Цитата |
---|
Sabr пишет:
Карачай газет, №20, мартны 20-сы, 4-чю бет - "Бийче мухурлу" назмула
|
"Къарачай"
2014 дж. мартны 20
Мартны 21 Поэзияны бютеудуния кюню
«БИЙЧЕ МУХУРЛУ» НАЗМУЛА
Къарачай-малкъар поэзияда джангыз эки китабны, бир башлагъаным бла, айырылалмай, ахырына дери, окъуб чыкъгъанма.
Биринчи китаб - «АРА БОРАН» - 1986-чы джыл чыкъгъанды, автору Бабаланы Ибрахим. Аны аты белгилиди - Къайсын Ибрахимни малкъар поэтлени барындан да баш кёре эди. Экинчи китаб - «ТИЛЕК» - 2013-чю джыл басмаланнганды, джазгъан - Ахматланы Люба. Алай а, аны юсюнден уллу джукъ джазылыб, билмейме.
Къуш къанатлары болгъанны къой, шорбат чыпчыкъ тенгли фахмусу болгъанны да эслеучю, ёрге кёлтюрюучю Къайсын, сау болса эди, Любаны юсюнден, «поэзиябызгъа къаллай къыз келгенди» деб, къашлары да ёрге кёлтюрюлюб, къолларын да кёкге тутуб, ышарыр эди, къууаныр эди. Аламат назмулагъа тюртюлсе, этиучюсюча, Любаны бир-эки назмусун да, бал татыу этдириб, окъур эди...
Ай медет, Къайсын джокъду энди, алай а, Бегий улу, Ёлмез улу дегенча, ол ышаннган джашла, Аллахха шукур, саудула. Абдуллах да, Мурадин да, Ахматланы Любаны къарачай-малкъар тиширыу поэзияны баш джетишимине санайдыла. Поэтессаны китабын окъугъандан сора, мен да ол оюмгъа келгенме.
Бу китаб аллай назмуладан къуралгъанды - эм къарыусузуна кюмюш, къалгъанларына да алтын, накъут-налмаз белгиле бериринг келеди. Эшта, Любаны назму китабы Кърымшаухалланы Ислам бийни медалына бош теджелген болмаз.
Да неди да Ахматланы шайыр къызны дуния поэзияны дараджасына чыгъаргъан?
Назму джазыуну (силлабикадан башлаб, бюгюннгю эркин назмугъа дери) бютеу джорукълары, амаллары бла хайырлана билгеними? Шийирлеринде ритм-джюрюш чырт бузулмай, асхамай баргъанымы? Рифмаларыны-кафиелерини кючлюлюгю-ариулугъу-джангылыгъымы? «Джыджымны узуну, сёзню уа къысхасы» иги болгъанын ангылаб, джазгъанларын созмагъанымы? Назмусуну суратлау дараджасы бек мийикде болгъанымы? Ауаз бермей, кёзбау, кука ариулукъ къурамай, Хакъ сёзню Акъ сёз бла айталгъанымы?
Барысы да, барысы да. Къалгъанладан эм уллу башхалыгъы уа санын-тёнгегин къымыжа этмей, кёлюню-джюрегини ариулугъун-тазалыгъын кёргюзте билгениди. «Къарауаш - бутундан, бийче къыз - къутундан танылады» деб, бир эски айтыу барды. Аллайын, Ахматланы шайыр Любаны назмусу сюймеклик шийирлени ичинде «бутундан» тюл, къутундан танылады. Олду Любаны лирикасыны энчилиги, «бийче мухуру».
XXI-чи ёмюрню шайыр къызы Ахматланы Любаны сюймеклик тизгинлери, XVI-чи - XVII-чи ёмюрледе джашагъан Гошаях Бийчени Къаншаубийге таралгъан джырыны-кюуюню мийиклигине чыкъгъанлары анданды, аны ючюндю. Любаны сюймеклик лирикасы халкъ ийнарладан кюч ала, бютеудуния поэзияны тенглигине чыкъгъан эсе, аны эслеб, ол мийик адабият джетишимибизни юсюнден айтыргъа да, джазаргъа да борчлубуз.
Бир-бир китаблада юлгюге келтирирге бир маджал назму табмай абызырайса. Любаны китабында уа къайсысын сайларгъа билмей къыйналаса - къышхы чегетде нызы тереклеча кёгередиле ала. Кюймеклик назмуларын да сюймеклик джарытыб турады.
* Ай къанатын жерге тюшюрдю,
Агъызды жилямугъун булут.
Насыбым гоккача юшюдю,
Акъ къарлада бузлады умут.
Бузчачакъ жаулугъу жылтырай,
Къыш сыйырды жайны саугъасын.
Сын бола, бирде уа къалтырай,
Эшитеме энтта ауазын...
Бу ата-бабаларыбыз джаза келген эски силлабика (джик тенглик) джорукъ бла джазылгъанды. Рифмала да игидиле: тюшюрдю-юшюдю, булут-умут, джылтырай-къалтырай, саугъасынауазын. Суратлау дараджасы уа аламатды: хар тизгини бирер сурат.
Сюймеклик бошалса,
Къуругъан терекгеми ушайды,
Къуругъан терекге,
Бутагъы замансыз къуругъан?..
Сюймеклик бошалса,
Таркъайгъан черекгеми ушайды,
Таркъайгъан черекге,
Юзмезге амалсыз жутулгъан?..
Бу назму уа, силлабо-тоника джорукъ бла (басымлы, басымсыз бёлюмлени кёзюулешиб баргъанлары) джазылгъанды. Басым хар ючюнчю бёлюмге тюшюб барады (анапест).
Мени сейирсиндирген, быллай шайырларыбыз бола тургъанлай, бизни поэзия (Къарачай джанына айтама) кёкге нек кёлтюрюле болмаз? Бизни сюймеклик ийнарла дунияда джангыз бир халкъны аллай хазнасындан кем тюлдюле. «Джыр Къарачайда этилир да, Малкъарда джырланыр», деб, тургъанлары да белгилиди. Энди не болгъан болур бизге?
Къарачайда назму джазыу тёре артха тёнгереген болмаса, бир да алгъа атламагъанды. Къарачайда къаллай назмула басмаланнганларына, алагъа да къаллай махтау сёзле айтылгъанларына къараб, сейир болуб турама. Тепси джанында айтылгъан алгъыш сёзлени бирле назмуду деб басмалайдыла, бирле да аны махтайдыла. Алай бла поэзиябыз къалай ёсер? Назмугъа не уллу магъана салсанг да, ритми асхай эсе, рифмасы къарыусуз эсе, суратлау дараджасы джокъ эсе, ол поэзия хазна къалай болур?
Айта, юрете билген да джокъ, юренирге излеген да джокъ. «Неме да былай джазады» деб, назму маталлы бир затланы китаб этиб чыгъарыб, башха графоман да анга махтау сёзле джазыб, не заманнга дери барлыкъбыз экен?
Тамада къауум силлабо-тоникагъа кёчюб, назму джазарыкъларына ийнанмайма, джашыракъ къауум а - излесе - джазаллыкъды. Узакъгъа барыргъа кереги да джокъду, малкъар назмучула ямб, хорей, анапест...ёлчеле бла джазадыла,- айтыргъа, силлабо-тоника джорукъгъа кёчюб бошагъандыла. Орус тилде назмула нек тынч окъуладыла - ол джорукъ бла джазылгъанлары ючюн - басымлы-басымсыз бёлюмле кёзюулешиб келгенлери ючюн. Бизни тилге ол джорукъ келише болмазмы? Келишеди, анга шагъат малкъар къарнашларыбыз, эгечлерибиз джазгъан чыгъармала.
Любаны биринчи китабы 1998-чи джыл чыкъгъанды, экинчи китабы - 2013-чю джыл. Ол джукъа китабчыкъгъа кирген назмула 14 джылны узагъына джазылгъандыла. Бютеулей да 113 назму - кеслери да къысха назмула. Айтыргъа, орта тергеу бла (поэзияны алай тергерге болмай эсе да) бир джылгъа он назму джазады, таб, андан да аз. Алай а, къаллай назмула - адамны эсинде къаллыкъ, халкъыбыз джашагъан къадарда джашаб турлукъ, ёлюмсюз назмула. Любаны назмулары къысха болгъанлыкъгъа, аланы ёмюрлери узун боллугъуна окъуучу кеси тюшюнюр - аны назму китабын окъуса. Мен а, ол китабда къаллай назмула болгъанларын энтда бир кере кёргюзтюр ючюн, сёзюмю тамамлай, Ахматланы Любаны талай назмусу бла окъуучуланы шагъырей этерге излейме.
ЛАЙПАНЛАНЫ Билал.
* Назмула малкъар диалектде
басмаланадыла.
КЪАРА ТАШНЫ ЖАРАСЫ
1
Къар жауады, жабады жерни
Сагъышым - ажашхан зурнуклай...
Ауазы улутады желни, -
Мен къалгъанма санга тансыкълай.
Жашауну биринчи къарлары
Агъарадыла тау башлада.
Жюрегим жиляды таралып,
Таш жаргъан кюч а - кёз жашлада.
2
Гошаях! Ол ачы юлюшюнг
Ачытды кёплени жанларын.
Нек келесе мени тюшюме,
Ташланы да къыя санларын.
О, къалай базындынг кючюнге!
(Бушуу жокъча, бу къар а - таза!)
Сюймеклик жоюлмаз ючюннге
Сынатдынг сен ташха да азап.
Таяндырмай армау башынгы,
Къаншауну сакъладынг ашыгъып...
Жарасы ол Къара ташынгы
Бюгюн да къанайды, ашланып.
3
Туманнга бёленнгенди эсим.
(Къар жауады Басхан тарында).
Жашагъанма, ах, билмей кесим
Гошаях бийчени жырында.
Къар жауады, жабады жерни
Сагъышым - ажашхан зурнуклай...
Ауазы улутады желни, -
Мен жашайма санга тансыкълай.
АЖАШХАНМА ЖАШАУДА
Къар жауун къатыш тюшеди
Кюз жайгъан кюйюзлеге.
Мудахлыгъын юлешеди
Ёзенлеге, тюзлеге...
Ай мутхуз нюрюн чачады,
Жарыта орамланы.
Сагъыш китабын ачады
Тауланы къарамлары...
Жол излейме, жокъду жол а.
Ажашханма жашауда.
Айт, неге, кимгеди, сора,
Жюрекден ургъан шаудан?
СЕН КЪЫЙНАЛАМЫСА
МЕНИЧА?
Юч жол айырылгъан жерде,
Сакълаймыса мени алгъынча?
Бузлаймыса сууукъ желде,
Жюрегинги жарсыу алгъынчы?
Сюймекликни суратлары -
Сууукъ отну сууукъ нюрюча...
О, толмагъан муратларым,
Мудахсыз сиз ахыр кюнюча
Бу ёмюрню. О, хаух дуния...
О, неди, неди байлыгъынг?!
(Кюз саламы жауун къуя...)
Санга элтирми къайыгъым?
Сюелме сен сууукъ желде,
Жырларыма да, хо, ийнанма...
Юч жол айырылгъан жерде
Къалды насып, къалды ийнар да.
Мудахды жаралы жюрек,
Бу жиляуукъ кёкню кенгича.
Юч жол юч къуругъан черек...
Сен къыйналамыса менича?..
***
Жаз табийгъатны нюрю
Дуниягъа тёгюледи.
Къалай жарыкъды кёлюм,-
Жюрекде сууукъ ёледи.
Журтуму чууакъ тангы
Лёкъу чакъгъаннга ушайды.
Жауунну жыры жангы,
Жауун къууанчда жиляйды.
Агъачны жашил чачын
Оюнчакъ желчик тарайды.
Къайгъыларымы чачып,
Кёзюме биреу къарайды.
Хауаны тазалыгъы
Жюрегими эсиртеди.
Сени айтхан сёзлеринг
Кече, кюн да эсимдеди.
***
Тёгерекни бийлегенди къарангы,
Ай жарыгъы тереземден къачханды.
Жюрегимде эрттегили жарамы
Жай кечени шыбырдауу ачханды.
***
Тюшлериме сормай-ормай келесе.
Мен а сени аллынга чыгъалмайма.
Бошалгъанды жомагъыбыз, билесе,-
Ёлген гюлме, жангыдан чагъалмайма.
Озгъан кече келдинг мени тюшюме.
Мен а сени алгъынча сакъламайма.
Къой жанымы акъ къарлада юшюме,-
Жюрекни таша жырын жокъламайма.
Жырлай билген жырлагъанын къоярмы,
Жарыкъ жыры узакъ жары кетгенлей?
Сюе билген сюймекликден тоярмы,
Сюйгенинден къадар къуру этгенлей?
***
Жапханды къар жолубузну терен.
Боллукъ болду, терсни-тюзню излеме...
Озгъан кюнню къайтмазын тергеп,
Келлик кюнден умутуму юземе.
Тюнгюлме сен а насыбынг алда.
Жашау насыпды, къалгъаны алдау.
Узакъ болса да энди арабыз...
(Билдим, къоркъгъанына тюбейди ким да)
Ма бюгюн да ачыйды жарабыз,
Заман кетди, ол башына эркинди.
Унутма, жаным, мен да унутмам,
Алай жашама энди умутда.
Сейирди, тамашады дуния,
Заман да эмилик атлай чабады.
Сезимлерим, табалмайын уя,
Хауледиле...Къышны къары жабады
Чал чачынгы,керти сюймеклигим,
Жаннет нюрюм, уллу кюймеклигим.
***
Энтда ётдюрдюк бир кюн...
Ол да тас болду бизге.
Эки жюрекге жюгюн
Къоюп, кетгенди тюзге.
Энтда ётдюрдюк бир кюн...
Ол кетди, алай тири,-
Сагъышча, ауур бёркюн
Экибизге кийдирип.
Энтда ётдюрдюк бир кюн...
Ол кетди бизден, жиляй.
Тамбла да келликди кюн -
Жашау ётеди алай.
Энтда ётдюрдюк бир кюн...
Сен менсиз, сенсиз а мен.
Насыпны этгенди кюл
Умут тартыучу тирмен.