Расширенный поиск
19 Декабря  2018 года
Логин: Регистрация
Пароль: Забыли пароль?
  • Борчунг бар эсе, хурджунунга ойлаб узал.
  • Джарлыны эшигин махтагъан джабар.
  • Малны кют, джерни тюрт.
  • Къонагъынгы артмагъын алма да, алгъышын ал.
  • Айыбны суу бла джууалмазса.
  • Шайтан алдады, тюзлюк къаргъады.
  • Джыланны къуйругъундан басарынг келсе, аны башы болгъанын унутма.
  • Къралынгы – душмандан, башынгы от бла суудан сакъла.
  • Ёлюр джаннга, ёкюл джокъ.
  • Ашхы адам – халкъ байлыгъы, ашхы джер – джашау байлыгъы.
  • Иги сёз – джаннга азыкъ, аман сёз башха – къазыкъ.
  • Атадан ёксюз – бир ёксюз, анадан ёксюз – эки ёксюз.
  • Телини эшигин, махтау джабар.
  • Адеб джокъда, намыс джокъ.
  • Акъыллы башны – тили къысха.
  • Башсыз урчукъ тюзюне айланмаз.
  • Акъыллы – эл иеси, тели – эл баласы.
  • Юйюнгден чыкъдынг – кюнюнгден чыкъдынг.
  • Этни да ашады, бетни да ашады.
  • Сакъламагъан затынга джолукъсанг, не бек къууанаса, не бек ачыйса.
  • Этни бети бла шорпасы.
  • Ашатыргъа иш – ашхы, ишлетирге аш – ашхы.
  • Ата Джуртуму башы болмасам да, босагъасында ташы болайым.
  • Джол бла сёзню къыйыры джокъ.
  • Эшекге миннген – биринчи айыб, андан джыгъылгъан – экинчи айыб.
  • Дуния малгъа сатылма, кесингден телиге къатылма.
  • Ач уят къоймаз.
  • Ойнай-ойнай кёз чыгъар.
  • Эте билген, этген этеди, эте билмеген, юретген этеди!
  • Соргъан айыб тюлдю, билмеген айыбды.
  • Айран ичген – къутулду, джугъусун джалагъан – тутулду.
  • Адебсиз адам – джюгенсиз ат.
  • Зар адам ашынгы ашар, кесинги сатар.
  • Джаз бир кюнню джатсанг, къыш талай кюнню абынырса.
  • Сагъышы джокъ – джукъучу, акъылы джокъ – къаугъачы.
  • Ёлген аслан – сау чычхан.
  • Бичгенде ашыкъма, тикгенде ашыкъ.
  • Къонакъ болсанг, ийнакъ бол.
  • Къарнынг ауруса, ауузунгу тый
  • Рысхысына кёре, джаш ёсер, къышлыгъына кёре, мал ёсер.
  • Ашлыкъ – бюртюкден, джюн – тюкден.
  • Ашын ашагъанынгы, башын да сыйла.
  • Бастасын ашагъан, хантусун да ичер.
  • Чабакъгъа акъыл, табагъа тюшсе келеди.
  • Урунуу – насыбны анасы.
  • Терек ауса, отунчу – кёб.
  • Алтыннга тот къонмаз.
  • Юре билмеген ит, къонакъ келтирир.
  • Ашхы тенг джолгъа салыр, аман тенг джолдан тайдырыр.
  • Кийиминг бла танылма, адамлыкъ бла таныл.
Страницы: 1
Беш Тау Эл сагъынылгъан не да Анга аталгъан чыгъармаланы сала барайыкъ былайгъа., ЭЛ - магагъанасы кенг, терен, уллу, мийик ангыламды. Эл - эл, Эл - кърал, Эл - джурт, Эл - дуния...
 
БАБАЛАНЫ Ибрахим

БЕШАТАР

Беш тау элни
Беш да тары -
Олду мени
Бешатарым.
 
ЛАЙПАНЛАНЫ Билал

БЕШ ТАУ ЭЛ - БЕШ УУАХТЫ НАМАЗ

Бир джурт болмаз Джерде Кавказча,
Минги Тау да – тёппеси аны.
Беш Тау Эл – беш ууахты намазча,
Кёк нюрюнде джулдуз бла Айны.


«Беш Тау Элни беш да тары –
Олду мени бешатарым»,-
Дегенди Ибрахим Баба,
Джуртдан кёл да, сёз да таба.

Хау, Беш Тау Эл – беш ууахты намаз,
Бешатар ушкок да бизге.
Терсликни Аллах унамаз,
Джол берир Тюзлюкге, Тюзге.

Бизге къазгъан урусуна
Душман кеси тюшмей къалмаз.
Халкъны тынглайма ауазына:
Беш Тау Эл – беш ууахты намаз.
 
ЁЗДЕНЛАНЫ Альберт

ДЖАНЫМ КЪУРМАН БОЛСУН МАЛКЪАРГЪА
(джыр)

Жюрегингде пелиуанлыкъ жашагъан,
Ариулугъу сюймекликге ушагъан,
Тау намысы ушап тауда акъ къаргъа...
Жаным къурман болсун Журтум Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Зар кёз тие кёк суууна,ташына,..
Ариулугъу душман бола башына,
Таш башында амал тапхан жашаргъа,
Жаным къурман болсун тажал Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!


Тешдиртмеген тинин зорлукъ садакъгъа,
Сюргюнде да тилемеген садакъа,
Дерт тутмагъан Аллах берген къадаргъа,
Жаным къурман болсун шыйых Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Жаным саудан ачхан жандет эшигим,
Ёлсем, ырахат жукълар топуракъ бешигим,
Ата Журтум, Ана Сютюм, Къадарым-
Жаным къурман болсун санга, Малкъарым!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!
 
ЖАБЕЛЛАНЫ Лаура

МАЛКЪАРЫМ

О, Малкъарым, санга тансыкъдан бирде

булутланы къарлы таугъа ушатдым,
Аллах айтып, жашнап тургъун ёмюрде,

тансыкълыгъым – сюйгениме шагъатым.

Беш Тау Элим, сен – беш учлу жулдузум,

умутуму, ийнамымы бешиги...
Чурум бир кёп, амал – къысха, жол – узун,–

ачармамы жан тынчлыкъны эшигин ?

Жарсыуладан болгъан кибик ышыгъым,

кёрюнесе Жаннет кибик кёзюме,
анамача, къучагъынга ашыкъдым,

къор болайым жайларынга, кюзюнге!

Алты харфынг тёрт санымдан багъалы,

жан тамырым – Эркинликни ёзени.
Къыйынлыкъда чыдай билген Малкъарым,

Фирдауусда тапха эдим мен сени...
 
Зумакъулланы Танзиля

МАЛКЪАРЫМ

Беш тау элинг жашар ючюн бу ташда,
Ёхтемликде, ачыу кёрмей, къууанчда,
Беш да жаным болса, барын берирем,
Ташларынгы мен къучакълай ёлюрем!
Манга саугъа къаты ташынг, акъ къарынг,
Тюз ниетли, татлы тилли Малкъарым!

Намыс, сыйны бийикледе туталгъан,
Сёз айтханда, дуния эштирча айталгъан.
Тепсегенде, дуниягъа къарс кьакъдыргъан,
Ташда от да, ташда гюл да чакъдыргъан.

Къула тюзге къуйгъанда жашын, къартын,
Кёмген суна ёмюрлеге журт отун,
Жаннган отдан жанмагъанлай чыгъалгъан,
Тобукъланмай, намысында къалалгъан,
Ахшыларын миндиралгъан ёрлеге,
Къартларын да олтурталгъан тёрлеге,
Малкъар! Мени къарыусузгъа санама,
Къыйын кюнде тыянч болур балангма.

Ичлеринде ёмюр жарсыу къайнагъан,
Ачыуладан ёз ташларын чайнагъан
Тауларынгы мен тиллерин ачарма,
Жарытырма, къайгъыларын чачарма.

Сен чыкъ десенг, къазауатха чыгъарма.
Къажауунгу мен, окъ болуп, жыгъарма.
Къызыу болсанг, жауун болуп, жауарма.
Сууукъ болсанг, отун болуп жанарма.

Тыпырынгы жаныуумда жылыта,
Барын - ёрню, энишни да жарыта,
Бушууунгу, жарсыуунгу къурута,
Сау дуниягьа иги бла таныта,
Къууанчынга ахшыланы жыярма,
Этегинги алтын бла къыярма.

Аллах айтып, муратыма жеталсам,
Ёлмез кибик, санга тенг жыр эталсам,
Керти окъун халкъ шайыры болурма,
Бу тауланы нарт шайыры болурма,
Ёмюрлеге жумуш эте турурма.
Изменено: shaudan - 25.04.2016 21:38:36
 
Нашла в теме тексты песен. Автора не знаю.

*Беш тау элден къуралгъан*

Беш тау элден къуралгъан,
Беш тау элден туралгъан,
Малкъарны тансыкълайма мен.
Анабызны сютюча,
Аны туз гыржыныча,
Сюе эсде тутама мен.
Сюеме тау кырдыкны,
Жаз башы чуакъ кюнню,
Малкъарны танг ариулугъу
Омакъдан омакъ чагъа,
Журтунга юлгю сала,
Келедиле санга сукълана.
Бийик баргъан къаяларынг,
Ахырсыз шауданларынг,
Элиме къууат бередиле.
Тауласыз Малкъар болмаз,
Таулусуз Малкъар онгмаз
Ма олду мени айтырым.
Если радость придет, радость прими
И не гордись, будь достоин ее.
Если горе придет, губы сожми
И не страшись, будь достоин его.

К. Кулиев
Страницы: 1
Читают тему (гостей: 1)

Форум  Мобильный | Стационарный