- Киштикге къанат битсе, чыпчыкъ къалмаз эди.
- Атлыны кёрсе, джаяуну буту талыр.
- Ат да турмайды бир териде.
- Баланы адам этген анады.
- Тау башында, тау болмаз, джангыз терек, бау болмаз.
- Башынга джетмегенни сорма.
- Келгинчи, къонакъ уялыр, келгенден сора, къонакъбай уялыр.
- Бал – татлы, балдан да бала – татлы.
- Ишин билген, аны сыйын чыгъарады.
- Таукел тауну аудурур.
- Сакъламагъан затынга джолукъсанг, не бек къууанаса, не бек ачыйса.
- Кёл – къызбай, къол – батыр.
- Эли джокъну – кёлю джокъ.
- Бети къызарыучу адамны, джюреги харам болмаз.
- Чабар ат – джетген къыз.
- Туз, гырджын аша, тюзлюк бла джаша.
- Бойнуму джети джерден кессенг да, мен ол ишни этеллик тюлме.
- Бюгюн дуния кибик, тамбла ахыратды.
- Адам туугъан джеринде, ит тойгъан джеринде.
- Игиге айтсанг – билир, аманнга айтсанг – кюлюр.
- Къолу уллу – асыу, аягъы уллу – джарсыу.
- Гырджын – тепсини тамадасы.
- Экеулен сёлеше тура эселе, орталарына барыб кирме.
- Тойгъан антын унутур.
- Тил – миллетни джаны.
- Кёб ант этген, кёб ётюрюк айтыр.
- Айырылгъанланы айю ашар, бёлюннгенлени бёрю ашар.
- Хатерли къул болур.
- Къонакъ болсанг, ийнакъ бол.
- Къайгъы тюбю – тенгиз.
- Аджашхан тёгерек айланыр.
- Арыгъан къош чамчы болур.
- Мухар, кеси тойса да, кёзю тоймаз.
- Ётюрюкню къуйругъу – бир тутум.
- Ким бла джюрюсенг, аны кёзю бла кёрюнюрсе.
- Джумушакъ сёз къаты таякъны сындырыр.
- Баш – акъыл ючюн, акъылман – халкъ ючюн.
- Таукел адам тау тешер.
- Ариу сёз – къылычдан джити.
- Джети тилни билген джети кишиди.
- Джашлыкъ этмеген, башлыкъ этмез.
- Рысхы джалгъанды: келген да этер, кетген да этер.
- Суу ичген шауданынга тюкюрме.
- Джаханимни кёрмей, джандетге кёл салмазса.
- Эл ауузу – элия.
- Билим къая тешер.
- Келлик заман – къартлыкъ келтирир, кетген заман – джашлыкъ ёлтюрюр.
- Юйюнгден чыкъдынг – кюнюнгден чыкъдынг.
- Джарлы эскисин джамаса, къууаныр.
- Сабий болмагъан джерде, мёлек болмаз.
Профиль
|
|
|
|||