Эльбрусоид :: Форум

Башы джабылгъан челекге, кир тюшмез.
Джарлыны эшигин махтагъан джабар.
Ач уят къоймаз.
Арбаз къынгырды да, ийнек сауалмайма.
Джырчы ёлсе, джыры къалыр.
Хата – гитчеден.
Тенгинг джокъ эсе – изле, бар эсе – сакъла!
Билими азны – ауузунда кирит.
Ишленмеген джаш – джюгенсиз ат, ишленмеген къыз – тузсуз хант.
Ишин билген, аны сыйын чыгъарады.
Эркишини аманы тиширыуну джылатыр.
Къонагъынгы артмагъын алма да, алгъышын ал.
Тенгни тенглиги джашай барсанг билинир.
Къалгъан ишге къар джауар.
Асхат ашлыкъ сата, юйдегиси ачдан къата.
Айран тёгюлсе, джугъусу къалыр.
Ауурну тюбю бла, дженгилни башы бла джюрюген.
Ач къарным, тынч къулагъым.
Аш берме да, къаш бер.
Джюрекге ариу – кёзге да ариу.
Къан бла кирген, джан бла чыгъар.
Сёз къанатсыз учар.
Ишге юренсин къоллары, халкъ бла болсун джоллары.
Кёзю сокъурдан – къоркъма, кёлю сокъурдан – къоркъ.
Окъумагъан сокъурду, сокъур ташха абыныр!
Байны къызы баймакъ болса да, юйде къалмаз!
Тойгъан антын унутур.
Тилчи тилден къаныкъмаз.
Аманны къуугъан, аманлыкъ табар.
Эки итни арасына сюек атма, эки адамны арасында сёз чыгъарма.
Айранын берсенг, челегин да къызгъанма.
Таукел тауну аудурур.
Джерни букъусу кёкге къонмаз.
Акъылсызны джууукъгъа алма, акъыллыны кенгнге салма.
Кёрмегеннге кебек – танг, битмегеннге сакъал – танг.
Сютден ауузу кюйген, суугъа юфгюре эди.
Ётюрюкчюню шагъаты – къатында.
Сабий кёргенин унутмаз.
Босагъагъа джууукъ орун болса, ашыгъыб тёрге озма.
Кёлсюзден сёзсюз тууар.
Ышармагъан – кюлмез, кюлмеген – къууанчны билмез.
Чыкълы кюнде чыкъмагъан, чыкъса къуру кирмеген.
Харам къарнашдан, халал тенг ашхы.
Уллу къашыкъ эрин джыртар.
Биреу къой излей, биреу той излей.
Тёрде – темир таякълы, къаяда – чыпчыкъ аякълы.
Башы ишлегенни, ауузу да ишлер.
Къолунгдан къуймакъ ашатсанг да, атаны борчундан къутулмазса.
Кёб къычыргъандан – къоркъма, тынч олтургъандан – къоркъ.
Тамбла алтындан бюгюн багъыр ашхы.

Логин:
Пароль:
	Запомнить меня на этом компьютере

Забыли свой пароль?
Регистрация