Салам алейкум, джамагъат!
Эльбрусоидге бек кеб иги багъалы къонакъла келедиле! Бир-эки кюн бундан алгъа Мурат Эрсой джолдаш да келген эди. Ол къарачай-малкъар таба бара тураеди, анда Ата-Джуртгъа къайтгъангъа аталгъан къууанчгъа, сора «Крымшамхалны окъуулары» деген джыл сайын болгъан бир джыйылыугъа бара туруб, Москва шахарны юсю бла «Эльбрусоидни кермей, чырт кеталмам», - деб, келген эди, ышарылыб! Бизни да бек аман разы этиб ачыкъ джюреклиги бла къууандыргъан эди!
Мурат Эрсой – Европагъа тюркден кёчген бир къарачай юйню джашыды. Голландияда туугъанды, эм да анда Гаага шахарда джашайды, атасы-анасы бла, бир къарнашы бла эгешчиги да барды. Студент заманындан да ол джамагъат джумушлагъа эс белюб, бир талай къралда окъуб, ишлеб, сора бсагъатда да «Акбир» деген къарчай-малкъар къурауну башчысыды, дагъыда (атын унутханма) тюрк халкъны анга ошаш бир къурауну бардырады, эм да иши бизнес бла байламлы болгъанына ол джанын да унутмай, миллетге джарарча бегитиб кюрешеди. Аллах болушсун!
Бек аман эс ийиб тынгыладыкъ ингирде Эльбрусоидибизге джыйылыб тыш къралладан хапарлагъа. Адамларыбыз не ишлейле, къалай джашайла, не тилде сёлешеле, къонакгъа бир-бирине джюрюелемидиле деген затланы барын да билирге излеб джуукъ кёллю джууабына тынгылагъанек. Кесибиз да бир талай ол билмеген затланы айтыб кюрешеек, не джашырыу. Тамадабыз аны джай джыйылыубузгъа «къалгъан европачыланы джыя кел» - деб, чакъыргъанды. Ол да бизни майны 25-не джыйылыугъа чакъырды Герман къралгъа. Германны туура ортасында бир иги джер барды, уллу къонакъ юйю бла, ашханасы, ойнар, солур джери, къайдам, атла-башла чабханы иши да джарашгъан. Джыл сайын европачыларыбыз ары джыйылыб 3 кюн бирге ол юйде джашайдыла, тауча тебсерге юрене, халкыбызда джюрюген хантла ашай, адетлерибиздеча нени да этерге излеб. «Европада 500 адамыбыз джашайды асламы бла, талай къраллада, сора эм табына Германияны санаб ары джыйыллыкъбыз» - дееди Мурат.
Азамат экибиз да форумну унутмай махтангъанек, чакъыргъанек, бизде Сабыр Билял, Оушен, Америкачы Азамат олтуруучандыла, деб, тыш къралда джашасала да. Ол да, билеме форумну да, Эльбрусоидни затларын да дееди, алай а окъуялмайма дегенди да, орусча билмеген амалтын, сора ол ангылар ючюн кесибизни тилде джазама, халатланы бардыра))) Энди Мурат форумубузгъа аккаунт джараштырыб кирирге керекди, блайда бизге хапарла айта турурча!
Къалгъан болгъан джер башында адамларыбызны чакъырабыз, эм да уллу саламла иебиз!
Аллах миллетибизге - онг, адамларыбызгъа - саулукъ, эсенлик берсин!
Ps.къалгъан суратланы да бир кесекден бери салырма
