- Ёгюзню мюйюзюнден тутадыла, адамны сёзюнден тутадыла.
- Джигер – джаннга къыйынлыкъ.
- Айранны сюйген, ийнек тутар.
- Ана къолу ачытмаз.
- Адам боллукъ, атламындан белгили болур.
- Къайгъыны сюйген, къайгъы табар.
- Бойнуму джети джерден кессенг да, мен ол ишни этеллик тюлме.
- Бети – къучакълар, джюреги – бычакълар.
- Юй кюйдю да, кюйюз чыкъды, ортасындан тюйюш чыкъды.
- Элиб деген, элге болушур.
- Сабыр джетер муратха, сабырсыз къалыр уятха.
- Бир абыннган – минг сюрюнюр.
- Биреуню эскиси биреуге джангы болмайды.
- Къыз тиширыу кеси юйюнде да къонакъды.
- Мухарны эси – ашарыкъда.
- Аш иеси бла татлыды.
- Ким бла джюрюсенг, аны кёзю бла кёрюнюрсе.
- Эл ауузу – элия.
- Къошда джокъгъа – юлюш джокъ.
- Тамбла алтындан бюгюн багъыр ашхы.
- Ариу сёз аурууунгу алыр.
- Алим болгъандан эсе, адам болгъан къыйынды.
- Башы ишлегенни, ауузу да ишлер.
- Кийим тукъум сордурур.
- Адам сёзюнден белгили.
- Къуллукъчума, деб махтанма, къуллукъ – хаух джамчыды!
- Къозулугъунда тоймагъан, къойлугъунда тоймаз.
- Аджашхан тёгерек айланыр.
- Сангырау къулакъ эл бузар.
- Ат да турмайды бир териде.
- Ат басханны джер билед.
- Бети къызарыучу адамны, джюреги харам болмаз.
- Джумушакъ терекни къурт ашар.
- Аман къатын алгъан, арыр, иги къатын алгъан джарыр.
- Кийимни бичсенг, кенг бич, тар этген къыйын тюлдю.
- Кюлме джашха – келир башха.
- Байлыкъ болгъан джерде, тынчлыкъ джокъду.
- Мухар, кеси тойса да, кёзю тоймаз.
- Тил – кесген бычакъ, сёз – атылгъан окъ.
- Къыз келсе, джумуш эте келеди, къатын келсе, ушакъ эте келеди.
- Кюн кёрмеген, кюн кёрсе, кюндюз чыракъ джандырыр.
- Ашхы тенг джолгъа салыр, аман тенг джолдан тайдырыр.
- Уллу сёзде уят джокъ.
- Иги болса, тамадама – махтау, аман болса, меннге – айыб.
- Къартны бурнун сюрт да, оноугъа тут.
- Ёмюрлюк шохлукъну джел элтмез.
- Уллу атлама – абынырса, уллу къабма – къарылырса.
- Иги адам абынса да, джангылмаз.
- Ариу – кёзге, акъыл – джюрекге.
- Ариу джол аджал келтирмез.
Профиль
|
|
|||