Расширенный поиск
17 Января  2018 года
Логин: Регистрация
Пароль: Забыли пароль?
  • Гырджын – тепсини тамадасы.
  • Аман къатын сабий табса, бий болур…
  • Юй ишлеген балта эшикде къалыр.
  • Къарыусузгъа кюлме, онгсузгъа тийме.
  • Адеб этмеген, адеб кёрмез.
  • Къызны минг тилер, бир алыр.
  • Адеб джокъда, намыс джокъ.
  • Айтылгъан сёз ызына къайтмаз.
  • Бал – татлы, балдан да бала – татлы.
  • Къайтырыкъ эшигинги, къаты уруб чыкъма.
  • Алгъанда – джууукъ, бергенде – джау.
  • Ашын ашагъанынгы, башын да сыйла.
  • Берекет берсин деген джерде, берекет болур.
  • Ишлерге уял да, ашаргъа табма.
  • Иги адам абынса да, джангылмаз.
  • Сютден ауузу кюйген, суугъа юфгюре эди.
  • Нарт сёз – тилни бети.
  • Сабийликде юретмесенг, уллу болса – тюзелмез.
  • Айтхан сёзюне табылгъан.
  • Окъугъан – асыу, окъумагъан – джарсыу.
  • Чомартха Тейри да борчлуду.
  • Арбаз къынгырды да, ийнек сауалмайма.
  • Окъумагъан сокъурду, сокъур ташха абыныр!
  • Игини сыйлагъан адетди.
  • Ач уят къоймаз.
  • Тойгъа алгъа да барма, тойда артха да къалма.
  • Ашарыкъда сайлагъаннга – чий гырджын.
  • Аманнга игилик этсенг, юйюнге сау бармазса.
  • Ишлегенде эринме, ишде чолакъ кёрюнме.
  • Джюрекге ариу – кёзге да ариу.
  • Адамны бетине къарама, адетине къара.
  • Ашлыкъ – бюртюкден, джюн – тюкден.
  • Билгенни къолу къарны джандырыр.
  • Къошда джокъгъа – юлюш джокъ.
  • Къатын къылыкъсыз, эр тынчлыкъсыз.
  • Тойгъандан сора, ашны сёкме.
  • Таукел къуру къалмаз.
  • Урунуу – насыбны анасы.
  • Келлик заман – къартлыкъ келтирир, кетген заман – джашлыкъ ёлтюрюр.
  • Ата – билек, ана – джюрек!
  • Чакъырылмай келген къонакъ сыйланмай кетер.
  • Акъдан къара болмаз.
  • Къызбайны юйюне дери сюрсенг, батыр болур.
  • Сескекли кесин билдирир.
  • Кёкдеги болмаса, джердегин кёрмейди.
  • Акъыл бла адеб эгизледиле.
  • Эки къатын алгъан – эки ташны ортасына башын салгъан.
  • Билимли ёлмез, билимсиз кёрмез.
  • Эр сокъур болсун, къатын тилсиз болсун.
  • Юй кюйдю да, кюйюз чыкъды, ортасындан тюйюш чыкъды.
Страницы: 1
Орус халкъ таурух "Колобок" ана тилибизде, "Мен гютдючюк, гютдючюк, Кесимча бир тюрлючюк..." Сабийлеге
 
ГЮТДЮЧЮК
«Колобок» деген орус халкъ таурухну
эниклей, аны тамалында джазылгъанды

Автордан:
Таурухуму башлайым,
Сёз къабчыкъны бошлайым,
Тынглагъаннга – сау къалач,
Тынгламагъан къалыр ач.

***
Эртделеде бир элде,
Таулада тюл, тюз джерде,
Джашагъандыла къартла –
Бир акка бла бир амма.
Унчукълары бошалыб,
Гырджын къалмай ашалыб,
Къартла мыдах болгъанла,
Амалсызгъа къалгъанла.

Акка:
Ун деб, кимге барайыкъ?
Гырджын къайдан алайыкъ?
Амма:
Бир гютдюлюк табылыр,
Джюрегинг бир басылыр:
Ун къапчыкъны къагъайым,
Андан тылы булгъайым.

Автордан :
Эки уууч унчукъдан,
Эки уртлам суучукъдан,
Амма басыб тылычыкъ,
Этгенд бурху гютдючюк.
Кюлге кёмюб, бишириб,
Кюлюн къагъыб, тюшюрюб,
Терезеге салгъанды…
Сора уа! Не болгъанды?!

Амма:
Акка! Къара, бери чаб!
Терезени ары джаб!
Акка:
Джан киргенди гютдюге!
Насыб келгенд юйбюзге!
Къоркъма, гютдю! Кел бери!
Сен бизден къачма кери!
Гютдю:
Мен кьоркъмайма кишиден!
Амма:
О-о-о, балачыкъ, бери къайт!
Гютдю (джырлай барады):
Мен гютдюме, гютдюме,
Хар кимден да ётлюме,
Кишиге джалынмайма…

Къоян (чыкъды аллына):
Мен сени танымайма...
Гютдю:
Мен гютдючюк, гютдючюк,
Кесимча, бир тюрлючюк.
Эки уууч унчукъдан,
Эки уртлам суучукъдан,
Тегенеде булгъаныб,
Мен туугъанма къууаныб.
Исси отха тюшгенме,
Анда ариу бишгенме.
Терезеден тёнгереб,
Джерге тюшюб, ёрелеб,
Кесим кетиб барама,
Меннге алай къарама!
Аккадан да кетгенме,
Аммадан да кетгенме!
Къызбай къоян, сенден да
Кетдим! Къоркъчу менден да.

Бёрю(чыкъды аллына):
Къара мынга, тириге!..
Тёп-тёгерек тюрлюге!
Сен дамлычыкъ болурса?
Ашаб къойсам, турурса...
Гютдю:
Сен ашаргъа сюесе,
Мен джашаргъа сюеме!
Тохта, джырчыкъ джырлайым!
Бёрю:
Анга уа тынгылайым...
Гютдю:
Мен гютдючюк, гютдючюк,
Тёгерекчик, нюрлючюк.
Эки уууч унчукъдан,
Эки уртлам суучукъдан,
Тегенеде булгъаныб,
Мен туугъанма къууаныб.
Исси отха тюшгенме,
Анда ариу бишгенме.
Терезеден тёнгереб,
Джерге тюшюб, ёрелеб,
Кесим кетиб барама,
Меннге алай къарама!
Аккадан да кетгенме!
Аммадан да кетгенме!
Къояндан да кетгенме!
Ма былайгъа джетгенме!
Бёрю, этме умутла –
Кетдим, мени унутма!

Аю(чыкъды аллына):
Сен не затса, тёгерек?
Не айланаса, тёнгереб?
Гютдю:
Мен гютдючюк, гютдючюк,
Тёгерекчик, нюрлючюк.
Эки уууч унчукъдан,
Эки уртлам суучукъдан,
Тегенеде булгъаныб,
Мен туугъанма къууаныб.
Исси отха тюшгенме,
Анда ариу бишгенме.
Терезеден тёнгереб,
Джерге тюшюб, ёрелеб,
Кесим кетиб барама,
Меннге алай къарама!
Аккадан да кетгенме,
Аммадан да кетгенме,
Къояндан, бёрюден да,
Джукъучу аюден да
Мен къутулуб барама!
Эрнинги бош джалама…

Тюлкю(чыкъды аллына):
Неди бу аламатчыкъ?
Мен сюйгенча, татлычыкъ?
Гютдю:
Мен гютдючюк, гютдючюк!
Хар кимден да ётлючюк...
Тюлкю:
Кесим кёре турама...
Гютдю:
Мен джыргъа да устама.
Тюлкю:
Къулакъларым – сангырау,
Тюклю башым – мынгырау…
Олтур да тюз бурнума,
Меннге бирчик бир джырла...

Автордан:
Тюлкю бурнун тутханлай,
Тюкюрюгюн джутханлай,
Акка чабыб джетгенди…
Тюлкю джардан кетгенди…

Ана тилде "биширген" Байрамукъланы Фатима
 
Айгюль,
ас–саляму алейкум. Аламат затчыкъ болгъанды!)))
Изменено: shaudan - 14.10.2015 20:49:23
 
Шаудан, менден алгъа бир зат къабарыкъ болурса. Мен да му назмуну юсюнден джаза тура эдим.

Игиге иги дерге керекди. Артистлеге окъутуб, ойнатыб, видеогъа салынса, сабийлеге бек иги саугъа боллукъду. Школлада сабийле кеслери айтыб, ойнаб, сахнада кёргюзтюрге да боллукъдула. Быллай затчыкъла - кёбюрек болсала эди - сабийлени тилибизге бурургъа себеб боллукъ эдиле.
 
Sabr,
окъуй башлагъанда Айшат кёчюрген да бир суннган эдим. Аны да келлик эди къолундан кёчюрюрге да, кеси къурап жазаргъа да, ин шаа Аллах.
 
👍👍👍👍👍👍👍👍
Аллах Фатимача адамларыбызны кёб этсин!!!!!! Сау болугъуз!!!!
За патриотов ....урррра товарищи! ! ! ! ! ! ! ! ! !
 
"Эльбрусоид" фондда Алий бла биринчи тюбеген кюнюмде айтханы бюгюн да эсимдеди:
- Биз сабийлеге ана тилни сюерге керекди, деген бла джукъ да этеллик тюлбюз, ала сюйген затланы ана тилде берсек, ол заманда джетерге боллукъбуз муратыбызгъа, - деб.
Ол кюн къууаннганымы айтыб да тауусаллыкъ болмам. Асыры учуннганымдан, ал юч мультфильмни назму халда кёчюрген эдим: "Колобокну" (Гютдю), "Три дровосека" (Юч отунчу), ючюнчю да - "Айюню арба этгени".
ЮЧ ОТУНЧУ

Автордан:
Юч тенг, юч шох, юч нёгер:
Къабкъаб, Чабчаб эм Чёбчёб
Джашагъанла бир элде…
Бир кюн къачхы эртденде…

Чёбчёб:
Къабкъаб! Чабчаб! Туругъуз!
Къолну-бетни джууугъуз!
Тур-турдан хапар келсе,
Хур-хурдан хайыр къалмаз.
Къабкъаб:
Мен бек ауруб къалгъанма.
Чёбчёб:
Тебсиге как салгъанма!
Къабкъаб:
Уллу къашыгъым къайда?
Джетдир къолума хайда!

Чоюн къуру, къайда как?
Чёбчёб:
Отун келтир! Отну джакъ!
Къабкъаб:
Какны сакълай, болдум къакъ.
Чёбчёб:
Мени не ючюн терслейсе?
Къабкъаб:
Как этерге сюймейсе.
Чёбчёб:
Хазыр ашха - билмилля...
Чабчаб:
Демлешгенни къойчугъуз!
Къайда сабыр болчугъуз!
Биз чегетге тебрейик,
Отун къайгъы этейик.
Чёбчёб:
«Ашда - бёрю, ишде - ёлю»,
Мухар, эринчек, тели...

АВТОРДАН:
Чёбчёб, Къабкъаб эм Чабчаб
Баралла джолну джасаб!
Отун керек – джюклери:
Балта, мычхы джиблери.
Келе келиб джетдиле
Бир суучукъгъа… не этдиле!
Чабчаб:
Къабкъаб, сен тёб-тёгерек,
Бизден эсе кёбюрек,
Кёлтюрюб, сен ётдюрсенг,
Ол джагъагъа джетдирсенг.
Къабкъаб:
Огъай! Айтайым табын:
Мен къарыусуз, эм рахын.
Чёбчёб - тири, эм узун,
Кёпюр болуб созулсун...
Чёбчёб:
Сандыракъмы этесе!?
Нек терсине кетесе?
Кёрмеймисе, ингилме…
Къабкъаб:
Мен а, тюкча, дженгилме!
Чёбчёб:
Сиз юсюме миннгенлей,
Эки сыныб къаллыкъма!
Чабчаб суугъа батылса,
Бери къалай аллыкъма?
Къабкъаб:
Ха-ха-ха...
Чёбчёб:
«Тели кюлюб серинмез»,
Джангыз анга эринмез!
Кюле келиб атылма...
Чабчаб:
Бир-биринге къатылма.
Мен къайыкълыкъ этейим,
Сизни алыб ётейим.

Чабчаб:
Хапчхи-и

Чёбчёб:
Иманлы бол! Кёб джаша!
«Бир - хайыр, эки - хата»...
Къабкъаб, отну дженгил джакъ,
Чабчаб, хариб, былай джат...
Отда Къабкъабны кебдиредиле.
Чёбчёб:
Кюйген ийис эштеме!

Къабкъаб хурулдаб джукълайды.

Чабчаб:
Ух, аламат джылындым,
Татлы джукълаб уяндым.
Чёбчёб:
Эй, Къабкъаб, кел, как аша!
Къабкъаб:
Уллу къашыгъым къайда!?
Чёбчёб:
Къабкъаб, къолгъа ал балта!
Чабчаб:
Эй, Къабкъаб, кел, как аша!
Къабкъаб:
Уллу къашыгъым къайда?!


Къабкъаб:
Дюккючге бош къатылма!
Чабчаб:
Къабкъаб, «тарс» деб атылма!
Чёбчёб:
Ишге кёре - ашыгъыз,
Ишигизге ушагъыз!


Къабкъаб:
Чёбчёб, джаным, кеч мени,
Кёб къыйнадым мен сени.

Чёбчёб:
Берчин бери, солурса.
Чабчаб:
Эшта, арыдынг болурса.
Къабкъаб:
Келмейд энтда учарым,
Ишлемейин ашарым.
Чабчаб:
Суу бузлагъанд! Аламат!
Ётебиз сау-саламат!

Чабчаб:
Биягъы мен джууундум...
Къабкъаб:
Чёбчёб къайда?! О хахай!
Суугъа кетгенд! Тохта алай!

Автордан:
Артда къоюб джолларын,
Тенгле юйге джетгенле.
Къызыу джагъыб отларын,
Сау чоюн как этгенле.
Чабчаб:
«Иши барны, ашы - бар!»
«Къол – ишлер, аууз – ашар»
Чёбчёб:
Чоюн как – халал азыкъ!
Какдан бир тойсун джазыкъ!
Къабкъабха – уллу къашыкъ!
Страницы: 1
Читают тему (гостей: 1)

Форум  Мобильный | Стационарный