- Ёксюзню тилеги къабыл болур.
- Накъырда – кертини келечиси.
- Ханы къызы буюгъа-буюгъа киштик болду.
- Юйюнгден чыкъдынг – кюнюнгден чыкъдынг.
- Илму – джашауну джолу.
- Хар ишни да аллы къыйынды.
- Ата Джуртуму башы болмасам да, босагъасында ташы болайым.
- Атынг аманнга чыкъгъандан эсе, джанынг тамагъынгдан чыкъсын.
- Халкъны джырын джырласанг, халкъ санга эжиу этер.
- Адамны аманы адамны бети бла ойнар.
- Къарын къуру болса, джюрек уру болур.
- Аллахдан тилесенг, кёб тиле.
- Баргъанынга кёре болур келгенинг.
- Окъугъан озар, окъумагъан тозар.
- Ёлюр джаннга, ёкюл джокъ.
- Нёгер болсанг, тенг бол, тенг болмасанг, кенг бол.
- Юйлю уругъа ит чабмаз.
- Къыйынлы джети элни къайгъысын этер.
- Ашхы – джыяр, аман – джояр.
- Мураты болгъанны джюрек тебюую башхады.
- Этим кетсе да, сюегим къалыр.
- Таугъа чыгъаллыкъ эсенг, тюзде къалма.
- Сютню башын джалагъан къутулур, тюбюн ичген тутулур.
- Элиб деген, элге болушур.
- Аман адам этегингден тутса, кес да къач.
- Эл элде бирер малынг болгъандан эсе, бирер тенгинг болсун.
- Арба аугъандан сора, джол кёргюзтюучю кёб болур.
- Болджал ишни бёрю ашар.
- «Ма», - дегенни билмесенг, «бер», - дегенни билмезсе.
- Эки къатын алгъан – эки ташны ортасына башын салгъан.
- Къартны бурнун сюрт да, оноугъа тут.
- Терслик кетер, тюзлюк джетер.
- Тойгъандан сора, ашны сёкме.
- Ким бла джюрюсенг, аны кёзю бла кёрюнюрсе.
- Минг тенг да азды, бир джау да кёбдю.
- Чомартха Тейри да борчлуду.
- Аманнга игилик этсенг, юйюнге сау бармазса.
- Джумушакъ терекни къурт ашар.
- Байлыкъ келсе, акъыл кетер.
- Узун джолну барсанг, бюгюн келирсе, къысха джолну барсанг, тамбла келирсе.
- Хар адамгъа кеси миннген тау кибик.
- Къайгъыны сюйген, къайгъы табар.
- Сабийликде юретмесенг, уллу болса – тюзелмез.
- Къуру гыбыт бек дыгъырдар.
- Аман киши кеси юйюнде – къонакъ.
- Чомартха хар кюн да байрамды.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Ишлегенден, къарагъан уста.
- Акъыллы – эл иеси, тели – эл баласы.
- Махтаннган къыз, тойда джукълар.
Профиль
|
|
|||