- Минг тенг да азды, бир джау да кёбдю.
- Мухарны эси – ашарыкъда.
- Кёб ант этген, кёб ётюрюк айтыр.
- Ётюрюк хапар аякъ тюбю бла джюрюйдю.
- Уясында не кёрсе, учханында аны этер.
- Таш ата билмеген, башына урур.
- Экиндини кеч къылсанг, чабыб джетер ашхам.
- Аджашхан тёгерек айланыр.
- Ашына кёре табагъы, балына кёре къалагъы.
- Бастасын ашагъан, хантусун да ичер.
- Тил – кесген бычакъ, сёз – атылгъан окъ.
- Джыгъылгъанны сырты джерден тоймаз.
- Тёрени джагъы джокъ.
- Насыб бютеу халкъны юлюшюдю.
- Ёнгкюч къууана барыр, джылай келир.
- Кютгени беш эчки, сызгъыргъаны уа, джерни джарады.
- Джылар джаш, атасыны сакъалы бла ойнар.
- Биреу къой излей, биреу той излей.
- Бюгюн дуния кибик, тамбла ахыратды.
- Этни да ашады, бетни да ашады.
- Къыз тиширыу кеси юйюнде да къонакъды.
- Ёгюзню мюйюзлери ауурлукъ этмейдиле.
- Къошда джокъгъа – юлюш джокъ.
- Ишни аллы бла къууанма да, арты бла къууан.
- Кёл – къызбай, къол – батыр.
- Рысхы – сют юсюнде кёмюк кибикди.
- Адамны аты башхача, акъылы да башхады.
- Сангырау къулакъ эл бузар.
- Аманнга игилик этсенг, юйюнге сау бармазса.
- Хансыз джомакъ болмаз.
- Аджалсыз ёлюм болмаз.
- Джарлы эскисин джамаса, къууаныр.
- Юйюнг бла джау болгъандан эсе, элинг бла джау бол.
- Окъугъан озар, окъумагъан тозар.
- Аман адам этегингден тутса, кес да къач.
- Орундукъ тюбюнде атылсам да, орта джиликме, де да айлан.
- Къарнынг бла ёч алма.
- Болджал ишни бёрю ашар.
- Ашхы – джыяр, аман – джояр.
- Баш – акъыл ючюн, акъылман – халкъ ючюн.
- Тойгъанлыкъ къойгъа джарашады.
- Эр сокъур болсун, къатын тилсиз болсун.
- Ышармагъан – кюлмез, кюлмеген – къууанчны билмез.
- Ёлюк кебинсиз къалмаз.
- Къызын тута билмеген, тул этер, джашын тута билмеген, къул этер.
- Хаухну атма, ёнгкючню сатма.
- Къайгъыны сюйген, къайгъы табар.
- Аман къатын алгъан, арыр, иги къатын алгъан джарыр.
- Ачны эсинде – аш.
- Аш кетер да бет къалыр.
Профиль
|
|
|||