ИНЖИ БЮРТЮКЛЕ

elbars 24.03.2019 17:28:16
Сообщений: 2283

ИНЖИ БЮРТЮКЛЕ

ФАРС ХАЛКЪ БЛА АНЫ НАЗМУЧУЛАРЫ АЙТХАН АКЪЫЛ (УЧУКЪ) СЁЗЛЕ

Хурметли окъуучу, бу акъыл-учукъ сёзлени окъуп башлардан алгъа, санга бир-эки сёз айтыргъа сюеме. Бу китап – китапла китабыды, кёп айтхылыкъ чыгъармаланы инжи бюртюклеринден тизилген тамаша боюнчакъ. Аны жазгъанла – битеу адам улусуна белгили, фарс тилли шайырла, акъылманладыла – таматалары Рудаки IX-чу, кичилери Бахар а – XX-чы ёмюрде жашагъан. Айтхылкъ шайырла бла бирге, мында белгисиз акъылманланы къачан эсе да бирде айтхан акъыл сёзлери да бардыла. Ёмюрден ёмюрге, аууздан ауузгъа ёте, халкъ аланы бюгюннге дери, сыйлы кёрюп, сакълагъанды. Кесигиз билгенликден, акъыл-учукъ сёзлени бири да – нарт сёзлени да алагъа къошуп – не салым[1], не таза ахыр хакъ тюйюлдю. Кече кюнню ёнгюча[2], хар нени да эки бети-жаны. Бир бир акъыл сёзлени оюмлары, кёз къарамлары уа бизни бюгюннгю ангылауубузгъа чюйре окъуна келеди. Алай анга сейир этерге керек болмаз – андан бери, не азындан, XII ёмюр озгъанды. Алайды да, багъалы окъуучу, китапны ачханса, аны ахырына дери окъуп чыкъсанг, санга саугъа, манга уа насып болур деп умут этеме.

Ёлмезланы Мурадин

[1] Салым – тёре, закон.
[2] Ёнг – затны башха жаны, оборотная сторона.

Изменено: elbars - 24.03.2019 17:29:15

Ответы

elbars 20.05.2019 19:07:35
Сообщений: 2283

*
Шугут игиликни билсе да,
Огъурсузлай къалады.
Парий арбаз сакълай эсе да,
Ол итди. Ол – къабады.

(Санаи)

*
Ургъуй ичеди къан, алай
Кёп бармай ол ёлюр.
Пил чапыракъ, кырдык отлай,
Жашайды сау ёмюр.

(Санаи)

*
Не гитче эсе да игилик,
Жылтырайды жулдузчукъ кибик.
Ол уллу эсе уа – кюн:
Жарытады жер юсюн.

(Низами)

*
Шугу[1] бла урушургъа
Базалмайса кесинг.
Амалсызгъа болушургъа
Жетге эди эсинг.

(Низами)

[1] Шугу – зло.

Изменено: elbars - 20.05.2019 19:09:15

elbars 21.05.2019 19:21:58
Сообщений: 2283

*
Генезир тахны къолгъа
Эталса, палах келир.
Акъылы, ётю болгъан
Къалмай, халкъ саудан ёлюр.

(Руми)

*
Сындырма сен адам жюреклени –
Къошмазса ууалгъан кесеклени.

(Аухададдин Аухади)

*
Къычырма, тели, хахайынг бара,
Алгъа кеси сабийинге къара.

(Саади)

*
Сен исси къапдырсанг генезир[1] аманнга,
Тенгим, кёл кенгдиресе.
Кёзбаусуз игилик эталсанг а анга,
Кесинги кётюресе.

(Саади)

*
Жардам тилемеген эсенг да,
Болушургъа келдим санга.
Бирде къууандырырса сен да,
Жарап бир амалсыз жаннга.

(Саади)

[1] Генезир – мерзкий, подлый.

elbars 22.05.2019 23:46:30
Сообщений: 2283

*
Сомахлыгъа[1] акъыл юйретме –
Сен кюн этмезсе кечени.
Сокъур кёзге чыракъ да элтме –
Зырафды къыйынынг сени.

(Саади)

*
О залим къанлы,
Этмейсе сагъыш:
Ызынгда къаллыкъ –
Ёмюрлюк къаргъыш.

(Саади)

*
Биреуню юйюн чачхан начас,
Бил: насыбынгы этгенсе тас.

(Саади)

*
Тенгинг къыйынлыкъда эсе,
Болуш анга, узат да къолунгу,
Ол къутхарыр, ачар да жолунгу,
Бирде аны ырхы кессе.

(Саади)

*
Бизге акъыл берликсе бюгюн сен,
Аллыбызда туруп.
Алай алгъа кетер жюрегингден
Жалынынгы, къырып.

(Джами)

[1] Сомахлы – туповатый.

elbars 23.05.2019 17:56:32
Сообщений: 2283

*
Булутла, тилейме мен сизге,
Жауунла келтиргиз тюзге.
Сабанла кюе, къуруй кёлле да, –
Не хайыр – жауасыз тенгизге.

(Джами)

*
Къыйын жолгъа чыгъаса: базма,
Тебреме сен къайтмаз жары.
Шуёхунга уру да къазма –
Кесинг тюшерсе сен ары.

(Джами)

*
Дайым игилик этген чакъда
Къыйынлыкъ, шугу да узакъда.

*
Залимлик барады жол,
Хар кимге жетеди къол.
Да чыгъар анга да кюч,
Не залим эсе да ол.

*
Хата, палах этсенг,
Къоркъууунга тюберсе.
Уру къазып кетсенг,
Ары кесинг тюшерсе.

elbars 24.05.2019 20:03:55
Сообщений: 2283

Vll . БУШУУ БЛА КЪУУАНЧ

*
Къыйынлыкъ этсе тютюн,
Чий отун кибик жана,
Жер жюзюн жарытмай кюн,
Къарангы къысар аны.

(Шахид Балхи)

*
Не ийсе да кюн, анга
Тюбегин сен хош.
Кетгеннге уа? Озгъаннга,
Къой, жарсыма бош.

(Рудаки)

*
Къыйынлы да, къууанчлы да кетерле.
Тюз этелле, зауукълу жашай эрле.

(Фирдоуси)

*
Кёп, аз да жашайыкъ даулу жерде,
Оза татлысындан ачы татыраны.
Бир кюнча ётерикди ол бирде,
Шукур анга да. Сыйлайыкъ аны.

(Гургани)

elbars 25.05.2019 20:54:04
Сообщений: 2283

*
Бушуу бизге умут берип турады,
Эрип кетеди къар, жылыу келсе.
Жалан да кёлсюзлюк рахын тууады
Кёлсюзлюкден, жалан да бир кеси.

(Гургани)

*
Къууанч гюлю, кёрдюк,
Санлап бирде чагъады,
Кеси да тёзюмлюк
Бюртюгюнден чыгъады.

(Гургани)

*
Унут да дауунгу,
Къууан – жигитсе, эр!
Къууанч узакъ этер
Жерде жашауунгу.

(Гургани)

*
Тенгизге къажау
Сюелген тамчы,
Къой, санга ачы
Бошалыр жашау.

(Руми)

elbars 26.05.2019 22:35:49
Сообщений: 2283

*
Адам жашауунда
Кёп палах чегер.
Аны бушуундан
Тау окъун чёгер.

(Саади)

*
Къыйнама кесинги: хар зат да,
Хар не да – хаух, насып да – аз.
Кече дорбунча асыууатды[1],
Алай ол кюн бла бууаз.

(Саади)

*
Жашауну къысхалыгъын биле,
Турма да анга къара кийип,
Сен зауукъ жаша ойнай-кюле,
Сен ариу жаша, жаша сюйюп.

(Хафиз)

*
Къууанч сакълау – билеме энди –
Татлыды, татыулуду кесинден да.

(Джами)

[1] Асууат – къарангы кече.

elbars 27.05.2019 19:10:51
Сообщений: 2283

*
Ахырында – ким билмейди аны –
Къууанч, бушуу да – кюл.
Алай анга жарсыу акъылманны
Иши тюйюл.

(Шохин)

*
Балдан татлы эсе жашау,
Ёмюр да кюнча кёрюнюр.
Алай ачы эсе уа, хау,
Жангыз сагъат да – сау ёмюр.

*
Бушуу жете эсе –
Черек-черек.
Алай кете эсе –
Челек-челек.

*
Бушуу мени абындыра, жыгъа,
Манга науруз келлик болмаз, баям.
Жерде къууанчлылагъа, насыплыгъа
Хар кюн – науруз, хар чакъ – байрам.

*
Къоркъа да элгене,
Алай жашай келдинг.
Ахырында уа – не?
Кюн кёрмейин ёлдюнг.

elbars 28.05.2019 19:09:15
Сообщений: 2283

*
Онгу бар жашасын алай –
Юйрей, къайнай жашау кюйю.
Къууанч кетер, озар, алай
Бушуу да ёмюрлюк тюйюл.

*
Бушуу, туду эсенг,
Ызынг бла жюрюр,
Эшиклени этсенг,
Терезени кирир.

*
Байрымгюл къууанчны
Шинжили бушууу:
Жашауну шербети,
Къорамаз да ууу.

*
Бушуу кюнлеринги да багъала, терге,
Ала да жокъ болалла ёмюрге.

elbars 29.05.2019 18:27:28
Сообщений: 2283

Vlll . КЕРТИ БЛА ТЮЗЛЮК

*
Жокъду деме бир затым да. –
Жюрегинг сары алтынды.

(Кисаи)

*
Бийикди шинтигинг, олтур.
Алай а, жаннетли боллукъ,
Адамланы къыйнамай тур,
Ала бергендиле къуллукъ.

(Фирдоуси)

*
Жюреги жалгъан аны,
Ниети жалын аны.
Келямын тюзге, хакъгъа
Дайым ушатханлыкъгъа.

(Фирдоуси)

*
Къарангыда жюрюйдю ётюрюк,
Жолу жилян ызы кибикди.
Керти уа ёлюмсюздю, ёмюрлюк,
Жолу да тюз, жарыкъ, бийикди.

(Фирдоуси)

*
Кертисин кючлю адам айтады,
Ётюрюг а – къарыусуз, къайда да.

(Фирдоуси)

elbars 30.05.2019 20:10:40
Сообщений: 2283

*
Жюреги уллу, таза, таукел адам
Ётюрюк бла тилин этмез харам.

(Фирдоуси)

*
Тюзлюк батыр бла болур къуру да.
Тюзлюк – асыл ханны къалаууруду.

(Фирдоуси)

*
Жюреклеге асыууду ётюрюк,
Халыуадан татлыды ол кеси да.
Алай ауур керти, аны кёрдюк,
Ётюрюкден татлы, ачы эсе да.

(Унсури)

*
Не ачы эсе да кертини толу
Гоппаны,
Досум, тюбюне дери тогъу
Сен аны.

(«Кабус-наме»)

*
Ол аты айтылырын сюйген,
Жукъ къызгъанма амандан да сен.

(«Кабус-наме»)

elbars 02.06.2019 01:20:10
Сообщений: 2283

*
Сен болма итликден сокъур,
Уллулукъдан – сакъат.
Адам эсенг, адамча тур
Тюрленмей хар сагъат.

(Насир Хосров)

*
Тюрт сёзлю, ётрюкчю да сен
Нек боласа? Дауурлуду ол.
Терекни быхчы бла кесген,
Жугъунгу ачытмазгъа сакъ бол.

(Насир Хосров)

*
Итлик жашауунгу созмаз.
Ёмюрледен да ол алайды.
Харам къанлы адам онгмаз:
Аны шо ёз ити талайды.

(Насир Хосров)

*
Сёз бла халсыз тели къагъар.
Бир жанны да бош ачытма, не,
Хахайлап, тюкюрме бетине,
Ансы бетинге къара жагъар.

(Насир Хосров)

elbars 02.06.2019 17:54:15
Сообщений: 2283

*
Къарыу, зорлукъ да кючлеген
Жерде тюзлюк тапмазса сен.

(Сузани)

*
Тюзлюкню бети жарыкъ болгъан
Къыралда даражалыды хан.

(Санаи)

*
Шекер къамиш бийик
Ёсюп, сыйдамды, тюз.
Юлкю уа – чырмашып,
Шинжилери да – жюз.

(Низами)

*
Къулну къыйнама, сен урсанг,
Тюйсенг – тебер, талар.
Итни сылай-сылай турсанг,
Чуругъунгу жалар.

(Саади)

*
Жюреги шугу, харам
Ниети болгъан жашха
Тюз сёзюнг болмаз жардам:
Чюй урмазса сен ташха.

(Саади)

elbars 03.06.2019 20:02:24
Сообщений: 2283

*
Ётюрюк бетсиз этеди,
Намыссыз, ётсюз этеди.

(Саади)

*
Керти айтхан – тутулду,
Жалгъан сёзлю – къутулду.

(Саади)

*
Къылыч бла ургъанча сен,
Билип ётюрюкле айтханса,
Жара да, хау, болады сау,
Аны табы къаллыкъды ансы.

(Саади)

*
Патчахса сен, халкъны тонап жашайса.
Сен – юй башха балчыкъ сылар ючюн,
Топракъ ала, тюбюн – мурдор кючюн –
Къазгъан акъылсызгъа нечик ушайса.

(Саади)

*
Жыгъылгъаннга сен къол
Узат, кёрдю эсенг.
Хакъын билирсе, жол
Абындырса, кесинг.

(Саади)

elbars 04.06.2019 21:26:03
Сообщений: 2283

*
Сен кертиден, хакъдан жанлай
Барсанг, этер талан да тюз алай.

(Саади)

*
Билимсиз тюзлюк – сокъур, аны терге.
Ол ишсиз да къанатын кермез.
Тамырын терен иймез да ол жерге,
Татыулу кёгет, жемиш бермез.

(Аухададдин Аухади)

*
Тюзлюкю кемсиз сюйген
Бир керти адам эсенг,
Ёлгенден сора да сен
Жашарыкъса сау-эсен.

(Хафиз)

*
Тюзлюк бла асыл патчах
Болгъан къырал алайды:
Кери кетип хата, палах,
Айныйды, къуралады.

(Джами)

*
Харамлыкъ, шеклик да, тил да
Къыралны къору тюйюлдю.
Фитналыкъ заран бюртюкдю.
Къыралны къору тюзлюкдю.

(Джами)

elbars 05.06.2019 21:05:23
Сообщений: 2283

*
Сёзюне кёре жетер
Адамгъа хурмет, хатер.
Жалгъанчы уа дуньядан
Бедиши бла кетер.

(Джами)

*
Бир тынч этип къояса ант,
Ётюрюгюнг чыгъып къала.
Шашып да сен керти айтхан
Болмазса, билчи уяла!

(Джами)

*
Терек бахча жашнар къумда да,
Тюзлюк жюрюй эсе анда.
Жюрек тынчлыкъ болур къулда да,
Тюзлюк жюрюй эсе анда.

*
Ётюрюк жарашдырлыкъ эсе,
Жокъ анда гюнах.
Кертиси урушдурлукъ эсе,
Айтма: узайсын палах.

*
Ётюрюкчюню юйю кюйдю,
Халжары, бичен тиши да.
Къычырыкъ этди, кесин тюйдю:
Жиляугъа ийнанмады киши да.

elbars 06.06.2019 16:51:31
Сообщений: 2283

*
Ётюрюкчю, эки бетли
Сыйлы тюйюлдю, хурметли.

*
Бушууну аллын тыйгъан
Ётюрюк, жигитлиги
Жетмей, къылычын къыйгъан
Кертиден къайда иги.

*
Оноуунг къалай боллукъду ансы,
Къадий, шинтикге къынгыр къоннганса.

*
Терслик тутулду, –
Бир махтау.
Тюзлюк къутулду, –
Минг махтау.

elbars 07.06.2019 22:18:06
Сообщений: 2283

lX . БАЙЛЫКЪ БЛА ЖАРЛЫЛЫКЪ,
ЧОМАРТЛЫКЪ БЛА МОМАРТЛЫКЪ

*
От бла, къылыч бла келген,
Къолайлыкъ, керек тюйюлсе сен.

(Фирдоуси)

*
Къырслыкъ къолу къуруду, къуу,
Онглагъаны тузакъ болады.
Салады жюрекге къоркъуу,
Ауур унугъуулукъ салады.

(Фирдоуси)

*
Сен, адам, болма зар, хылжы[1] да, бил:
Къызгъанчлыкъны къулу – адам тюйюл.

(Фирдоуси)

*
Къырслыкъ кирсе, киши чыгъаралмаз
Жюрегингден аны, тартып, артха.
Сен жалынсанг да акъылман къартха,
Насийхаты санга себеп болмаз.

(Фирдоуси)

[1] Хылжы – скупердяй.

elbars 08.06.2019 19:32:16
Сообщений: 2283

*
Байыкъсанг, гиреж жауунг
Симсирер, кючюнг къарыр да.
Шуёхунг болуп къалыр да,
Унутур дертин, дауун.

(Фирдоуси)

*
Пил уугъа да барыучуса сен.
Алай болма асыры базгъын. Санга да,
Дайым жарлылыкъ сюнгюсюнден
Къоркъургъа керекди, тап – ханнга да.

(Бейхаки)

*
Сатып алыр жерни, кёкню
Харам ахча, алай, алай,
Адепликликни, сюймекликни
Къалай алыр, къалай, къалай?!

(Асади Туси)

*
Жюрегин алгъан эсе
Жут къырслыкъ, аны
Ёлгеннге сана да къой,
Чыкъгъаннга жаны.

(Асади Туси)

elbars 09.06.2019 18:37:56
Сообщений: 2283

*
Къырслыкъны себилип урлугъу,
Сабанны кёгерсе да бети,
Тирлиги жыйылмаз уругъа,
Татыранча болуп кёгети.

(Насир Хосров)

*
Къырслыкъ кючлюдю, хорлатсанг,
Кетмез ачыу берир санга.
Байлыкъ кёзбауду, алдатсанг,
Тюшюп къалырса къапханнга.

(Масуд Сад Салман)

*
Жашым, къоркъ къырсны саугъасындан,
Атлагъан да этме босагъасындан.

(Аттар)

*
Санлап биреу табады чий алтын, алай
Тохтамай иш этип тургъан болады бай.

(Руми)

*
Къойчу байлыкъны къулун:
Зат да эталмазса.
Къырслыкъны къыланч жолун,
Сен тюзетмезсе.

(Саади)

elbars 10.06.2019 20:02:54
Сообщений: 2283

*
Бир къырс киши юрюк[1] суугъа кетип,
Былай дегенди, къычырыкъ этип:
«Кючю Уллу, сыйлы чалмам – жангы,
Заран, зиян этдирме сен анга!»

(Саади)

*
Къарт тишсиз эсе да, ол
Къабалыр эди хантын.
Не хайыр тиши бардан,
Жокъ эсе ашар заты?

(Саади)

*
Ашлаудан къатхан гирях
Тилеген къолну уруп,
Башынга уллу гюнах,
Алма, итча къутуруп.

(Саади)

*
Акъылына кёреди къуллугъу,
Байлыгъына кёре – асыллыгъы…
Алай суннган, сен жангыласа бек.
Жибек да жай анга, эшек – эшек.

(Саади)

[1] Юрюк – бурная река.

elbars 11.06.2019 18:51:46
Сообщений: 2283

*
Къызгъанч сомум къорайды деп жансыз.
Андан тюйюлмюдю хылжы жангыз?

(Саади)

*
Аз жатады бай къызгъанч тоюп,
Кийимин да чирисе тешеди.
Бир кюн бир а, хазнасын къоюп,
Ол, къуру къоллу, кёрге тюшеди.

(Саади)

*
Ач къарын тойса – къояр.
Кёз а не хазна тояр.

(Саади)

*
Къызгъанч мискин
Кюбюрюне бугъуп,
Лобанча, кёрмей кюн,
Жашайды унугъуп.

(Саади)

*
Халал жашны чомартлыгъы женгеди:
Сансыз этмез къартны, не ёксюзню.
Къырсны уа ёз къызгъанчлыгъы жегеди,
Туз арбагъа жекгенча ёгюзню.

(Саади)

elbars 12.06.2019 19:16:24
Сообщений: 2283

*
Къоранчларынгы кемейт, файданг азда,
Тынгыла да халкъ айтхан жыргъа:
«Жаумай, кюн къысып турса жазда,
Фыратны[1] сууу да таркъайыр жылгъа.

(Саади)

*
Сыйсызса, хау, алтакъ,
Шо не десенг да сен,
Кюбюр толу алтын
Жыйгъан эсенг да сен.

(Саади)

*
Накъут-налмас, алтын-кюмюш жыя,
Жашлыкъ алтынынгы этгенсе сен зая.

(Саади)

*
Бош эсе элтир бохчанг,
Кенг дуньянг, къабырча, тар.
Кёп эсе алтын ахчанг,
Аллай бир къайгъынг да бар.

(Амир Хосров)

[1] Фырат - Евфрат

elbars 13.06.2019 18:01:52
Сообщений: 2283

*
Къызгъанчса, досум. Болма сен былай
Къысмар[1] да, къырс да хоншугъа, тенгнге.
Жашау кетип барады, шо бир айт,
Сен кёпмю элтириксе биргенге?

(Амир Хосров)

*
Хазнанг азатлыгъынг тюйюл,
Сени тузакъ юйюнгдю ансы.
Жашауунгу этгенсе кюл:
Кюбюр къулу болуп къалгъанса.

(Ибн Йамин)

*
Байлыкъ жауунг, байлыкъ тенгинг
Болур жашауунгда,
Къайсы – къаршынг, къайсы – кенгинг –
Кеси сайлауунгда.

(Ибн Йамин)

*
Жер чомартды,
Огъурлу эсе адам,
Къырс момарт а
Кемди аллай саугъадан.

(Джами)

[1] Къысмар – прижимистый.

elbars 14.06.2019 18:05:30
Сообщений: 2283

*
Тютюнден башхамыды умут
Этдирип кетген къургъакъ булут?

(Навои)

*
Чагъырдан сархош болгъан
Сейир тюйюлдю бир да.
Байлыкъдан эсирмеген,
Къутурмагъан сейирди.

(Саиб)

*
Къысмар, сокъур къызгъанчлагъа
Тырман этген, ургъуй къапхан да бир.
Жюреклери отда къатхан темир –
Шо неда не ол ачлагъа!

(Сайидо)

*
Юйюм, юсюм да байды деп махтанма.
Ол бюгюн бар ахчанг, бирси кюн – тас.
Тюрюм[1] жулдузду, айды деп махтанма,
Кёп бармай нюрюнгден тамчы къалмаз.

*
Залимни дауу –
Тюзлюкню жауу,
Алтынны къулу,
Къан жугъу – къолу.

[1] Тюр – вид, облик.

elbars 15.06.2019 18:26:52
Сообщений: 2283

*
Къырсдан туз алгъан –
Кёкден жулдуз алгъан.

*
Жарлы излейди, тапмайды бир жукъ да
Ансы.
Тапса да къайры, къалайгъа саллыкъды
Ансы?

*
Сени палауунгдан тата къара сокъур
Былай сунады, эшта:
«Ол жут эки къолу бла ашай болур», –
Ёчеш да!».

*
Бай этди харам иши.
Энди гытычыкъ – такъыр.
Къатыны да эриши,
Хоншусу да – бир факъыр.

*
Къырс берсе, кючден-бутдан берир,
Сора махтана эрикдирир.

elbars 16.06.2019 22:56:48
Сообщений: 2283

*
Жаулу жёрме –
Байла, бийле ашы.
Даулу ёрме –
Ёксюз сабийле ашы.

*
Жоргъа – арыр, жауун – тохтар,
Садакъ – атар, къылыч – кесер,
Кырдык – кюер, насып – алдар,
Жашау – къысар, къадар – эзер.

elbars 17.06.2019 18:57:19
Сообщений: 2283

X . УРУШ БЛА УРУШЧУЛУКЪ

*
Кючлю душман бла къаты уруш эте, аскер
Хорлай эсе, аскербекни уллулугъун эскер.

(Рудаки)

*
Къолгъа сауут алгъан
Сагъыш этсин алгъа:
Тюзню жойсун деп сер
Ишленмейди семсер.[1]

(Рудаки)

*
Аскербеги тели эсе
Кючю уллу аскер да неди?!
Аскерчикге да жюгюнеди[2]
Батыр башчы эсли эсе.

(Абу Шукур)

*
Урушдан къоркъгъан улан сыйсызды.
Тергемез аны къатын да, къыз да.

(Абу Шукур)

[1] Семсер – эки къол бла тутарча, узун саплы къылыч.

[2] Жюгюн – покориться.

elbars 18.06.2019 17:47:47
Сообщений: 2283

*
Эрликни шарты тюйюлдю ол –
Бош жерде къылыч сууурма, къол!

(Фирдоуси)

*
Юйюнге кирмез айып, жерде
Жолунгу жигитча бошасанг.
Къалтырай, къоркъакъча жашасанг,
Айыбынг кетип къалмаз бирде.

(Фирдоуси)

*
Урушха элтеди терк-терк жол:
Сора эр намыс бла ёлсек,
Кёп да махтаулуду, досум, ол,
Ёмюрлюк жанла тюйюл эсек.

(Фирдоуси)

*
Батыр болсакъ жауну къырырбыз,
Къоркъсагъ а – кесибиз къурурбуз.

(Фирдоуси)

*
Къалтырауукъ тийип тургъан жашха
Да не келликди бедишден башха?!

(Фирдоуси)

elbars 19.06.2019 17:52:29
Сообщений: 2283

*
Къылычын быргъап кери,
Ол ётсюз, бетсиз да жан
Сюркелсин юйге дери…
Батырлалла хорлагъан!

(Асади Туси)

*
Жау бла уруш эте, къама, къылыч
Ойнатхан кенгден бакъсангды тынч.

(Асади Туси)

*
Инжи керек улан суудан
Къоркъмаз, терен кирир.
Жигит, батыр боллукъ улан
Жауун бетден бетге кёрюр.

(Гургани)

*
Нек болабыз къан-къыран,
Тёкмейик, итлеча, къан.
Бар эсе мамыр мадар –
Этейик, къорамай жан.

(Низами)

*
Неди кишилик деген?
Кишилик деген а олду:
Бермей урушха къол-жол да,
Дослукъгъа бюсюреген.

(Саади)

Читают тему (гостей: 1)

Форум Мобильный | Стационарный