- Ариу сёзде ауруу джокъ.
- Кюн – узун, ёмюр – къысха.
- Ата Джуртча джер болмаз, туугъан элча эл болмаз.
- Айныгъанлы алты кюн, тогъайгъанлы тогъуз кюн.
- Окъуу – билимни ачхычы, окъуу – дунияны бачхычы.
- Зар адамны насыбы болмаз.
- Мал кёб болса, джууукъ кёб болур.
- Джаным-тиним – окъуу, билим.
- Къууут – джелге, берне – бошха.
- Ашына кёре табагъы, балына кёре къалагъы.
- Къарт бла баш аша, джаш бла аякъ аша.
- Ёлген аслан – сау чычхан.
- Чабакъ башындан чирийди.
- Бети бедерден, намыс сакълама.
- Арба аугъандан сора, джол кёргюзтюучю кёб болур.
- Ач – эснер, ат – кишнер.
- Чомарт бергенин айтмаз.
- Джолунга кёре – джюрюшюнг, джагъанга кёре – юлюшюнг.
- Къонакъ хазыр болгъанлыкъгъа, къонакъбай хазыр тюлдю.
- Эки ойлашыб, бир сёлешген.
- Сакъалы текени да бар, мыйыгъы киштикни да бар.
- Джеринден айырылгъан – джети джылар, джуртундан айырылгъан – ёлгюнчю джылар.
- Ата – билек, ана – джюрек!
- Айтылгъан сёз ызына къайтмаз.
- Джауумдан сора, кюн кюйдюрюр, ётюрюкден сора, айыб кюйдюрюр.
- Тюзлюк тас болмайды.
- Ачыкъ джюрекге джол – ачыкъ.
- Бёрю да ач къалмасын, эчки да ашалмасын.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Таукел тауну аудурур.
- Халкъны джырын джырласанг, халкъ санга эжиу этер.
- Уллу сёлешме да, уллу къаб.
- Сибиртки да сыйлы болду, кюрек да кюнлю болду.
- Тил бла келеди джыр да.
- Къобан да къуру да къобханлай турмайды, адам да къуру да патчахлай турмайды.
- Адамны сыфатына къарама, сёзюне къара.
- Чакъырылмагъан къонакъ – орунсуз.
- Чабар ат – джетген къыз.
- Рысхы – сют юсюнде кёмюк кибикди.
- Байны оноуу, джарлыгъа джарамаз.
- Экеулен сёлеше тура эселе, орталарына барыб кирме.
- Эртде тургъан бла эртде юйленнген сокъуранмаз.
- Къолунгдан къуймакъ ашатсанг да, атаны борчундан къутулмазса.
- Джашда акъыл джокъ, къартда къарыу джокъ.
- Къарт болгъан джерде, берекет болур, сабий болгъан джерде, оюн болур.
- Атынг аманнга чыкъгъандан эсе, джанынг тамагъынгдан чыкъсын.
- Къайгъы тюбю – тенгиз.
- Болджал ишни бёрю ашар.
- Тойчу джашха къарама, къойчу джашха къара.
- Чомарт джарлы болмаз.
Профиль
|
|
|||