Юйлю ушакъ

Юйлю ушакъ

Айгюль 13.10.2015 20:32:41
Сообщений: 35

1 0

Ата-бабаларыбыздан келген адеб-намыс адетлерибизни (орусча айтсакъ, институт воспитания) асламысы халкъыбызны тамам эски (древний), тин (духовный) джаны бла уа адамны сейир-тамаша этерча бай миллет болгъанына шагъатдыла. Ёмюрледен тас болмай, джашаб тургъан адетле, бюгюнлюкде тутмасакъ да ( тутары бла тутмазын хар юйдеги кеси белгилейди кесине), аланы джахилликге санау, ол джангылычды. Адетле къурау бюгюн да барады, анга тырмашыучу «ёхтемле» аз тюлдюле. «Хар элни къой союу башхады» деген сёз да андан чыкъгъан болур, алай а миллетге магъанасы болмагъан «кюнлюк» адетле тууа да, ёле барадыла. Ала джашауда кеслерине орун айыралмайдыла. Мени сёзюм да аланы юслеринден тюлдю.
Эртдеден келген терен магъаналы, бюгюнлюкде «глобализация» деген «эмеген» джута баргъан, кесибиз билмегенликден(!), тас эте тургъан магъаналы адетлерибизни юслеринденди мени айтырым…
Ала:
Джангы келиннге отоуда джаулугъун терен нек къысдыргъандыла?
Тил тутхан адетни магъанасы болгъанмыды?
Ат джашыргъан намысмыды, джахилликмиди?

Эм биринчиге айтыргъа излегеним: келин алгъан, къыз чыкъгъан бла байламлы адетлени (кертилерини!) баш магъаналары - кесини туугъан, ёсген джерин къоюб, билмеген-танымагъан юйюне кирген къыз тиширыуну юйдеги джашауу джарсыусуз, ариу башланырча этиу болгъанды.
Алайды да, адетлеге кёчейик. Джангы келиннге отоуда джаулугъун терен нек къысдыргъандыла? Анда не магъана кёрген болурла! Орус джазыучу Василий Шукшин айтханлай, адамгъа джууукъну-тенгни, танышны да бирча эси юч кере бурулады: туугъан кюнюнде, юйдегили болгъан кюнюнде эмда керти дуниягъа кетген кюнюнде! Юйдеги къурауну белгили джазыучу адамны дуниягъа келген, кетген кюнлери бла бир «тапхагъа» салады. Аны магъанасы хар адамгъа аллай бир уллуду! «Шериатха къошулмай къалгъан гюнахды», - деб да аны ючюн айтхан болурла бизни ата-бабаларыбыз.
Аллай, дуния бары да эсин сеннге бургъан кюн, сеннге къараргъа келгенлени арасында сюйген, сюймеген да, заранлы зарансыз да, кёзю-сёзю кюйдюрген да болургъа боллугъуна кимни ишеги барды? «Эрге баргъан – тынч, этек бюкген – къыйын» деселе да, къууанчы-тою этилген кюнледе джангы келиннге тынч чыртда тюлдю.
Йогла белгилеген «третий глазны» бизни ата-бабаларыбыз, бир ишексиз, иги билгендиле (ол эки къашны ортасыды). Джангы келинни кёзюн-къашын джабдырыб, зарандан, кёзден сакъланырча этгендиле! Хар джангы келин терсейиб бармагъанлыкъгъа, тюрлю-тюрлю чурумла бла эки-юч айдан джангы юйдегиле ненча чачылыб кетгенле, кирген кюнюнден саулугъу терсее башлагъанла да аз тюлдюле. Кёзмю тийди, заранмы болду?! Юйюнге киргени бла, джангы келинни ауруй-сызлай башлагъаныны сылтауу уа «мюйюшде» башына да орус фатаны атыб, джалан сюелгени да болургъа боллукъду.
Былайда дагъыда айтыргъа излегеним: динибиз да, миллет масхабларыбыз да унамагъан затланы джаш келинчиклеге этдирген аналадыла. Тойлары бошалгъанлай, джаулукъларын тешдириб, сёлешдирирге ашыгъыб, ала кеслерини «культурна» болгъанларын, заман бла тенгликге баргъанларын кёргюзтгенликлериди. Ол «культурналыкъ» тюлдю, хариб, джахилликди! «Джахил болса анасы, не билликди баласы»? – деб аны ючюн соргъан болурла бурунгула.
Орус фата бла, сырты, бойну да терен ачылгъан чепкен бла сюелген келин къайын юйде «статусуну» юсюнден уллу сагъыш этиб кюрешмезге болур. Эшигингден буюгъуб кирген келин, мен ангылагъан бла, келген юйюрюню сыйын кёрюб, буюгъа билиб, ата-ана къач дей джашар. Билмегенин юретсенг, аны алыргъа кюрешир. Бюгюнлюкде уа бир къауумубуз джангы келиннге джаулукъ къысдыргъанны артыкълыкъ этгеннге санайбыз.
Мен ангылагъан бла, джангы келинни тоюнда терен къысылгъан ау джаулугъу аны саулугъуна, джюрек халына "джабыу" болгъан бла бирге, джангы юйде джангы джашауу башха тюрлю боллугъун танытхан, джашаууну джангы чагъына киргенин кёргюзген, келин "статусун" ангыларгъа болушхан белги болгъанды. Алай тюл эсе, къалайды да?
Тылмач 14.10.2015 14:47:08
Сообщений: 1392
Юч-тёрт кюннге созулгъан келин алыула да бу сагъат заманнга келишмейдиле, мен эслеген, сагъыш этген бла. Адамларыбыз арт заманлада ишли-кючлю болгъандыла. Кюеу бла келинни туугъан къарнашы, эгечи болмаса башха джууукъла ишлерин эки-юч кюннге къоярча бек болалмайдыла. Къаладыла бир талай ишсиз бла эрикген. Алай бла созулады бир талай кюн.

Андан эсе хар нени бир кюннге келишдириб, барма къояргъа керекди, чыртда болмай эсе - эки кюн.

Сора да, бу ишле не къадар кюндюз неда ингирге джууукъ бардырылсала, кечени ортасын сакъламай.

Къызланы къолларындан тартыб, биреу тебсерге чыгъаргъаннга уа къалай къарайсыз? Бу да джангы адетмиди экен?

Аракъылы-ичкили тойла унутулгъан, чирик адетле эди деб турсанг, энтда бир къауумлагъа кёре ансыз джарамайды. Ичерге излегенлеге сый берирге керекбиз, ол аланы хакълары, сайлауларыды кибик сёзлеге не айтыргъа боллукъду? Алгъышха бал аякъла бла бир шышаны элтилирге керекди деб, аны да салыргъа излегенлеге уа?

бусагъатда быллай бир зат келди эсиме...
Айгюль 16.10.2015 13:18:44
Сообщений: 35
Цитата
Къызланы къолларындан тартыб, биреу тебсерге чыгъаргъаннга уа къалай къарайсыз? Бу да джангы адетмиди экен?"

Къызланы къолларындан тартыб, тебсерге чыгъаргъан адет тюлдю, ишленмексизликди, халисизлик. Сени бла тебсерге излемеген къызны зор бла ортагъа чыгъаргъан джашны, ма бу нарт сёз бла суратларгъа тыйыншлы болур - Адеб джокъда намыс джокъ.
Тойда аракъыдан тюйюл, къууанчны кесинден "кефли" болургъа керекди тюз адам. Кёбле къууанчларын "шайтан суусуз" этерге юреннгендиле арт джыллада, амма, ансыз къууанчны къууаншча кёрмегенле да аз тюлдюле, Ол бизни миллетге, бизнича башхалагъа да, ХХ-чы ёмюрню саугъасыды. Аны бизден кетерлик Ислам динибизди. Эртде, кеч болса да, миллет алайгъа келликди, джангыз миллетлигибизни, тилибизни тас этмей сакъларгъа Сыйлы Аллах кеси болушсун бизге!
Айгюль 16.10.2015 14:02:40
Сообщений: 35

1 0

Тил тутхан адетни магъанасы болгъанмыды?

«Абынмазлыкъ аякъ джокъ, джангылмазлыкъ джаякъ джокъ» деген нарт сёзге Шидакъланы Ибрагим хаджини «Силкин аллынга халкъым!» деген китабын басмагъа хазырлагъан кёзюуде тюртюлгенме. Дагъыда бир нарт сёз: «Таякъ джара бителир, сёз джара бителмез». Бу нарт сёзлени келтиргеними магъанасы – джангы келинлеге юйде къартладан, тамадаладан тил тутдургъан адетни юсюнден айтыр ючюндю. Бу адет да, башында айтхан джаулукъ къысыу бла байламлы адетча, джангы келиннге джан аурутуудан туугъанды.
Джангы келин, джашау сынамы болмагъанлыкъгъа, къайсы бир джаш адамча, кесине хар нени да билгенча кёрюннген (аллай джылларында, сан бири болмаса, къалгъанлары бары да) кёзюую, къайын юйге тюшеди, анда эркишисинден башлаб, кишини халисин билмейди, юй-турмуш джашауларындан хапары джокъду, юйдегини хауасы белгисизди… Ол болумда анга, сёз берилмейди да, заман бериледи, къайын юйюнде (ёмюрлюк юйюнде) халны, болумну, халини ангыларгъа, айтмазын айтыб, тилин къабмай, тынгылаб, хар нени эшитирге, билирге, ким бла къалай сёлеширине ажымсыз болургъа, юйдегиге кесин къалай сюйдюрюрге боллугъун таныргъа… Ол бир джанындан, экинчи джанындан - Ибрагим хаджи китабында суратлагъан болум. Андан бир юзюк келтирейик:

«Хар бир къарачай юйюр басымлы, бегимли, къарыулу, кючлю болуб, насыбдан толур ючюн, аны юсю бла саулай миллет борбайлы джашаб, таймаздан юйреб барыр ючюн, джангы келинни тил тутханыны тамам уллу магъанасы болгъанды, деучен эди атам хариб.
Не ючюн десенг, дей эди ол, джашны атасы бла анасы кёбюсюне (артыкъсызда бек анасы) кеслерини балаларына кишини тенг этиб къоялмайдыла, ариу келген келин тёппесинден башлаб, балагъына деричин сары алтын эсе да. Аллаху Тагъала алай джаратханды адам инсанны барысын да, къуру къарачайлыланы тюйюл.
Ол себебден къайын анала (къайтарыб айтама: кёбюсю, ансын башдан аякъ барысы да тюйюл) юйге джангы къошулгъан адамны атлагъан атламын, олтура-тура билгенин, къолу-аягъы къымылдагъанын – бир затчыкъны ычхындырмайын, кесини энчи ёлчеси бла учётха салыб, тохтаусыз багъа бериб турады. «Кесини энчи ёлчеси» бла келинни юсюнде, сёзсюз да, бек кёб «къыяула» табады, алай а алагъа кечмеклик этеди къайын ана.
Эртделеден келген миллетими тамам магъаналы бир нарт сёзю барды: «Абынмазлыкъ аякъ джокъ, джангылмазлыкъ джаякъ джокъ». «Абыннган аякъны» кечгенлигине къайын ана, «джангылгъан джаякъны» уа кечелмегенди.
Алай бла – сёз, къайгъы, дауур, юйюр чачылыу.
Келинчик сылтаулу болгъунчусына, андан да игиси – сабий табхынчысына деричин тил тутхан болса, ол джангы джаратылгъан джанчыкъ (аны сыйын а миллетим не заманда да бек мийикде тутханды) къайгъычыланы тиллерин къысха этиб къойгъанды, юйюр юйюрлей къалгъанды. Ма бу чурумну юсю бла миллетими алгъа баргъан джюрюшю, ким да билиб, бек деменгили болгъанды»...

Алай бла сёз сакълагъан, баш сакълайды, деб, бизни ата-бабаларыбыз, тил тутханны джангы келиннге себебге, анга джан аурутуб къурагъандыла. Не джаны бла да! Ол эски-чирик адет тюлдю, джангы келиннге джангы джашауун тынгылы башларгъа джолду, амалды.
Келиннге аууз ачдыргъан да, кесича, юйюрге къошулгъан джангы адамны сыйлаугъа бир иги чурум болгъанды. Бурунгула, къартланы адеблерин кёрюб, тил тутхан келинлерине мал, башха саугъа этиб, алай аууз ачдыргъандыла. Бусагъатда да, саугъа бериб, кёбле ачдырадыла, алай а ашыгъыб, экинчи-ючюнчю кюнюне. Юйде тамадаладан тил тутдургъан адетни керти магъанасына сагъыш этген: «Бер, де да, алчы!» - деб къолуна не тюшсе, аны узатыб, джашар джерин алкъын танымагъан джангы келинчикни «тилин бошлатыргъа» ашыкъмазгъа болур.
Айгюль 19.10.2015 21:09:38
Сообщений: 35

1 0

СИЗ КЕТГЕН БЛА БИРГЕ…
(миниатюра)
«Адеб» бла «Намыс». Эки къысха сёзчюк. Къанатлыны кёкге джол ачдыргъан эки къанатыча, адамны дуния джарыгъын кёргюзген эки кёзюча, эки сёз – Адеб бла Намыс! Ала кеслерине тенгизни теренича бир магъананы джыялырча, къачан, къалай этелгенди таулу? Ол эки къысха сёзге аллай бир адамлыкъ шартны сыйындырыр ючюн, таулу ненча ёмюрню къаджыкъмай кюрешгенди? Миллетни ангысына джазар ючюн а, къаллай бир тёзюм, басым, ышанмакълыкъ керек болгъанды анга?
Адеб бла Намыс. Магъаналарын тас этиб, къуу сёзле болуб, китаблада къалыб кетедиле деб, нечик къоркъама! Сиз кетген бла бирге миллетлик да кетерин нечик билмейбиз? Сиз кетген бла бирге хурмет да кетерин къалай сезмейбиз?
Адамны ариу кёргюзген шартла къайсыладыла, деб сорсала, эм алгъа кёзню-къашны, сыфатны-санны айтырыбыз келеди. Сора къызда, джашда да, къартда, сабийде да бет чырайдан, сан субайлыкъдан да бек ишленмеклик нек сайланады да?! Эм ариу адам ким болур, деселе, адебли адам, деринг келмеймиди? Эм асыулу ким болур, деселе, намыслы адам, дерик тюлмюсе?
Адеби-намысы болгъан алдарыкъ да, урларыкъ да тюлдю, меннге табы болсун деб, онгсузну теблеб кетерик тюлдю! Адеби-намысы бар адам ауузунга чабарыкъ тюлдю, аллынгдан къабынынгы алыб къабарыкъ тюлдю. «Дженгилни – тюбю бла, ауурну башы бла» ётерге излерик тюлдю!..
Алай эсе, эм тюз, эм Ашхы адам Адеби бла Намысы болгъан адам тюлмюдю!
Сора биз анга джол нек къоймайбыз да?! Сора Адеб бла Намысха къарт анабызны кюбюрню тюбюнде къалыб тургъан эски мынчакълагъача нек къарайбыз да?!
Байрамукъланы Ф. Джазыула. Москва, 2013 дж.
Айгюль 02.11.2015 14:34:05
Сообщений: 35

1 0

3. Ат джашыргъан намысмыды, джахилликмиди?
Таулулада ат джашыргъан келинле бек тутхан адетлени бири болгъанды. Бизде кесинден тамадагъа «сиз» деб, кёблюк санда сёлешген адет болмагъанды. Ол бизге орусдан келгенди, бюгюнлюкде анга юрениб бошагъанбыз.
Уллу-гитче да бир-бирине сен деб сёлешген, адеб-намыс джорукъну бузмагъан тюлдю бизде. Къартны, тиширыуну, атаны, ананы, сабийни, Къачы деб анга бек уллу магъана берилгенди. Ол огъай, «тиширыуну джаулугъуну къачын», «юйню, босагъаны, тыбырны къачы», башхача айтсакъ, джанлары болмагъанлыкъгъа, адамгъа, юйдегиге сыйлы (знаковый) затланы барыны къачын кёргендиле. «Ата сёзню», «тийре къартны» къачларына бек сакъ болгъандыла. «Намыс» деген сёзню орус эквиваленти джокъча «Къачы» деген сёзню да болмаз, эшта. Магъанасы бла «сыйы» деген сёзге джууукъду.
Бизде да, амма, «къачы» эски сёзлени тизимлерине къошула барады.
«Къачы» бла «къач» бир сёз тюлдюле. «Къач» - джылны бир чагъы (времена года - осень), «къач» - этим (глагол - беги), «къач» - гяур къач (крест); была омонимледиле.
Ушагъыбызгъа къайта, ат джашырыу къайын атаны, къайын ананы, къайынлада тамада къауумну къайсы бирини да къачын кёргенлерини белгиси болгъанды. Мени анам: «къайын ананг бла кесинги анангы башхалыгъы тауукъ гаккыны тангкысыча бирди», деучен эди. Келиннге багъа бере башласала: «келин тийре къартланы атларын да айтмайды, къачларын кёрюб», - деб махтай эдиле. Алай бла адеблери болгъан келинле тийре къартланы атларын да джашыргъандыла. Адамны сыйлысы сыйлай биледи башханы да, дегендиле алагъа.
Миллетде ёмюрледен келген затла билсек, билмесек да, сюйсек, сюймесек да къаныбызгъа сингиб турадыла. Аны юсю бла атлайым дей эсенг, кесинге ол атламны этерге къоя эсенг, оруслула айтханлай: в тебе что-то не так! Къачын кёрюб, атын джашыргъан адамынгы къатында, башханы къой, тамагъынгы бошлаб, харх этиб кюллюк да тюлсе. Белгилисича, тамагъын бошлаб кюлген да, ат кишнегенча, деб, адебсизликге саналады!!!
Амма, ёмюрледен бери да къайынла бла келинлени орталарында ангылашынмакълыкъ азыракъды. Не сейир эсе да иги келинчикге къыйын къайын ана тюшерге ёч болады, иги къайын анагъа да бир залимтоб табылыб къалыр. Алай бла ортадагъы (къатын алгъан джаш) кесин оюмлу джюрюте билиб, ананы ана орнунда, юй бийчесин да кесини орнунда тута билмесе, гурушхала-гууала андан башланадыла. Тил тутхан да, ат джашыргъан да юйдегиде хауаны не къадар ариу этиуге джораланнган адетледиле.
Бир киши, ёле туруб джашына: "Къатын алсанг, къулагъы сангырау, тили тилсиз, кёзлери сокъур, къоллары чолакъ, бутлары бечелни ал", - деб осият этгенди. Ол къаллай тукъум юй бийче болургъа керекди?
Керексиз сёзге тынгыламагъан, кесине джетмеген сёзге къатышмагъан, керек болмагъаннга къарамагъан, къолу чиби болмагъан (адам хакъгъа узалмагъан), юйюн-тыбырын джылыта, юйюнде олтургъан! Башха тюрлю айтсакъ, аз сёлешиб, кёб тынгылагъан, аз айтдырыб, кёб ангылагъан.
Юйдеги джашауда адебни-намысны юслеринден айтхан заманда унутмазгъа тыйыншлы шартла дагъыда бардыла:
а) «эрим», «къатыным» деб сёлешген сыйсызлыкъгъа, мыжыкълыкъгъа саналгъанды.
б) эри бла къатыны бир-бири атын айтыб сёлешмегенди. Юйде ата-ана бир-бирини юслеринден сабийлерине: «атагъыз», «анагъыз» деб сёлешгендиле, къайынларына: «эгечигиз», «къарнашыгъыз»; кесини адамларына, танышлагъа юй бийчесин сагъынса: «келинигиз», баш иесини юсюнден айтхан тиширыу: «кюеуюгюз», «сабийлени атасы» деб сёлешгендиле.
в) джаш ата-ана сабийлерин кеслеринден уллуланы къатларында эркелетмегендиле, джаш атала сабийлерин къоюнларына да алмагъандыла. Ким болса да къатынгда сабийин эркелетиб тебресе, эслеген эсегиз, сен сёз табмай къаласа эркелетирге. Атам аллай адебсизликни эшитсе: «Эшек гылыуун бек сюер», - деучен эди. «Къаргъа баласын эркелетеме деб, кёзюн алгъанча», - деучен эди сабийин артыкъ бошлагъаннга.
Ата-ана тунгуч сабийлерине да «джашчыкъ», «къызчыкъ» деб атларын айтмаучу эдиле. Бусагъатдагъылача, кеси сабийин махтагъан айыб эди. «Анасы махтагъанны алма, тийреси махтагъандан къалма», деген нарт сёз да андан чыкъгъан болур. Былайда анагъа айыб этиледи. «Анасына къараб къызын ал…» деген да ол «операданды».
Ат джашыргъан джахиллик тюлдю, адеб-намыс «Къала» аууб кетмезча, тиреу болуб тургъан миллет шартланы бириди, мени сартын.
Сэстренка 02.11.2015 17:01:02
Сообщений: 9927

1 0


Я самая классная на форуме))))))))))))))
Nasib&Namis 06.11.2015 23:22:29
Сообщений: 3072
Къалай аламат темадыыыыы!!!!
Ол заманда... бет бетге къараса-бет джерге къарайды дей эдиле....
Дагъыда... таш бла ургъанны -аш бла ур...
Джарашыулукъ...ариу тил... биринчи орунда болгъанды ол заманда... аны бла миллет биригиб джашагъанды... уят кючлюрек болгъанды... уллу кирсе ёрге тургъан...
Бары да къала барады... ала уа бизни энчи шартларыбыз болгъандыла...
Бу сагъатда уа уят-къарын тойдурмаз ,болур биринчи орунда...
Nasib&Namis 06.11.2015 23:34:21
Сообщений: 3072
Ат джашыргъанны юсюнден айтайым)))))

Бир уллу элге бир къыз келин болуб баргъанды!
Бир кюн къайын анасы шхуур этгенди да, келинине айтханды...бар джашымы ашаргъа чакъырыб кел дегенди. Къыз барыргъа эриниб,эшикни ачыб... Му ра т ,деб къычыргъанды. Сора къайын анасы ... джашны атын айтыргъа джарамагъанын айтханды. Ол заманда къыз бурнун да чюйюрюб,эшикден башын къаратыб...Рамазанович,деб къычыргъанды))
Totur_Ram 08.11.2015 04:01:09
Сообщений: 5904
Цитата
Nasib&Namis пишет:
Ат джашыргъанны юсюнден айтайым)))))

Бир уллу элге бир къыз келин болуб баргъанды!
Бир кюн къайын анасы шхуур этгенди да, келинине айтханды...бар джашымы ашаргъа чакъырыб кел дегенди. Къыз барыргъа эриниб,эшикни ачыб... Мурат ,деб къычыргъанды. Сора къайын анасы ... джашны атын айтыргъа джарамагъанын айтханды. Ол заманда къыз бурнун да чюйюрюб,эшикден башын къаратыб...Рамазанович,деб къычыргъанды))
Расстрелять!)))
Totur_Ram 08.11.2015 04:42:34
Сообщений: 5904
Цитата
Сэстренка пишет:
02.11.2015 14:01:02
:alamat: Бизде сютде этилген уча болгъанын билмейем)) Балчыкъ джагъыб этилген да))
Казахлада кёргенем саулай юйютюб бергенлерин!))
Nasib&Namis 08.11.2015 13:30:42
Сообщений: 3072
Цитата

Totur_Ram пишет:
ЦитатаNasib&Namis пишет:
Ат джашыргъанны юсюнден айтайым)))))

Бир уллу элге бир къыз келин болуб баргъанды!
Бир кюн къайын анасы шхуур этгенди да, келинине айтханды...бар джашымы ашаргъа чакъырыб кел дегенди. Къыз барыргъа эриниб,эшикни ачыб... Мурат ,деб къычыргъанды. Сора къайын анасы ... джашны атын айтыргъа джарамагъанын айтханды. Ол заманда къыз бурнун да чюйюрюб,эшикден башын къаратыб...Рамазанович,деб къычыргъанды))
Расстрелять!)))

Аны бир айт))))))))
Айгюль 09.11.2015 00:39:41
Сообщений: 35
Сора ол келинден не хали, не адеб, не адамлыкъ, не хурмет сакъларгъа боллукъду? Адамдан туугъанлыкъгъа, аны адам халили этер ючюн, талай къыйын салыргъа керекди! Юсю - джалан , къарны ач болмасын, дегенден башхагъа магъана бермей ёсдюрген сабийлерибизден а чунгкъулджюрек, чунгкъулбаш джашла бла къызла хазырлайбыз. Башха не айтыргъа боллукъду?!
Nasib&Namis 10.11.2015 03:10:18
Сообщений: 3072
👍👍👍👍👍👍👍👍👍👍👍👍👍👍
Къара чачлы 10.11.2015 17:33:41
Сообщений: 1750
Мен бу теманы кёрюп бек къууандым! Аперим ачхан адамгъа!
Ат букъдургъанны юсю бла айтханда, ол, жарсыугъа, унутулгъанды дерге боллукъду, жангызда элледе эм да бир - бирледе сакъланнганды.
Кесими махтап айтмайма, алай мени анам бир заманда не атамы атасыны, анасыны, тамата адамларыны, къарындаш-эгечлерини атларын ёмюрде да айтмагъанды. Ол манга бек иги, хычыуун кёрюне эди, сабий заманымда да.
Кесим юйленнгенли, къайынларыма жангы атла къурай, башым къатышханды))) Биринчи заман аллай зат айтыргъа уялып, жукъ да айтмай да тургъанма.
Сагъыш эте кетип, бир тынч оюмгъа келгенме: къайын атам бла анам - папа бла мама, къайын къызым - къызчыкъ (къызчыкъ десем, инфаркт болургъа да къалады, алай, мен жаратама), къайынларым - жашчыкъла, гитче жашчыкъ бла ортанчы жашчыкъ, когда просят уточнить))), къайын атамы къарындашы - дядя, эгечлери - Тата бла Няня эм да башхала :)
Кюрешедиле ма жыл озгъандан бери да, бирси келинле бир да букъдурмайдыла, сен да айт да бар деп. УГЪАЙ! МЕн бирсиле тюйюлме! МЕни алай юйретмегендиле, мени ёзденлигим, ёхтемлигим да барды - аман - иги эсе да!
Жаулукъну юсюнден айтханда уа - эрге баргъан тиширыу, жаулукъ къысаргъа тийишлиди, ол баш иесини сыйыды, намысыды!!!!!!!!!!

"Къадарны этегинде...","Сени ючюн"...(с)
Читают тему (гостей: 1)

Форум  Мобильный | Стационарный