- Ариуну – ауруу кёб.
- Юйюнг бла джау болгъандан эсе, элинг бла джау бол.
- Ишни аллы бла къууанма да, арты бла къууан.
- Кютгени беш эчки, сызгъыргъаны уа, джерни джарады.
- Аман эсирсе, юйюн ояр.
- Дженгил джетерикме деб, узун джолну къоюб, къысхасын барма.
- Ариу сёз – къылычдан джити.
- Экиндини кеч къылсанг, чабыб джетер ашхам.
- Къыз келсе, джумуш эте келеди, къатын келсе, ушакъ эте келеди.
- Тёрени джагъы джокъ.
- Халкъгъа джарагъан, джарлы къалмаз.
- Тойгъа алгъа да барма, тойда артха да къалма.
- Джашлыкъ этмеген, башлыкъ этмез.
- Джырчы ёлсе, джыры къалыр.
- Къонакъ хазыр болгъанлыкъгъа, къонакъбай хазыр тюлдю.
- Хоншуну тауугъу къаз кёрюнюр, келини къыз кёрюнюр.
- Аш иеси бла татлыды.
- Рысхы джалгъанды: келген да этер, кетген да этер.
- Тил бла келеди джыр да.
- Аш хазыр болса, иш харам болур.
- Ёлмесенг да, къарт дамы болмазса?
- Башы джабылгъан челекге, кир тюшмез.
- Ач къарынны, токъ билмез
- Джюрекден джюрекге джол барды.
- Къуллукъчума, деб махтанма, къуллукъ – хаух джамчыды!
- Къазанда болса, чолпугъа чыгъар.
- Илму – джашауну джолу.
- Мен да «сен», дейме, сен да «кесим», дейсе.
- Алтыда кюлмеген, алтмышда кюлмез.
- Билим къая тешер.
- Мухардан ач ычхынмаз.
- Ата Джуртча джер болмаз, туугъан элча эл болмаз.
- Байны къызы баймакъ болса да, юйде къалмаз!
- Иги джашны ышаны – аз сёлешиб, кёб тынгылар.
- Сёз садакъдан кючлюдю.
- Тил джюрекге джол ишлейди.
- Джаш болсун, къыз болсун, акъылы, саны тюз болсун.
- Намысы болмагъанны, сыйы болмаз.
- Бал ашаргъа сюе эсенг, чибин ургъаннга тёз.
- Билеги кючлю, бирни джыгъар, билими кючлю, мингни джыгъар.
- Кёрмегеннге кебек – танг, битмегеннге сакъал – танг.
- Билими азны – ауузунда кирит.
- Нарт сёз – тилни бети.
- Кёб къычыргъандан – къоркъма, тынч олтургъандан – къоркъ.
- Джетген къыз джерли эшекни танымаз.
- Аман хансны – урлугъу кёб.
- Азыгъы аз, алгъа къабар, аты аман, алгъа чабар.
- Джети тилни билген джети кишиди.
- Хар зат кесини орнуна иги.
- Таякъ этден ётер, тил сюекден ётер.