Расширенный поиск
17 Января  2018 года
Логин: Регистрация
Пароль: Забыли пароль?
  • Юйлю уругъа ит чабмаз.
  • Акъыллы айтыр эди, акъылсыз къоймайды.
  • Болджал ишни бёрю ашар.
  • Тили узунну, намысы – къысха.
  • Насыб бютеу халкъны юлюшюдю.
  • Баш болса, бёрк табылыр.
  • Тенгни тенглиги джашай барсанг билинир.
  • Ким бла джюрюсенг, аны кёзю бла кёрюнюрсе.
  • Адам боллукъ, атламындан белгили болур.
  • Эркишиге тары кебек танг кёрюнюр.
  • Биреуге аманлыкъ этиб, кесинге игилик табмазса.
  • Сакъламагъан затынга джолукъсанг, не бек къууанаса, не бек ачыйса.
  • Мухарны эси – ашарыкъда.
  • Ашда – бёрю, ишде – ёлю.
  • От кюйдюрген, сау болса да, тот кюйдюрген, сау болмаз.
  • Ётюрюкден тюбю джокъ, кёлтюрюрге джиби джокъ.
  • Къартха ушагъан джаш – акъыллы, джашха ушагъан къарт – тели.
  • Окъумагъан сокъурду, сокъур ташха абыныр!
  • Билим насыб берир, билим джолну керир.
  • Тешик этген тынчды, аны джамагъан къыйынды.
  • Джаш болсун, къыз болсун, акъылы, саны тюз болсун.
  • Ата – билек, ана – джюрек!
  • Байдан умут эте, джарлыдан ёгюз багъасы къорады.
  • Бойнуму джети джерден кессенг да, мен ол ишни этеллик тюлме.
  • Мал ёлсе, сюек къалыр, адам ёлсе, иши къалыр.
  • Аман адамны тепсинге олтуртсанг, къызынгы тилер.
  • Джылар джаш, атасыны сакъалы бла ойнар.
  • Ата Джуртча джер болмаз, туугъан элча эл болмаз.
  • Сютню башын джалагъан къутулур, тюбюн ичген тутулур.
  • Тамчы таш тешер.
  • Джангыз терек къынгыр ёсер.
  • Хар адамгъа кеси миннген тау кибик.
  • Кесине оноу эте билмеген, халкъына да эте билмез.
  • Чёбню кёлтюрсенг, тюбюнден сёз чыгъар.
  • Айтылгъан буйрукъ, сёгюлмез
  • Эллинг бла джау болсанг да, юйюнг бла джау болма.
  • Кимни – тили, тиши онглу, кимни – къолу, иши онглу.
  • Бозаны арты дауур болур.
  • Кийим тукъум сордурур.
  • Кёб ашасанг, татыуу чыкъмаз, кёб сёлешсенг, магъанасы чыкъмаз.
  • Биреуню къыйынлыгъы бла кесинге джол ишлеме.
  • Джангызны оту джарыкъ джанмаз!
  • Джашны джигитлиги сорулур, къызны джигерлиги сорулур.
  • Адебни адебсизден юрен.
  • Ашаса, ашамаса да, бёрюню ауузу – къан.
  • Термилгенинги табмазса, кюлгенинге тюберсе.
  • Уруну арты – къуру.
  • Ана къойну – балагъа джандет.
  • Джол бла сёзню къыйыры джокъ.
  • Чомартха хар кюн да байрамды.
Страницы: 1
"Оюмларым - сёз бла салгъан оюуларым", Узун сёзню сюймегенлеге Байрамукъланы Фатиманы тёрттизгинлери бла экитизгинлери
 
***
«Назму» деген джюрек къанны – тамчысы,
«Поэт» деген ёз халкъыны – джалчысы.




ТЁРТТИЗГИНЛЕ
***

Фахму деген ол Аллахны нюрюдю,
Бергенине кеси кесед юлюшню.
Кимге – уртлам, кимге джетген – бал аякъ,
Бирсиге да, къалам эт деб, кюн таякъ…

***
Сёзле къалдыла,
Джукъланды сезим.
Джюрекге билек –
Тёзюм бла тилек.
***
Джюз джылгъа чыкъгъан терекле кибик,
Сюйюб айтылгъан тилекле кибик,
Кёрюнедиле чомарт адамла –
Халкъны тарихин джазгъан къаламла.

***
Кюн чыкъса тюшген кёлекке кибик,
Кёрюне, бугъа, джашайды умут.
Джашау джоллагъа джюрекни тигиб,
Ахыр тылпыу бла кетеди кюйюб.

***
Бюгюн кюнде эмегенлик этгенле,
Зулмулукъну хар азабын чегерле.
Тюзлюк ючюн, азаб джолун ётгенле,
Игиликге эшик ачыб кетерле.

***
Тынгылайды сансызлыкъ, тынгылайды…
Ол дунияда къуру кесин ангылайды.
Къарау сокъур кёзлери, джюреги да,
Дагъан бола билмейди билеги да.

***
Ётген джолдан къоркъма! Къара башындан!
Джашагъанса тигим эте ашынгдан.
Кёкден, кюнден алгъанса энчи юлюш –
Сакъалынгда джылтырай таза кюмюш.

***
Бу дунияда «насыб» деген,
Ол дунияда джандет болур.
Насыблыла бир аздыла бу дунияда,
Джандет эшик кимге ачылыр ол дунияда?!

***
Даулет джашау боламыды, билмейме…
Аны кёрген, биле болур джууабын…
Къулачымы кёкге ачыб, къууанчлы,
Нек эсе да бир бек келди джырларым.


***
Къарайма да тёгерекде къууанч аз,
Хар не да кёб, къууанч а аз, джокъ кибик.
Мен къууанчха бир бек тансыкъ болгъанма…
Анамача…

***
Кечмеклик тилер заман джетгенди,
Сеземе аны джюрек халымдан.
Алгъы бурун онгсузладан тилейим,
Ызы бла Аллахдан, ёз джанымдан.

***«Къарачай поэзияны антологиясын» джарашдырыб бошай айтылгъан сёзле
Джазыучула меннге къарнаш болдула,
Эгеч болдум, назмуларын къайтара.
Джюреклерин къол аязгъа салгъанча,
Кёрюндюле…
Ол а мени джюрегиме джанаша.

***
Сабий бешик бауун тешер,
Терекден къоз бишиб тюшер.
Замандан тарихни къатлай,
Джашау барад, джурча, атлай.

***
Джашлыкъда джуртунг, атангча.
Къарт болсанг, татлы балангча.
Туугъан джеринг – сынынг, сырынг,
Ананг этген бешик джырынг.

***
Дерт этмейин дерс этерге эсгерген,
Ол джюрегин бёрю кибик улутмаз.
Дерт ол берчди, ауур джюкдю, джауурду.
Аны эсгерген кечмекликни унутмаз.

***
Алтын кёзюу бери къайтмаз,
Биз къайтабыз анга эсде.
Алтын джазым, гурушха джокъ
Экибизни арабызда.

***
Булбуллу тангны туугъаны –
Гюлчюкню «къол аязында».
Марал джангурну ызлары –
Джашлыкъны «нюр джаягъында».

***
Джарыкъ ышара билгенинг ючюн,
Билгенинг ючюн къууана,
Разыма сезе билгенинг ючюн,
Билгенинг ючюн сукълана.

***
Мыйылары, джау гыбытча, чайкъала,
Оюмлары, къуругъан кёлча, таркъая.
Гудучула тоханала ишлейле,
Эришгенден бир-бирлерин тишлейле.

***
Тангны ауазы – джазны аязы
Джюрегим бла ётдюле.
Аладан джырла, хапарла тууа,
Узакъгъа, кенгнге элтдиле…

***
Ашхы ишлеге бурулуб эси, кёлю
Рахатлыкъгъа къуллукъ этсин джаш тёлю!
Таза иннет, адеб-намыс, адамлыкъ
Келтирсинле анга насыб, кёб байлыкъ.

***
Элтелгенимча, алыб барама
Заман джюрекге къалагъан джюкню.
Бирде кесиме деу кёрюнсем да,
Бирде элтелмей къалама тюкню.

***
Джаным мени къайтырыкъды Аллахха,
Джюрегими адамлагъа бергенме.
Тюз иннет бла, джырым бла муратдан
Билгенимча, сизге тилек этгенме.

***
Хаух дунияда мен джазалгъан китабчыкъ
Джылы нюрмю, сууукъ джелми келтирир?..
Тузсуз хантча, татыусузму болур ол?
Огъай, огъай! Дамлы сёзден толсун ол!
***
Керти эсе, Тейри эшик ачылгъан,
Тола эсе, ол кёзюуде айтылгъан,
Байлыкъ, сый да келир элле ишлесем,
Ёксюз этме бир баланы, деригем.
***
Талай кесек этди мычхы терекни.
Биреу алды терезеге-эшикге деб,
Экинчи да – туудугъуна бешикге деб,
Ючюнчю уа – къабырына керекге деб.
***
Эки «эшикни» арасыды адам ёмюр,
Экисин да кеси ачмайд – тюлмюд сейир?
Алгъа ачылгъан – «эшиги» тыбырыны,
Экинчи уа – ёмюрлюк къабырыны.
***
Туугъан кюнюм тюшмей къалды эсиме,
Бек къыйналдым, гурушха этдим кесиме –
Ол кюнюмю анама нек бермедим?
Эки кёзюн ол кюн нечик кёрмедим?..
***
Адамлагъа эшитдирирге талпына,
Джюрегимде согъулгъан макъамланы.
Мыдах, джарыкъ эселе да, ашыгъа,
Назму тилге кёчюреме аланы.
***
Ёлюм, сени юсюнгден
Джазайым деб, олтурдум.
Джашау, сеннге джыр эте,
Уллу бетни толтурдум.
***
Сюйген адамы къайда къалса да,
«Кёзкёрмездеди», демейди джюрек.
Къайда эсе да – биргесиндеди,
Тюз тёрюндеди!
***
Джилек тахта чакъгъанды.
Гюлчюклери – кёзчюкле.
Джаздан хапар айталла,
Чапракълары – сёзчюкле.
***
Джырлагъан бла джылагъан
Бир къош болдула.
Джылагъан хорлаб джырны,
Бирча болдула.
* * *
Терен къарда, узакъ джолда къалгъанча,
Тарбуууннга нек тыяды джюрегим?
Чыртда келмейд, джашауумдан седретиб,
Мыдахлыкъ бла джукъгъа джасакъ тёлерим.
* * *
Ай да, Кюн да тутулалла кёзюу бла,
Джаз бошалыб, къач келеди – джокъ мадар.
Тарбуууннга тутмакъ этме кесинги,
Чыныгъыргъа юрен, джюрек, не къадар.
* * *
Кёк бла джерни орунларын алмашдырыб,
Сен эсинги сезимледе аджашдырыб,
Неле айтаса? Не уа къайры бараса?
Сен акъланы ортасында къараса...
* * *
Аяз сылагъан сыйдам бауурун
Суукъарын кёзлеу тутханды кюннге.
Булутдан чыгъыб, кюнден чыгъыныб,
Кюн таякъ тепсейд аны юсюнде.
* * *
Мен джашауну тюшелмедим эбине,
Ол кесича, мен кесимча, джашадым.
Джол узакъды, деб турсам да кесиме,
Танг аладан тюшюб къалдым ингирге.
* * *
Насыб бизге марда бла берилмей,
Къуюлсаед, кюн нюрюча, башындан…
Ол заманда, насыбды деб, билмейин,
Сансыз этиб, кетерикмек къатындан?
* * *
Сабий тюрсюн терк бугъунад заманда,
Джашлыкъ, гюлча, къартлыкъ, тюшча,
келелле.
Тюрлю, тюрлю бет алса да тюрсюнюнг,
Сезимлеринг хар неге да тёзелле.
***

Тотуркъулланы Алийни уланына этилген алгъыш
Туугъан улан кёб сакъланнган бир Алан,
Ол халкъына – Аллахдан келген салам!
Атасыча, чомарт болсун, баш болсун!
Аты айтылгъан ётгюр джигит джаш болсун!
Акъылманла акъыл сорур нарт болсун!

***
Ашхам джулдуз бюгюн мени нёгерим,
Аны бла кёкдед мени джюрегим…
Джулдуз ушакъ сёзсюз эмда сезимсиз,
Джерге тансыкъ болгъан эдим тёзюмсюз.

***
Сёз бла сезим… Экисинден эшебиз
Бешик джыр бла алгъыш, иги джора да.
Сезим бла сёз… экиси бла салабыз
Ёмюрлюкге кетмез уллу джара да.
***
Нарт джырыча, нарт сёзюча келишсе,
Мени назмум шам халкъымы тинине.
Андан башха джокъду мени талпыуум,
Меннге насыб – анга къуллукъ этиуде.
***
Джаз келди да, дуниягъа гюл тёкдю…
Къач келди да, алтын чапракъ джаудурду.
Къыш – къары бла, джай акъкъанат тангы бла
Бар насыбны барын бери аудурду.

***
«Тёзюм» деген, ол – Аллахха баш салгъан,
Хар тёзген да бармаса да «тёш ашаб».
Тёзюмлюмю, тёзюмсюзмю игиди?
Айталмайма, ёмюр джарымны джашаб…

***
«Ёретинлей ёледиле терекле»,
Джыгъылмайла ахыр тылпыу тыйыла.
«Болушугъуз!» - деб чакъырмай, сансызлай,
Джан ачыуну кёлтюрелле джангызлай.

***
Туугъан джерни табигъаты,
«Къарачай» деб сыйлы аты…
Аладыла къууандыргъан,
Насыб бард деб ийнандыргъан.
***
Къара чачда чыммакъ джаулукъ…
Къалай ариу кёрюнеди!
Акъ чачда къап-къара джаулукъ –
Джюрегинги эритеди.

***
Джыры бла тюйюмчекни тешиучю,
От бла сууну бир-бирине эшиучю,
Ай бла кюнню бир-биринден букъдурмай
Тюбетиучю, сюйген джерим, сен джаша.

***
Ёсе келиб, къолгъа къалам алгъаннга,
Оюм эшиб, андан оюу салгъаннга,
Джашау беред башха тюрлю соруула,
Кёб чыгъалла аны аллына буруула.

***
Танг бла, ай бла поэт ушакъ нек этеди?
Джюрек сырын ол алагъа нек элтеди?
Джангызлыкъны нек сынайды эл арада?
Терен сезиб, нек абынад кенг талада?

***
Сабийлигим келиб къонду эсиме –
Сары башлы бир сейирлик чыпчыкъчыкъ.
Тёрт джанына къарай келиб, ызы бла
Къууандырды, джазча, джарыкъ джыры бла.

***
Кёб зат айтдынг сен ол джангыз тизгин бла,
Тюбсюз кёлча, терен эди магъана…
Сёзню кёбю, арытхан бла къоймайын,
Чанчылады бирде болуб чыгъана.

***
Тёрт джанымда кёргеними
Тёрттизгиннге салама.
Тёрт джаныма, тёрден къараб,
Энтда дерсле алама.
 
Мен Фатима Байрамукованы узун назмуларын да сюеме окъургъа))).
Я самая классная на форуме))))))))))))))
 
Айгюль, бир затха сагъышлы болдум. Бармыды бу къысха назмулада кесича энчи багъалы? Блай бир керти терен сагъышдан чыкъъан. Есть какое-то, которое особенное среди других, за которым какая-то важная жизненная ситуация, какие-то значимые люди или чувства, в общем, что-то такое, чего в романе не расскажешь, а в четверостишии удалось?
Цитата
Сэстренка пишет:
***
Къарайма да тёгерекде къууанч аз,
Хар не да кёб, къууанч а аз, джокъ кибик.
Мен къууанчха бир бек тансыкъ болгъанма…
Анамача…
Мне вот это показалось таким, про которое я спрашивала...
Я самая классная на форуме))))))))))))))
 
Сау бол, Сэстренка! Къайсы бир назму да джашау сынамынгы, джюрек бла ётген сезимлени, кишиге кёрюнмеген ич халынгы, хауангы, тилегинги... кёлеккелери болурла. Кёзюнг кёрген бла, джюрегинг сезген, ангыгъа тюшюб, аладан тууа болурла тизгинле. Мен "назму бир джазайым" деб бир кере да олтурмагъанма, сёзле тизгинлеге "тизилиб" келе тебреселе, аланы къагъытха тюшюрюрге ашыкъгъанма. Ала алай келир ючюн а, ангы-джюрек анда, теренде, къаллай бир "иш-джумуш" баджарадыла, ненча кере "джарыкъ-мыдах" боладыла, "джыр-джыламукъ" тёгедиле, билген Аллахды. Назмучуну назмучу этген дуниягъа сансыз къарай билмегени, хар нени да джюреги бла ётдюргени, кимде да болсун, джарсыуну, инджиуню да "татыуларын" терен сезгени, бек къууана, бек къыйнала билгени болур. Къысхасы, кёре, сезе билгени.

«Назму» деген джюрек къанны – тамчысы..." деб бош айтхан болмам, хар назму бирер "тамчы", бары да мени джюрегимден "акъгъан тамчыла". Багъа берлик а сиз - окъуучула.
 
Оюмларым - сёз бла салгъан оюуларым
Бир-эки-ючтизгинле


***
Хар неден да «иги» деген ариуду.

***
Хаким халкъым, хакъынг менде уллуду.

***
Хар сёзге да келиш сёзле табама…
«Насыб» деген сёзге рифма табмайма…

***
Джерча, тауушсуз къычырса джюрек…
Аллай кёзюуде болушад тилек.

***
Джюрек джырласа, джырлайды дуния.
Джюрек джыласа, тилсизди дуния.

***
Сёзюн джерге тюшюрген –
Ёз бетине тюкюрген.
* * *
Тынгылай билген, тынгылы болур.


* * *
Асыл сёзюнг – джерге урлукъ себгенча,
Осал сёзюнг – окъ бла къанны тёкгенча.
***

Сёзледен тюл, сезимледен юзюлюб
Тюшедиле назмулагъа тизгинлеге.

* * *
Къарнаш – джюрекге дагъан,
Эгеч – джюрекге дарман.

* * *
Мухарны ашхыны – уллу,
Джутну къучагъы – уллу.

* * *
«Джашлыкъ» деген сюер, учунур кёзюу,
«Къартлыкъ» деген кечер, унутур кёзюу.

* * *
Зарлыкъ – джюрекге зорлукъ.

* * *
Бир кюню – саугъа, бир кюню – къаугъа
Бир къауумланы.

***
Марда билген, мадарны да билликди.

***
Муратны узакъ джарыгъы,
Умутну узакъ джылыуу.

* * *
Джашау – заманны тёреси.

* * *
Заман кимде да къояды ызын…
Ким къояр ызын заманда?!

* * *
Халкъны атындан, онглу оруннга олтуруб,
Кюрешеди хурджунларын толтуруб.

* * *
Байланы байлыкъ, эсирик этиб,
Эринчекге да, джарлылыкъ джетиб,
Халкъ къуджур болуб барады.

* * *
Кесин бек сюйген!
Башханы да сюе бил!

* * *
Кесин сюйдюре билмеген –
Джюреги джарыб кюлмеген.

* * *
Акъылы бла джашагъаннга – джашау асыу.
Сезими бла джашагъаннга – джашау джарсыу.


***
Къарангыгъа къараб турсанг,
сокъур болуб къалырса.

* * *
Сёзю семиз – акъылындан кемиз.

* * *
Ким – къууаныргъа,
ким джутланыргъа тууады.

* * *
Окъа оюлу кюзлеринг,
Ийнакъ кёзлю гюллеринг,
Ата джуртум.


***
Булбуллу тангны туугъаны –
гюлню чапракъчыкъларында.

* * *
Кюн бугъунса, гюл къубулады.

***
Къалай ариу тынгылайса!
Тынгылаууунг сёзлерингден ариуду!
Тынгылаб тур…

***
Сёлешгенден тынгылагъан къыйынды,
Бир-бирледе…

***
Джангы джол а джангылтыргъа ёч болады.


***
Сеннге – кечерге къыйын,
анга – кетерге къыйын.

***
Муратына джетелген –
аджалындан кетелгенча.

***
Ызына къараб ойлашмагъан,
аллына къараб учунмаз.

***
Къачынг келсе, къачыб къутулалмайса.

***
Эм къыйынлы адам – къыйын адам.

***
Къыйынлыны кёрюб къыйналмагъан…
Насыблыны кёрюб сукъланмагъан…
О, хариб адам.

***
Муратла – узакъ… Къабырла – джууукъ…
Алада – сууукъ…
***

Ачыгъан джюрекни ачыудан толтурма…

***
Тин байлыгъынг – кетмез саулугъунг.

***
«Сиз бизден эсли, акъыллы болугъуз», - дей эди амма…
Туудукъларынга аллай къыйын борч салма, о, амма.

***
Джюрегингде кюн джукъланса,
Кёрелмейсе кёкде кюнню.

***
Джюрек айтса, къол нени да этеди,
Къол этгенден, тил хапарла эшеди.

***
Иги джора – ашхы умутну ёзеги.

***
«Ариу» деген «иги» деген болур, эшта.
«Аман» деген «эрши» деген болгъанча.

***
Халкъ джыргъа бешик – халкъ эси,
Джырчыгъа саугъа – джыр кеси.

***
Уста джырчы миллетини ийнагъыды,
Аны сёзю халкъ оюмну къаймагъыды.

***
Ариу сёзледен ау бичген…
Сен да, онгсунуб, анга тюшген…

***
Насыбныча, ариулукъну сюеме,
Ол азайса, къыйналама – кюеме.

***
Хар ким кесин джаз туугъаннга санасын,
Джаз бла бирге джазсын джазыу китабын.

***
Джашау неди? Насыб, огъесе чыдам?
Страницы: 1
Читают тему (гостей: 1)

Форум  Мобильный | Стационарный