Расширенный поиск
16 Июля  2018 года
Логин: Регистрация
Пароль: Забыли пароль?
  • Алгъанда – джууукъ, бергенде – джау.
  • Айранны сюйген, ийнек тутар.
  • Чомартны къолу берекет.
  • Къызбайны юйюне дери сюрсенг, батыр болур.
  • Билмегенинги, билгеннге сор.
  • Болджал ишни бёрю ашар.
  • Кёбге таш атма.
  • Ат да турмайды бир териде.
  • Иесиз малны бёрю ашар.
  • Шапа кёб болса, аш татымсыз болур.
  • Эки къатын алгъанны къулагъы тынгнгаймаз.
  • Билим – акъылны чырагъы.
  • Эл ауузу – элек, анга ийнаннган – халек.
  • Ач, тоймам, дейди, тойгъан, ач болмам, дейди.
  • Къыз чыгъаргъан – къызыл къымжа.
  • Хар зат кесини орнуна иги.
  • Тойгъандан сора, ашны сёкме.
  • Эте билген, этген этеди, эте билмеген, юретген этеди!
  • Узун джолну барсанг, бюгюн келирсе, къысха джолну барсанг, тамбла келирсе.
  • Джиби бир къат джетмей эди да, эки къат тарта эди.
  • Сибиртки да сыйлы болду, кюрек да кюнлю болду.
  • Айтылгъан сёз ызына къайтмаз.
  • Урама да – ёледи, сатама да – келеди.
  • Хаухну атма, ёнгкючню сатма.
  • Айтылгъан буйрукъ, сёгюлмез
  • Акъыл бла адеб эгизледиле.
  • Къыз тиширыу кеси юйюнде да къонакъды.
  • Эринчекни аурууу – кёб.
  • Сёз садакъдан кючлюдю.
  • Акъыл сабырлыкъ берир.
  • Ётюрюк хапар аякъ тюбю бла джюрюйдю.
  • Тюз сёз баргъан сууну тыяр.
  • Келлик заман – къартлыкъ келтирир, кетген заман – джашлыкъ ёлтюрюр.
  • Аманнга игилик этсенг, юйюнге сау бармазса.
  • Къыйынлы джети элге оноу этер.
  • Ёнгкюч къууана барыр, джылай келир.
  • Билим къая тешер.
  • Айыбны суу бла джууалмазса.
  • Эркишини аманы тиширыуну джылатыр.
  • Тюзлюк тас болмайды.
  • Ана къолу ачытмаз.
  • Чабар ат – джетген къыз.
  • Адеб джокъда, намыс джокъ.
  • Байны къызы баймакъ болса да, юйде къалмаз!
  • Эллинг бла джау болсанг да, юйюнг бла джау болма.
  • Мухардан ач ычхынмаз.
  • Ёлген эшек бёрюден къоркъмайды.
  • Татлы сёз – балдан татлы.
  • Байма, деб да, къууанма, джарлыма, деб да, джылама.
  • Ашхы адам – халкъ байлыгъы, ашхы джер – джашау байлыгъы.
Страницы: 1
ХАЛКЪ ЁКЮЛЮ ЭТЕЗЛАНЫ БАХАУТДИН
 
Къайсы халкъны да миллет этген, азат этеген, аны ётгюр, акъыллы, къан-жан аямай кюрешеген жигит уланларыдыла! Этезланы Бахаутдин да аллай жашладан бириди. Ол Малкъарны азатлыгъы ючюн 1970-чи жыллада окъуна кюрешип башлагъан эди. Аны халкъ ишине салгъан къыйынын айтып жалчытхан да къыйынды. Бахаутдин бла къырал органла кёп кюрешгендиле, кёп къыйнагъандыла аны, алай ол тюзлюкню жол нёгер этип, азатлыкъ байрагъын бийик тутханлай келеди. Къабарты-Малкъар Республика Арисей законуну жорукъларына кёре жашарын излейди Бахаутдин, аны тёгерегиндегиле да. Тюзлюк хар заманда да кесине жол таба келгенди. Аллах айтса, кёп турмай, ол Къабарты-Малкъаргъа да келир, Бахаутдинча жашларыбыз бар къадарда!
Бахаутдан! бу огъурлу ишингде Аллах санга кюч-къарыу берсин! Ёмюрюнг узакъ болсун, насыбынг а - сыйыннгысыз!
 
ХАЛКЪ ЁКЮЛЮ ЭТЕЗЛАНЫ БАХАУТДИН

Этезланы Бахаутдиннге июнну 15-де 70 джыл толады. Анда бир сейирлик джокъду – джашай барсанг, джылла да «тёгерек» бола барадыла. Сейирлик – «къарт болсам да – нартма» деб тургъанындады Бахаутдинни. Къарт да тюлдю. Къанын-джанын аямай, Халкъ ючюн, Джурт ючюн кюрешгеннге – къартлыкъ джокъду. Бахаутдинча акъсакъаллары болгъан халкъ – не динин, не тилин, не джерин – Аллах берген джангыз бир затын тас этерик тюлдю. Этез улу таулуду, алай бош таулу да тюл – Минги Таулу. Аллай Минги Таулуладан къуралгъанды Малкъар Халкъны Акъсакъалларыны Кенгеши (Совет Старейшин Балкарского Народа). Малкъар халкъны акъсакъаллары бюгюн барыбызгъа да юлгюдюле.

Тюзлюк хорларындан тюнгюлюб, миллет ишден сууугъан кёб джашха тюртюлгенме. «Биз культурабыз бла, окъууубуз-билимибиз бла душманланы хорлаб къоярыкъбыз. Джылаб, тарыгъыб тургъандан хайыр джокъду. Джырларгъа, тебсерге керекди». Былай айтханлагъа да тюбегенме. Алагъа джууабха Бахаутдин акъсакъалны оюмларын келтирирге излейме:

«Шохларым, сиз бюгюн аякъ тюбюгюзден туугъан джеригизни сыйыртсагъыз, тамбла къайда джырларыкъсыз, къайда тебсериксиз? Индейлилеча болуб къалмазмы ахырыгъыз? Ата джуртубуз ючюн кюрешмесек, не ючюн кюреширикбиз? Ол биринчиси.

Экинчиси. Ноябрны экисинде, мартны сегизинде халкъыбызгъа джетген къыйынлыкъны-сюргюнню эсден кетермеу – ол джылаб, тарыгъыб туруу тюлдю. Чууутлулагъа Холокостну унутугъуз деб бир кёрчюгюз – бизге джетген сюргюн да аллай къыйынлыкъды. Чууутлуланы Иерусалимде Сыйыт Ташлары да барды – Стена Плача. Джетген къыйынлыкъны унутмау – тарих эсни, миллет ангыны ёчюлюрге къоймагъан кючдю.

Ючюнчюсю. Бизге сюргюнню айтдырыб тургъан башха зат да барды – «О реабилитации репрессированных народов» законну толтурмагъанлары. Малкъарны районлары, сюргюннге дери болгъанларыча, ызына къайтарылмагъандыла, 80-ден аслам тау эл тюб болгъанлай турады. Энди уа, «элле арасы джерле» деген кибик этиб, Малкъарны Ата джуртун толусу бла сыйыра турадыла. Бу законнга келишмеген терс иш болгъанын чертиб, Эресейни Анаяса Махкемеси эки кере бегим алгъанды, алай а къабартылы башчыла къралны законун, Махкемени бегимин да толтурмайдыла. Кюрешмесек – джуртсуз къаллыкъбыз.

Тёртюнчюсю. Ёмюрден бери да бизни халкъ бла кюрешген къабарты башчыладыла. «Таш бла урсала да, аш бла урургъа кюрешиб да тургъанбыз» - болмайдыла. 1920-чы джыл Тау республиканы тизиминде Къабарты округ болгъаныча, Малкъар округ да бар эди – джери, чеги белгили. Бетал Калмыков Сталинни тюбюнден-башындан кириб, Къабарты округну Тау республикадан чыгъарады. Алай башланады Тау республиканы чачылыуу. Аны бла къалмай, Малкъар округну да Къабартыгъа къошдурады. 1944-чю джыл къабартылы башчы Кумехов «Малкъар халкъны кёчюрюрге керекди» деб, Бериягъа письмо джазыб, халкъыбызны джуртундан сюрдюргенди. Бюгюннгюлю къабартылы президент Каноков да – Калмыковну, Кумеховну къара иннетлерин, ишлерин бардыра – Малкъарны джуртсуз этиб кюрешеди.

Бешинчиси. Ма аны себебли, Къабартыдан айырылыб энчи республика болмай, Малкъаргъа джашау джокъду. 1920-чы джыллада бизни къраллыкъсыз къойгъан да, 1940-чы джыллада джуртубуздан сюрдюрген да, бюгюн да джуртубузну сыйырыргъа кюреше тургъан да – къабартылы тамадаладыла. Джаш тёлю бу затны ажымсыз билирге керекди. Биз, къартла, ёлгюнчю кюреширикбиз – Малкъарны энчи республика эталмасакъ, ол миллет иш сизге аманатды.

Алтынчысы. Дунияда аллай адам, халкъ джокъду кесини энчи Юйю болурун излемеген. Кесини энчи автономиясы, республикасы болмагъан халкъ кёб джашаялмайды – уллуракъ халкъланы ичинде эриб, тас болуб кетеди. Джуртун башхала кючлейдиле, тили, тарихи, культурасы да тас болады. Чууут, ингуш, тегей, абаза, ногъай, абхаз – тизиб барыргъа боллукъду халкъланы – кими район, кими республика, кими кърал болгъунчу тохтамагъандыла. Биз да тохтарыкъ тюлбюз – алайсыз, алгъаракъ айтханымча,- дуниядан тас боллукъбуз.

Джетинчиси. «Къабарты-Малкъар республиканы чачаргъа излейдиле – сепаратистле, экстремистле» деб, бизни терслерге кюрешгенле да бардыла. Ол джалгъан дауну айтханлагъа джууаб: бирлешген Къабарты-Малкъар эм аллындан да къабарты башчыланы къара иннетлери бла къуралгъанды – бизни джерибизни, кесибизни да джутар ючюн. Биз къаллай бир кюреше эсек да – Тенглик, Тюзлюк болсун деб,- болмайды. Къабарты башчыла не биз айтханнга, не къралны законуна-джоругъуна тынгыламайдыла – аны себебли бизге Къабартыдан айырылыу джол къалгъанды джангыз.

«Аман этегингден тутса, этегинги кес да къач» дейдиле. Алай этгенле да бардыла бизде – республикада джашаялмай, тышына къачыб, дагъыда «бирге джашаргъа керекди» деб, акъыл юретгенле бизге. Башхала да бардыла – къабартылы башчыланы айтханларын этиб, Акъ Юйде бирер къуллукъчукъ табыб, къул болуб тургъанла. Къабартылы тамадала аллайланы къоллары бла бардырадыла бизге къаршчы ишлерин – агъачны кесинден чюй этиб джаргъанча. Алай а, биз аллайлагъа кесибизни хорлатырыкъ тюлбюз – Хакъ да, Халкъ да бизни бладыла. Биз экстремистле тюлбюз – биз къралны джоругъундан чыкъмай, тюзлюгюбюз ючюн алай кюрешебиз. Экстремистле биз тюл, къабартылы башчыладыла – «О рееабилитации репрессированных народов» законнга да, Анаяса Махкемени оноууна да буруу болуб тургъанла аладыла. Бизге «сепаратистле» дерге кюрешгенлеге уа айтырыбыз: кесигиз умут этген затны бизге айтыргъа кюрешмегиз. Сепаратист деб, къралдан айырылыргъа излегеннге айтадыла. Биз а, черкес къралда тюл, Эресейде джашаргъа излейбиз – энчи Малкъар республикабызны къураб. Къабартыдан айырылыуну къралдан айырылыуча кёргюзтюрге излемесин киши да».

Ма былайды кёлю-иннети Этезланы Бахаутдинни – онла бла джылланы халкъы ючюн кюрешиб тургъан Таулуну. Аллай Минги Таулула болгъан къадарда, Минги Тау да бизники болгъанлай турлукъду, халкъыбыз да Халкъ болгъанлай турлукъду. Аллах Сизге, Бахаутдин, кюч-саулукъ берсин, муратыгъыз толуб, барыбыз да къууанырча болайыкъ.
2009-чу джыл, июнну 15

БЕШ ТАУ ЭЛ – БЕШ УУАХТЫ НАМАЗ
(ССБН-нге – Беш Тау Элни Акъсакъалла Тёресине)

Бир джурт болмаз Джерде Кавказча,
Минги Тау да – тёппеси аны.
Беш Тау Эл – беш ууахты намазча,
Кёк нюрюнде джулдуз бла Айны.

«Беш Тау Элни беш да тары –
Олду мени бешатарым»,-
Дегенди Ибрахим Баба,
Джуртдан кёл да, сёз да таба.

Хау, Беш Тау Эл – беш ууахты намаз,
Бешатар ушкок да бизге.
Терсликни Аллах унамаз,
Джол берир Тюзлюкге, Тюзге.

Бизге къазгъан урусуна
Душман кеси тюшмей къалмаз.
Халкъны тынглайма ауазына:
Беш Тау Эл – беш ууахты намаз.

Къартларыбыз Нартла кибик,
Атларыбыз Тарпан кибик,
Къаблан кибик да джашларыбыз –
Алдад бизни джашнарыбыз.

Беш Тау Эл – беш ууахты намаз.
Акъсакъал азан къычырса,
Кечигирге чырт джарамаз –
Къарт, джаш да сюелир сафха.

Беш Тау Эл – беш ууахты намаз.
Борчубузну да тёлербиз.
Тауларыбызгъа да таяна,
Аллахдан насыб тилербиз.

Акъсакъалларыбыз сау болуб,
Кёлюбюз турур тау болуб.
Джаш тёлю да аякъланыр,
Беш Тау Эли азатланыр.

Беш Тау Эли – беш ууахты намаз,
Бешатар ушкок да бизге.
Этсек мадар – этилир къадар,
Тюзлюгюбюз къалмаз тюзде.

Акъсакъалла тынчлыкъ табмай,
Кюрешгенде Халкъ, Джурт ючюн –
Эгеменлик тангы атмай,
Къалай къалыр Беш Тау Элге?!

Минги Тауну тёппесинден
Келед эниб азан таууш.
Чырт кетмейди мени эсимден
Къайсын айтхан Азат Аууш.

Джаула кеслери къалырла
Бизге эшген гыбы ауда.
Малкъар джумхуриетни байрагъы
Чайкъалыр Минги Тауда.

Ай бла джулдуз джарытады
Мийик таулада къарны.
Халкъыгъыз сизни унутмаз,
Акъсакъаллары Малкъарны.

«Халкъ ючюн!..» - антлары болгъан,
Сизге джашагъан, ёлген да – къолай.
Сизнича къартлары болгъан
Халкъыбыз хорланмаз, огъай.

Джаш тёлюге юлгюсюз сиз,
Аллах сакъласын ёлюмден.
Орнугъуз хазырды сизни
Тау джумхуриетни тёрюнде.

Саулукъ-эсенлик тилейме
Барыгъызгъа да Аллахдан.
Малкъар къралны къууанчын этмей,
Биринг кетмесин джашаудан.

Халкъыгъыз ючюн кюрешесиз,
Истемей къарны, боранны.
Махтау сизге, бюсюреу сизге,
Акъсакъаллары Малкъарны.

Сиз болгъаныгъыз себебли,
Къыйын кюнюбюз да – аламат.
Къыйыныгъыз Аллахдан къайытсын,
Джаныгъыз Аллахха аманат.
 
Аллах мундан ары да кёп жылланы къууанч бла жататсын.
 
Аллах узакъ ёмюр берсин!
 
Алгъышлайма! Аллах саулукълу этсин, муратларына жеттирсин.
 
Алгъышлайма! Аллах узакъ ёмюр берсин! Муратларынга жеттирсин!
 
Аллах насып берсин! Муратларыгъызгъа джетигиз!
 
Алгъышлайма, Аллах саулукъ, насып берсин, узакъ ёмюрлю этсин!
 
Алгъышлайма, муратларыгъыз толсунла, саулукълу болугъуз!
 
Рамазан, сау бол, теманы аджашдырыб, табмай тура эдим.
 
 
Алгъышлайма,Бахаутдин! Аллах узакъ ёмюр берсин! Саулукълу бол!
 
Бахаутдин акъсакъал 1939 джыл июнну 15-де туугъанды. 77-чи джылы барады. Алай а, Акъсакъалны, чурум болса, болмаса да, алгъышлай, саулукъ-эсенлик теджей турсакъ - бир адам айыб этмез. Халкъыбызны эм таза адамларындан бириди.
 
Салам алейкум,Бахаутдин! Джюзджыллыкъ кюнюнгде ,мен сеннге Волгоградда соргъанча:" Алан,сенми ,огъесе менми джылларыбыз бла тамадабыз?"-,деб сорурча саулугъунг эм эсенлигинг болсун. 15 июнда алгъышны басарбыз барыбызда.Мусса
 
Цитата
Sabr пишет:
Рамазан, сау бол, теманы аджашдырыб, табмай тура эдим.
Аллах саулукъ берсин! Атын къыйырын эшитдиригиз ансы - къайсы теманы да табыб берликбиз!))
Страницы: 1
Читают тему (гостей: 1)

Форум  Мобильный | Стационарный