки болмаз.