Цитата
Сабра пишет: Сапар, салам алейкум. Иги эсенг, болду -. Барыр къалгъан Тюзеле Москвада болдум - эки китаб чыгъардым. НЮР-Магометге ийгенме тиражын - анга тюбегенинг болса, алырса. Кесинге иерге адресинги билмей эдим. Тюркде чыкъгъан китабынгы ийгенмидиле санга? Почтанга рахат джазарма. Абюсюбню ишин да тындыралмадым -. Бары солууда Джазыучула эдиле. Да Юйде салам айт Билал

Саламынг узакъ болсун, Билал !

Ызы къалын болсун, энтда да, сюйгенингча бир китаб чыгъарыргъа Аллах онг берсин !!!!!!
Бир эки ыйыкъ да турмай, Къарчастаннга барлыкъ болурма, Нюр - Магаметге да тюберге керекме....
Ол Адамуму артыгъы бла этиб, бек къууандырды, Аллахдан Къууанч кёрсюн !!!!

Джумушуму тындырыб, бек къууандырды Нюр - Магамет..

Цитата

ШАТ пишет: 83 Джуртуму, сюйдюм, таулу таунуча. Къарасын, агъын да, махтадым. Ол а, не, кёрдю, джашын, джауунча. Кесекге, бир бермед Барагъын. Мийикге джаяу баргъан табсызды. Джолунгу, тутсанг, кёкню ёрге. Джанча, сан, алай кючлю арыйды. Барыуунг чыдамайды кёбге. Халкъымдан кесек кёлюм къалса да. Джууукълукъ а, туура джан бла къан. Джашауум, шыбла отда, джанса да. Джашасын, Джашауча, Къарчастан. Орта Къарачай. Батал Паша

Аламат джылы кюнле....Джаным да джылыды, Шукур Аллахгъа !!!!

67

Тубан басханды Басханны,
Аллы кёрюнмейд ашхамны.
Бир, къарасанг, кюн болады, былай да.
Былай эсе табигъат,
Адамда да чот былайд,
Джашау джолу той эте да, джылай да.

Тубан басханды Басханны.
Терсге санамайма аны.
Кёб да турмай, кёк, ачылыр, алгъынча.
Сен бу затны таб айыр,
Тюрлениу, бирде, хайыр,
Эски затны, ол джангыртыр джангыча.

Тубан басханды Басханны.
Кючю уллуду Аллахны;
Ой, анданды, озуб кетген, боллукъ да.
Кючю джетген аламгъа,
Сансыз тюлдю бир затха.
Тута билед хар не затны джорукъ бла.

Турна Аууш.
1999 дж.январь.

68

Басханда, амыр тутса, айта джырланы.
Кёзлерин ачама мен,
Мында, халкъланы.

Халкъла уа, мында, толу, орус бла корей.
Къытайлы, монгол да, бар.
Эй, барды тегей.

Дуннганлы, чууут да кёб, эркинди татар.
Къонагъы бир кёб болуб,
Бир азды малкъар.

Къарачай да, тоб толу, къуру тюлме мен.
Ой, дагъы да, бардыла.
Бирер миллетден.

Быланы, кими муслим, кими кришнаит.
Къаууму тонгуз ашайд,
Бирси къауум ит.

Къаууму, узун бетли, бирсиле, кенгбет.
Бирлери айныб барад,
Бирлери седреб.

Басханда, амыр тутса, айта джырланы.
Кёзлерин ачама мен,
Мында, халкъланы.

Керексиз, тойла тута, ашырдым заман.
Бездирдим кеси джанны,
Бездим быладан.

Кетейим джуртум таба, джанлайым элге.
Ансы, чот, къарайма да,
Барады терсге.

Январь. 1999 дж.
Турна Аууш.

69

Басхан орманда,
Кирсиз боранда,
Таш ышыкъгъа, болгъанма да, мен ийе.
Таулу макъам бла,
Таурух заманнга,
Кёз да къысмай, башлагъанма мен тие.

Алгъын заманда,
Эски Басханда,
Тейри халкъгъа, кёбмю ачды, эшикле.
Неге тёздюле,
Нени кёрдюле
Бу нарт элле, бу нарт ташла, мийикле.

Таула ичлери,
Тау этеклери.
Къор болайым, агъачынга – ташынга.
Ахыр джырым да,
Ахыр ангым да,
Мундан кетсин, Сыйлы Аллах, аллынга.

Басхан орманда,
Кирсиз боранда,
Зауукъ чеге, бир акъсылды кёл менде.
Шукур джериме,
Шукур Тейриме,
Шукурларма сыйлы джуртну кёрюмде.

Январь.
Басханстан. 1999 дж.

70

Айтама джазгъы алгъыш, къарай да, ёрге.
Сен ийе болгъанса да,
Джанымда тёрге.

Насыбны алтын къылы, джаша ёмюрлей.
Эсимде джарыкъ гюлсе,
Джаша кюлгенлей.

Кёзледе, кёбню кёрдюм, кёрдюм кесими.
Тынчлыкъны, алсанг да сен,
Бир къой эсими.

Арабыз керти узакъ, сен сабий, мен къарт.
Гюрюлдеб, ой нек джанад,
Сора, джан шынкъарт.

Накъырда, бирде - алдау, бирде уа керти.
Кертимиди мен айтхан,
Ангыла мени.

Сюймеклик ауур затды, кирсенг тереннге.
Алайын, билсем да бек,
Джырлайма сеннге.

Аллахданды, бары да, келиу бла кетиу.
Джазылыбды, не хал да.
Алыу эм бериу.

Экибиз тюбешмейин, болсанг сен армау.
Керексиз, бошалма бош,
Берилген - сынау.

Джырымы, айтырса да, махтарса кёкню.
Кетгенни эсде сюзюб,
Сюртюрсе кёзню.

Сора, эс, джангы болуб, сагъыш чачылыр.
Сезиминг, керти эсе,
Мени чакъырыр.

Турна Аууш.
Январь. 1999 дж.

71

Къышхы кюнюм къалайды,
Бери къара, былайды.
Эсим сауду, джашау сырын махтайма.
Сюйсем манты, сюйсем шай,
Кюнюм ётед патчахлай.
Тюн бла тюшню магъанасын алджайма.

Ийнанмагъан, кел да кёр.
Зарланнган а, хай да ёл.
Былай ётед джашау джылым, былайма.
Бёлюнмейин бошха мен,
Эрикмейин кесимден,
Ёмюрлюкге джылы джырла джырлайма.

Турна Аууш.
14.01.99.

72

Айланаса, къарт итимча, ашыкъ къагъа.
Бу арт джылда арталмадынг джабагъы.
Андан сора, бералмайма, башха багъа.
Алай этед, къалтакъ джолу ачханы.

Энди, хайда, ананг къатыш тура бир бер.
Сиз, бек сюйген, тюкенледе тапхала.
Мен билгенде, сен тутаса талай бир эр.
Къайсысы да, сеннге ушаш, хап – хапла.

Насыблыса, насыб эсе, эрге барыу.
Сен, ол затха, хар тишиден теркирек.
Джандет таба, элтемиди, къуйрукъ атыу,
Кюлюб, шашар, бу соругъа, хар эшек.

Эртде кюнде балий эдинг, энди дыгълен.
Энди талса, алгъын эдинг, сен, нарат.
Насыб бюртюк теджемеди сеннге тюкен.
Эй, андан да, тюрленмеди, сенде хат.

Къакъла энди хар сомунгу, хар тюменни.
Кюбюр ичде, огъай десенг, арбазда.
Юрме,- деме, ой, кёрлюксе сен юргенни.
Аргъы джуртда, Аллах алда, базманда.

27.01.99.
Къарчастан.
Орта Къарачай. Джёгетей.

73

Биринг эсе - мыстыбай,
Биринг эсе - писихбай.
Кюн да тиймей, нек соясыз бир – бирни.
Сабыр салыб джюрекге,
Тохтачыгъыз кесекге,
Кюрме этиб, бир къысыгъыз сиз тилни.

Биринг къайыр асландан,
Биринг эсе - къабланджан.
Ой, саласыз, бир - биринге, палахла.
Биринг эрден тюннгюлген,
Биринг ачха кюсеген,
Сизни кибик, къайдан табхын, налатла.

Биринги джити тили,
Биринги башы тели.
Къаргъышланы, хуна ташлай, тизесиз.
Тюз айтхалла бабала,
Кесим шагъат, ма анга.
Шайтан юзюк, Аллах урлукъ, бирлесиз.

Батал Паша.
24.01.99.

Сапар, агентге джазг'анма.

Эсенлик - Азагъа !!!!

Дорогой Сапар, с прошедшим Днём рождения тебя!
Миллетни бетин джарытхан, миллетин сыйлагъан, уллу фахмусу бла иннтлени, акъылланы тюз джолгъа бургъан багъалы адамыбыз, Аллах ёмюрюнгю узакъ этсин, кюч-сауулукъ бериб. Этген муратларынгы толтурсун.

Желаю процветания прекрасному творчеству, чтобы оно приносило радость автору и его многочисленным почитателям!

veresk,

Сау бол, Алгъышынга къууандым !!!

Аллах, Сеннге да, кёб къууанч берсин,
Узакъ ёмюрлю бол !!!

veresk, Фахмунга сый бере..

126


Барады, бу джыл джылкъы, джертин, ёргетин.
Бизлеге, къоя – къоя,
Муртатлыкъ, не, тин.

Барады, бу джыл джылкъы, кетиб къайтмаздан.
Кетгенле къайдадыла.
Келликле къайдан.

Энтда да бир джыл озду, дамсыз тюз джеллей.
Мени ол мында къойду,
Этиб кесинлей.

Джашауум, къышхы кибик, отсуз - къууанчсыз,
Кезюуде - къадау кирит,
Кесим ачхычсыз.

Келген джыл къалай болур, сакълайма бир сакъ.
Болур бу джангы обур,
Сыфат тюлдю акъ.

Алай а, базыбма мен, аллай, джокълар джыл.
Кете да, шошлукъ эсден,
Джырларма мен джыр.

Тюрленир джашау халым, кесек, мен, тёзсем.
Чачылыр ёмюр къайгъым,
Къабыр кёк кёрсем.

02.04.2000.
Турна Аууш.

Аллыбыз тауланы тюнене къар бек ариу агъартды....Бюгюн а - къалын тубан....

Энтда бир джай кетди..Тамблагъа, къайын чегет , чапракъ богъанны джерге къуярыкъ болур....Аламат заман келди...

74

Джашы, ёрге бир турсанг,
Бу ауруудан къутулсанг,
Джырларымдан этер эдим къурманлыкъ.
Сабий кибик атласанг.
Сен джюрекни ышартсанг,
Мен, джаугъа да, этер эдим сууаблыкъ.

Арыгъанма, джашы, мен.
Сагъыш баса тёпбеден.
Табандан да, чанчылалла, сагъышла.
Юйюм эсе - орамда,
Орам эсе – боранда.
Боранда да, сарын тарта, бир джырла.

Аурууунга джокъ амал,
Аллахданды хар тамал,
Эсен болгъа, себеб боллукъ, къуру Ол.
Энтда тёзсенг кесекчик,
Кесин тутар баш, белчик.
Айтса Аллах,- къобчун ёрге, эсен бол !

24.01.99.
Орта Къарачай.
Джёгетей.

75

Неме джарашыу адам, омакъды аты.
Эй, алай а, не келсин,
Кеси бир джарты.

Неме уа хынтчы адам, аты да эрши.
Алай а, адил адам,
Сёзю да керти.

Неме уа джаратмайды кишини джугъун.
Халал иш этмез ючюн,
Сояр тауугъун.

Неме да, джаратмайды, муну ашамын.
Мундан, джукъ алмаз ючюн,
Къояр къатынын.

Халкъымда, былачала, санайма да, кёб.
Быланы, къалай тутад,
Бир тийреде кёк.

Эй, алгъын, джууаш эди, адам эд адам.
Джюрекге асыу берир,
Энди джокъду дам.

Тийреге оноу этген ма тил бла къулакъ.
Харамлыкъ айныб бара,
Чагъалмай сууаб.

Ахыр сёз бычакъ учда, ахыр сёз окъда.
Акъыл сёз, саналмайды,
Энди, бир джукъгъа.

Таулу халкъ бошай турад, кеси ой кесин.
Былай бла бара эсек,
Кечерми Тейрим.

26.01.99.
Орта Къарачай.
Джёгетей.

76
Чам джыр

Эй, майна, келедиле, Асан бла Муртат.
Эй, майна, келедиле,
Эки алканавт.

Асанда юч сау шыша, Муртатда закус.
Бусагъат, иги уруб,
Боллукъла хантус.

Муртатбий алгъа келед, чайкъала артха.
Асанбек артха тартад,
Чайкъала алгъа.

Муртатбий солгъа барад, бюгюле онга.
Асанбек онга атлайд,
Бюгюле солгъа.

Асанны, ой мен хариб, къарагъыз ары.
Кёмюрден къара этгенд,
Аракъы аны.

Муртат да, о не халда, учхунду къардан.
Бу, хаман, былай болур,
Урса чагъырдан.

Алгъында бизни Асан джутса айрандан,
Эй, джанны алыр эди,
Пилден, къабландан.

Ой, бюгюн, туталмайды, эки аякъ, сан.
Чёпден да, ёталмайды,
Къарагъыз, Асан.

Алгъында бизни Муртат урса тузлукъдан,
Гаммешни джыгъар эди,
Тутса бутундан.

Ой, бюгюн, туталмайды, эки аякъ сан.
Сагъатны, сагъыш этди,
Атлай чапракъдан.

Бузулгъанса, Асан, сен, бузулду хатынг.
Чагъырны кенге къыстаб,
Алсанг эд къатын.

Къатынынг, болур эди, сеннге прокурор.
Эй тамбла, болур эдинг,
Чагъырсыз да, гор.

Юйюнге джетер – джетмез, айыр алайын,
Букъунгу къагъар эди,
Сюйер эди сын.

Бузулгъанса Муртат сен сингиб чагъыргъа.
Башынгы бир иймейсе,
Халкълай, къатыннга.

Тереннге, батхандыла, кёкюрек, джаякъ.
Сеннге, ай, керек эди,
Эменден таякъ.

Юч атламны юч сагъат, алайды джюрюш.
Къолдагъын бошамагъыз,
Манга да юлюш.

Теркирек бир джетигиз, болайым сизлей.
Чайкъалырма, мен да, эй.
Тебиб тенгизлей.

Эй, майна, келедиле, Асан бла Муртат.
Эй, майна, келедиле,
Эки алканавт.

Асанда юч сау шыша, Муртатда закус.
Бусагъат, иги уруб,
Боллукъбуз хантус.

Аны бла, бизни Муртат, джетед муратха.
Асан да, тели болуб,
Аунар багушха.

Кёзюуде, былайдыла, Муртат бла Асан.
Былагъа, джетген болур,
Заран шайтандан.

Былагъа, къайсы берсин, хамайыл, дууа.
Алайсыз, стакан тюбде,
Къалалла была.

29.01.99.
Орта Къарачай. Джёгетей.

78

Сол къолунг онгну урлай, онгунг да солну.
Ибилисча, нек тутдунг,
Джаманын джолну.

Узалдынг, ара мюлкге, энчи да, кёрдюнг.
Тюрме да этелмеди,
Тюзелирча тюн.

Ай, сени, кёрюр - кёрмез бабуш эм тауукъ,
Къалтыраб башлайдыла,
Болуб тас саулукъ.

Урунуб, тер тёкмединг, билгенинг тоноу.
Багуш тюб да къоймадынг,
Тонадынг отоу.

Сен, алай джигит эсенг, таудан да бир ау.
Джылкъыны, алгъа сюрюб,
Бир къайтчы сен сау.

Ийманынг, алай болсун, бармазса джары.
Къолунгдан чарпыу табхан,
Джакъсыз, не, джарлы.

Челекге джокълукъ къайда, билесе муну.
Къалай болад, не болад,
Ахыры урну.

Тауукъла чёблеб башлай сени джёнюнгю,
Кечмезлик бермез хораз,
Джыртыр кёзюнгю.

Тенгимсе да, тын - дейме, тохтатчы муну.
Ай, алай, тартырса сен,
Артда, бурнунгу.

31.01.98.
Орта Къарачай.
Джёгетей.

79

Джюгюне чыдамайын, къыжылдайд арба.
Джарсыуну унутчу, къой.
Аман джол артда.

Кёреме, эшек джарлы, барса да, тартыб,
Ол, бир да, излемейди,
Кетерге къачыб.

Башын да, джерге ийиб, барад тынгылай.
Териси, алай агъад,
Агъады джылаб.

Къыйналгъан эшек эсе, джылагъан а сен.
Эй, былай, бир кёб болад,
Сынагъанма мен.

Арбада къайын тамзыкъ, баргъаны печге.
Андан хайыр бармыды,
Къарт эшек, сеннге.

Ийенг а, сыйлы адам, тукъуму нартдан.
Ол сеннге къалай къарайд.
Сен, нексе, аман.

Сыфатынг - эшек бетли, санынг а – ийне.
Белинг да, джерге джете,
Джегиле – мине.

Къулакъла быстыр халда, салыныб джерге.
Ауана болгъанса сен,
Къуллана элге.

Этгенинг, халал болад, кесинг, сен харам…
Алайын, билгенсе сен,
Нечикди адам.

Ой мен да сеннге ушаш, джаманды чотум.
Адам бла, чырт джанмайды,
Кюндюзде, отум.

Кесим этген джыр хазна джылыу миллетге.
Аланы, этген эдим,
Тюше джан терге.

Джырладан, бузлу юйле, болдула джылы.
Менге уа, о не джетди.
Сууукъ эм мылы.

Алай бла къалгъа эдинг, этелле бедиш.
Бирсиле, зардан ёле,
Билейдиле тиш.

Теренден къармайма да, джырчычаса сен.
Джырчы да, сеничады,
Башхады элден.

Тёзейик джашау таргъа, ашар ючюн тёш.
Бизлеге да, бир кюнде,
Берир Аллах сёз.

Аллай кюн келир бизге, джетсе да тыныу.
Эшекге бла джырчыгъа,
Берилир джылыу.

31.01.98. Къарчастан.
Джёгетей.

80

Бу джаугъан къар да,
Мендеги джан да,
Даулашсала, ким акъды деб, бегирек.
Айтырым мынга,
Айтырым къысха.
Къарайма да, сиз экинг да, тенгирек.

Джаугъан къаргъа да,
Сейир джаннга да,
Аллах бермей, къайсы берир джашауну.
Кюч онглуду да,
Бояуу толуду да,
Джагъа билед, керек джерге, бояуну.

Ёмюрлюк – Аллах.
Кёргюзмей палах,
Таш – адам да, джашасынла акълыкъда.
Шукур Патчахха,
Мен къорма анга.
Кеси бирди, минг – минг дуния аллында.

02.01.99.
Къарчастан.
Джёгетей.

81

Басханны да тангларында,
Басханны да къарларында,
Басханны да ташларында,
Энтда, барла, Къарачайны энлери.
Заманны да ачыууна,
Заманны да тартыууна,
Ёмюрню да барыууна,
Не этейим, махтамайын Тейрини.

Мен, бабамы, ёзенинде,
Бир къаяны тёпбесинде,
Бу дунияны эслегенде,
Тойну тутду кёзле къатыш джюрегим.
Туугъан эсем къызылкъумда,
Джашау кюнюм ма джуртумда,
Бир акъ тауну бауурунда.
Таулу эсем, мен тау джуртда ёлейим.

Январь. 1999 дж.

82

Чарс басханды эсни, тюнюмден бир аман узакъдаса.
Оюмсузду сагъыш, сен терен, кюсесенг, биреуню.
Мени этме бырнак, сен мени джанымда тузакъдаса.
Сен, чарлама бошха, бир эштчи, мени сёзюмю.

Чайкъалады дуниям, сагъышны ахыры бир бошалмай.
Сен кимимсе мени, алайын, билдире бир кириш.
Накъырда бла къойсанг, джашарма керти джашаялмай.
Мен былай туралмам, сора, бир кюн, болурма бедиш.

Сен тазаса джырлай, хакъды, сюеме сени джуртумуча.
Ангыла къайгъымы, мен сеннгеча, меннге, бир илеш.
Бош къыстама кери, ёбгелетме, мени, бир къауумча.
Къармай бер, хар неми, оюмлаш да, мени бла тюбеш.

Къарчастан.
Орта Къарачай.
Джёгетей.

83

Эртде тургъан, эркек ат да, тайчыкъ табар.
Эртдеденди, эл джаратхан, бу нарт хапар.

Джигит бол да, эртде тургъа тырмаш - юрен.
Алай келир, джалан къолгъа рысхы - тюмен.

Муратынгдан эрикмейин болсанг таджал,
Джанынг кибик, болур сан да, алай маджал.

Башха, джыйсанг, китаб сёзден, хар игини,
Джалгъан сагъыш, тотбет этмез, ай, ичинги.

Излей эсенг, эсен болгъа, сен къартлыкъда,
Ийман эс бла, алай джаша сен джашлыкъда.

Айтылгъаннга, къулакъ салыб, къыс ангыда.
Дженгил къурут, хар джумушну, заманында.

Январь. 1999. Басханстан.
Турна Аууш.

84

Къутсузду, энтда, тау джели,
Бетсизди, энтда, къарт бети.
Джан сарната, алай сарнайд, сарнауу.
Билген ийе муну таугъа,
Бизден алыб, ийсин джаугъа,
Алайсыз да, безиб джашайд, хар таулу.

Тауну джели башха тюрлю,
Иги тебсе, бир бек кючлю.
Джюлгюч учлай, джити болад, азауу.
Тебди бюгюн къарлы джели,
Букъулатад таулу элни.
Болур, тейри, таулу джуртха бир дауу.

Январь. 1999 дж.
Басханстан.

85

Ингирде, салкъын юйде,
Турама салкъын тюнде.
Мен джазыугъа бир кёб айта гурушха.
Орамда уа къыш чилле,
Къарчыкъла – акъсыл джинле.
Сууукъ болмай, ойнайдыла, сууукъда,

Эртденим топал атлы,
Кюндюзюм аман къанлы.
Ингир чакъ да озад, тейри, чыкъырдай.
Кёлюм эсе, хаман ач.
Халым эсе, хаман къач.
Къарайма да, башлагъанма дынгырдай.

Сагъышым узакъ кёкде.
Мен кесим салкъын юйде.
Гитарам да, мен кёрюрден, узакъда.
Аллах кечсин таулуну,
Тас этгенме къарыуну.
Тургъанчама къаргъыш ичде тузакъда.

Алырым иги кесек,
Берирге да, кёб керек.
Джашауум бла, андан болду, ара тик.
Берирни бералмайма,
Алырны алалмайма.
Къалай этгин, ой болмайын, сен хариб.

Сыйлы Аллах, бир къара,
Болумума бир джара.
Сенден башха, кимим этер болушлукъ.
Ингирде, салкъын юйде,
Турама салкъын тюнде,
Джюрек ични бийлеб барад онгсузлукъ.

Къарчастан.
Орта Къарачай.
06.02.99.

86

Патчах этсенг телини.
Джабыб турсанг элинги.
Маджалына, джол табармы джашауунг.
Къашый берчи джалкъангы,
Огъай, десенг, къашхангы.
Эследингми, къалай болду махтаулунг.

Патчах этсенг муртатны,
Башчы этсенг джак – джакны.
Айтхан эдим, кёргюзмезин джандетни.
Энди, хай да, улуй бер,
Ауузунгу къучакъ кер.
Къаздырдымы, багуш ичде, хар нени.

Айлан, энди, къарт итлей,
Сууукъ ургъан чибинлей,
Сайлагъанынг, эшек этиб, джекдими.
Сиз къойла да, ол бёрю,
Кимниди, зауукъ, кёлю.
Джан берлигинг, табан учну бердими.

Орта Къарачай.
07.02.99.